8th Pay Commission: ₹૩૦,૦૦૦ કે ₹૬૮,૦૦૦… ૮મા પગાર પંચમાં કેટલું થશે તમારું પેન્શન? જુઓ તમામ લેવલનું ગણિત
8th Pay Commission કેન્દ્ર સરકારના અંદાજે ૬૯ લાખથી વધુ પેન્શનરો માટે ૮મું પગાર પંચ (8th Pay Commission) અત્યંત મહત્વપૂર્ણ સાબિત થવા જઈ રહ્યું છે. હાલમાં દેશના મોટાભાગના નિવૃત્ત કેન્દ્રીય કર્મચારીઓને જૂની પેન્શન યોજના (OPS) હેઠળ લાભ મળી રહ્યા છે. ૮મા પગાર પંચની રચના અને તેની અમલવારી અંગે ચર્ચા ઝડપી બની છે ત્યારે તમામ નિવૃત્ત કર્મચારીઓ તેમના પેન્શનમાં નોંધપાત્ર વધારાની અપેક્ષા રાખી રહ્યા છે. વિવધ પેન્શનર સંગઠનો અને કર્મચારી યુનિયનો દ્વારા સરકાર સમક્ષ નવી માંગણીઓ મૂકવામાં આવી રહી છે, જેનાથી ભવિષ્યમાં પેન્શનની રકમ રૂ. ૩૦,૦૦૦ થી લઈને રૂ. ૬૮,૦૦૦ સુધી પહોંચી શકે છે.
પેન્શનર્સ સંગઠનોની મુખ્ય માંગણીઓ
વિવિધ કેન્દ્રીય પેન્શનર સંગઠનો દ્વારા ૮મા પગાર પંચ સમક્ષ પેન્શન ગણતરીની ફોર્મ્યુલામાં સુધારો કરવાની માંગ કરવામાં આવી રહી છે. એનસી-જેસીએમ (NC-JCM) અને ઓલ ઈન્ડિયા ડિફેન્સ એમ્પ્લોયીઝ ફેડરેશન (AIDF) દ્વારા સંયુક્ત રીતે રજૂઆત કરવામાં આવી છે કે નિવૃત્ત કર્મચારીનું મૂળ પેન્શન તેમના છેલ્લા ઉપાડેલા પગારના ૬૭ ટકા હોવું જોઈએ, જ્યારે ફેમિલી પેન્શન છેલ્લા પગારના પચાસ ટકા નક્કી થવું જોઈએ.
બીજી તરફ, ભારત પેન્શનર્સ સમાજ (BPS) એ ન્યૂનતમ મૂળભૂત પેન્શન રૂ. ૪૫,૦૦૦ કરવા માટે સરકારને અરજી કરી છે. સંગઠનોનું કહેવું છે કે મોંઘવારીના વર્તમાન સમયમાં નિવૃત્ત કર્મચારીઓને સન્માનજનક જીવન જીવવા માટે પેન્શનની રકમમાં મોટો સુધારો કરવો અનિવાર્ય છે.
ફિટમેન્ટ ફેક્ટરના આધારે પેન્શનની ગણતરી
૮મા પગાર પંચ હેઠળ કર્મચારીઓ અને પેન્શનરો ૨.૧, ૨.૨૮ અને ૨.૫૭ ગણા ફિટમેન્ટ ફેક્ટર નક્કી કરવાની માંગ કરી રહ્યા છે. અલગ-અલગ ફિટમેન્ટ ફેક્ટર લાગુ થવાના આધારે પેન્શનના આંકડામાં મોટો તફાવત જોવા મળી શકે છે:
૧. જો ૨.૧ ફિટમેન્ટ ફેક્ટર લાગુ થાય તો:
હાલમાં લેવલ-૫ ના કર્મચારીઓને મળતું ન્યૂનતમ બેઝિક પેન્શન રૂ. ૧૪,૬૦૦ વધીને રૂ. ૩૦,૬૬૦ થઈ શકે છે. તેવી જ રીતે, લેવલ-૬ ના કર્મચારીઓનું પેન્શન રૂ. ૩૭,૧૭૦, લેવલ-૭ ના કર્મચારીઓનું રૂ. ૪૭,૧૪૫, લેવલ-૮ ના કર્મચારીઓનું રૂ. ૪૯,૯૮૦ અને લેવલ-૯ ના કર્મચારીઓનું મૂળ પેન્શન વધીને રૂ. ૫૫,૭૫૫ થઈ શકે છે.
૨. જો ૨.૨૮ ફિટમેન્ટ ફેક્ટર સ્વીકારાય તો:
આ ફિટમેન્ટ ફેક્ટર હેઠળ લેવલ-૫ ના કર્મચારીઓનું ન્યૂનતમ બેઝિક પેન્શન રૂ. ૩૩,૨૮૮ થઈ જશે. જ્યારે લેવલ-૬ ના કર્મચારીઓ માટે આ રકમ રૂ. ૪૦,૩૫૬, લેવલ-૭ ના કર્મચારીઓ માટે રૂ. ૫૧,૧૮૬, લેવલ-૮ ના કર્મચારીઓ માટે રૂ. ૫૪,૨૬૪ અને લેવલ-૯ ના કર્મચારીઓ માટે રૂ. ૬૦,૫૩૪ સુધી પહોંચવાની સંભાવના છે.
૩. જો ૨.૫૭ ફિટમેન્ટ ફેક્ટર લાગુ કરવામાં આવે તો:
જો સરકાર કર્મચારી યુનિયનોની મહત્તમ ૨.૫૭ ફિટમેન્ટ ફેક્ટરની માંગ સ્વીકારી લે છે, તો પેન્શનરોની આવકમાં બમ્પર વધારો થશે. આ પરિસ્થિતિમાં લેવલ-૫ ના કર્મચારીઓનું બેઝિક પેન્શન રૂ. ૩૭,૫૨૨, લેવલ-૬ ના કર્મચારીઓનું રૂ. ૪૫,૪૮૯, લેવલ-૭ ના કર્મચારીઓનું રૂ. ૫૭,૬૯૭, લેવલ-૮ ના કર્મચારીઓનું રૂ. ૬૧,૧૬૬ અને લેવલ-૯ ના કર્મચારીઓનું મૂળ પેન્શન વધીને રૂ. ૬૮,૨૩૪ થઈ શકે છે.
અંતિમ નિર્ણય પર સૌની નજર
8th Pay Commission હાલમાં નાણા મંત્રાલય અને પગાર પંચની સમિતિઓ દ્વારા કર્મચારી મંડળોની આ માંગણીઓ પર વિચારણા કરવામાં આવી રહી છે. જો સરકાર ફિટમેન્ટ ફેક્ટરમાં મોટો વધારો સ્વીકારે છે, તો તેનાથી દેશના લાખો નિવૃત્ત કર્મચારીઓ અને તેમના પરિવારજનોના જીવનધોરણમાં સકારાત્મક ફેરફાર આવશે.
