ટેસ્ટ ક્રિકેટમાં રબાડાનો જલવો! સૌથી ઝડપી 350 વિકેટ લેનારા ફાસ્ટ બોલર બન્યા
દક્ષિણ આફ્રિકાના સ્ટાર ફાસ્ટ બોલર કાગિસો રબાડાએ ટેસ્ટ ક્રિકેટમાં એક એવો ઐતિહાસિક કારનામો કરી બતાવ્યો છે, જેના કારણે આખી દુનિયામાં તેની ચર્ચા થઈ રહી છે. ઓસ્ટ્રેલિયા સામે કેપટાઉનમાં રમાયેલી રોમાંચક મેચ દરમિયાન રબાડાએ પોતાની ઘાતક બોલિંગથી તે મુકામ હાંસલ કરી લીધો, જે આજદિન સુધી ટેસ્ટ ઇતિહાસનો કોઈ પણ ઝડપી બોલર કરી શક્યો ન હતો. રબાડા હવે ટેસ્ટ ક્રિકેટમાં સૌથી ઓછા બોલ રમીને 350 વિકેટ પૂરી કરનાર વિશ્વના સૌથી ઝડપી ફાસ્ટ બોલર બની ગયા છે.
કેપટાઉન ટેસ્ટમાં રબાડાનો જાદુ
દક્ષિણ આફ્રિકા અને ઓસ્ટ્રેલિયા વચ્ચે ત્રણ ટેસ્ટ મેચોની સિરીઝની છેલ્લી અને નિર્ણાયક મેચ કેપટાઉનના ન્યૂલેન્ડ્સ સ્ટેડિયમમાં રમાઈ રહી હતી. આ મેચના પાંચમા દિવસે આફ્રિકન ઝડપી બોલર કાગિસો રબાડાએ પોતાની શાનદાર બોલિંગનો જાદુ વિખેર્યો. પોતાની 75મી ટેસ્ટ મેચ રમી રહેલા રબાડાને આ મુકામ સુધી પહોંચવા માટે માત્ર 4 વિકેટની જરૂર હતી. મેચની પહેલી ઇનિંગમાં તેમને એક સફળતા મળી, પરંતુ અસલીમા તો તેમણે બીજી ઇનિંગમાં કમાલ કરી દીધો.
મેચના પાંચમા દિવસે બીજી ઇનિંગની શરૂઆતી 4 ઓવરોની અંદર જ રબાડાએ ઓસ્ટ્રેલિયન બેટ્સમેનોની કમર તોડી નાખી અને ત્રણ વિકેટ ઝડપીને પોતાની કારકિર્દીની 350 ટેસ્ટ વિકેટો પૂરી કરી લીધી. આ સાથે જ તેમણે ઇતિહાસના પાનાઓમાં પોતાનું નામ હંમેશા માટે નોંધાવી દીધું.
ડેલ સ્ટેન અને વકાર યુનુસનો મોટો રેકોર્ડ તોડ્યો
બોલના હિસાબે ટેસ્ટ ક્રિકેટમાં 350 વિકેટનો આંકડો સ્પર્શવાના મામલામાં કાગિસો રબાડાએ દુનિયાના તમામ ઝડપી બોલરોને પાછળ છોડી દીધા છે. 31 વર્ષીય રબાડાએ માત્ર 13,808 બોલમાં જ પોતાની 350 ટેસ્ટ વિકેટો પૂરી કરી લીધી.
આ મામલામાં તેમણે પોતાના જ દેશના મહાન બોલર ડેલ સ્ટેનનો રેકોર્ડ તોડ્યો છે. ડેલ સ્ટેને 14,719 બોલમાં 350 વિકેટ પૂરી કરી હતી. આ લિસ્ટમાં પાકિસ્તાનના ખુંખાર બોલર વકાર યુનુસ ત્રીજા સ્થાન પર છે, જેમણે 14,905 બોલમાં આ કારનામો કર્યો હતો.
ટેસ્ટમાં સૌથી ઓછા બોલમાં 350 વિકેટ ઝડપનાર ટોપ ફાસ્ટ બોલર:
કાગિસો રબાડા (દક્ષિણ આફ્રિકા) – 13,808 બોલ
ડેલ સ્ટેન (દક્ષિણ આફ્રિકા) – 14,719 બોલ
વકાર યુનુસ (પાકિસ્તાન) – 14,905 બોલ
મેલકમ માર્શલ (વેસ્ટ ઇન્ડીઝ) – 16,285 બોલ
મિચેલ સ્ટાર્ક (ઓસ્ટ્રેલિયા) – 16,908 બોલ
મેચોના હિસાબે કેવો રહ્યો રેકોર્ડ
જો મેચોની સંખ્યાની વાત કરીએ, તો ટેસ્ટ ક્રિકેટમાં સૌથી ઝડપી 350 વિકેટ લેવાનો સંયુક્ત વર્લ્ડ રેકોર્ડ શ્રીલંકાના મહાન સ્પિનર મુથૈયા મુરલીધરન અને ભારતના દિગ્ગજ ઓફ સ્પિનર રવિચંદ્રન અશ્વિનના નામે નોંધાયેલો છે. બંનેએ પોતાની કારકિર્દીની માત્ર 66મી ટેસ્ટ મેચમાં જ 350 વિકેટ પૂરી કરી લીધી હતી.
ઝડપી બોલરોની વાત કરીએ તો, સૌથી ઓછી મેચોમાં ૩૫૦ ટેસ્ટ વિકેટ લેવાનો રેકોર્ડ ન્યૂઝીલેન્ડના રિચાર્ડ હેડલી અને દક્ષિણ આફ્રિકાના ડેલ સ્ટેનના નામે છે; આ બંનેએ પોતાની ૬૯મી ટેસ્ટ મેચમાં આ સિદ્ધિ હાંસલ કરી હતી. કાગીસો રબાડાએ પોતાની ૭૫મી ટેસ્ટ મેચમાં આ મુકામ હાંસલ કર્યો છે, અને તેઓ ૩૫૦ વિકેટ લેનારા (રમાયેલી મેચોની દ્રષ્ટિએ) બીજા સૌથી ઝડપી દક્ષિણ આફ્રિકન ઝડપી બોલર બન્યા છે. રબાડાની આ ઐતિહાસિક સિદ્ધિ નિઃશંકપણે તેમની શાનદાર કારકિર્દીનો એક મહત્વપૂર્ણ પડાવ છે.
