ભાજપ પર ચોરીનો ગંભીર આરોપ! ખરગેએ કેમ કહ્યું “ચોરાયેલા જનાદેશથી બની છે સરકારો”?
કોંગ્રેસ અધ્યક્ષ મલ્લિકાર્જુન ખરગેએ રવિવારે વડાપ્રધાન નરેન્દ્ર મોદી પર આકરા પ્રહારો કરતા જણાવ્યું હતું કે, દેશમાં લોકશાહીને જીવંત રાખવા અને બચાવવા માટે પીએમને સત્તા પરથી હટાવવા અત્યંત આવશ્યક છે. તેમણે દાવો કર્યો હતો કે કેન્દ્ર સરકાર સહિત દેશની અનેક ભાજપ શાસિત સરકારો “ચોરાયેલા જનાદેશ” (Stolen Mandate) પર રચાઈ છે.
નવી દિલ્હીના રામલીલા મેદાન ખાતે યોજાયેલી ‘ઇન્ડિયા’ ગઠબંધનની વિશાળ રેલીને સંબોધિત કરતા ખરગેએ પોતાના અગાઉના વિવાદિત નિવેદનનું પુનરાવર્તન કર્યું હતું. તેમણે અખબારી અહેવાલો અને વિરોધ પક્ષોના આક્રમણ વચ્ચે સ્પષ્ટ શબ્દોમાં કહ્યું હતું કે, “મોદી જાયેગા. જરૂર જાયેગા (મોદી જશે. ચોક્કસ જશે.)” અત્રે ઉલ્લેખનીય છે કે ગત મહિને બિહારમાં એક કાર્યક્રમ દરમિયાન ખરગેએ પીએમ મોદી વિરુદ્ધ ટિપ્પણી કરતા કહ્યું હતું કે, “મોદી કા બાપ ભી જાયેગા” (મોદીના પિતા પણ જશે), જેના કારણે રાજકીય ગરમાવો આવ્યો હતો અને ભાજપે કોંગ્રેસ પર ભારે પ્રહારો કર્યા હતા.
લોકશાહી બચાવવા મોદીને હટાવવા જરૂરી: મલ્લિકાર્જુન ખરગે
રામલીલા મેદાન ખાતે યોજાયેલી ‘દિલ્હી ચલો’ અને ‘વોટ બચાવો, દેશ બચાવો’ રેલીમાં કોંગ્રેસ અધ્યક્ષે ગંભીર આરોપ લગાવતા કહ્યું કે વડાપ્રધાન મોદી અને ગૃહમંત્રી અમિત શાહે દેશના દલિતો, યુવાનો અને મહિલાઓના મત છીનવવાનો પ્રયાસ કર્યો છે.
ખરગેએ આક્ષેપ કર્યો હતો કે, “કેન્દ્ર સરકાર હોય કે પછી મહારાષ્ટ્ર, બિહાર કે ઉત્તર પ્રદેશની સરકારો હોય, આ બધી ‘ચોર’ સરકારો છે જે ચોરાયેલા જનાદેશથી બની છે. આપણે આ ‘વોટ ચોરો’ને સત્તામાંથી બહાર ફેંકી દેવા પડશે.” તેમણે ભારપૂર્વક જણાવ્યું કે જ્યાં સુધી મોદી સરકારને હટાવવામાં નહીં આવે ત્યાં સુધી દેશમાં લોકશાહી સુરક્ષિત રહી શકે નહીં.
મુખ્ય ચૂંટણી કમિશનર જ્ઞાનેશ કુમાર સામે ગંભીર આક્ષેપો
આ રેલી મુખ્યત્વે મુખ્ય ચૂંટણી કમિશનર (CEC) જ્ઞાનેશ કુમાર સામે કથિત ચૂંટણી ગેરરીતિઓને લઈને યોજાઈ હતી. મલ્લિકાર્જુન ખરગેએ ચૂંટણી કમિશનર જ્ઞાનેશ કુમાર પર નિશાન સાધતા કહ્યું કે વડાપ્રધાન મોદી તેમને “બચાવવાનો” પ્રયાસ કરી રહ્યા છે.
ખરગેએ ચેતવણી આપતા જણાવ્યું હતું કે, “અમારા યુવાનો અને મહિલાઓ ચૂંટણી કમિશનર જ્ઞાનેશ કુમારને શોધી કાઢશે પછી ભલે તેઓ ભૂગર્ભમાં કેમ ન છુપાઈ જાય. સીએસી જ્ઞાનેશ કુમારે રાજીનામું આપવું જ પડશે અને જ્યાં સુધી તેઓ રાજીનામું નહીં આપે ત્યાં સુધી વિપક્ષ ચૂપ બેસશે નહીં.”
વિવાદનું કેન્દ્ર બનેલા આ મામલાની શરૂઆત ‘ધ ઇન્ડિયન એક્સપ્રેસ’ના એક તપાસ અહેવાલ બાદ થઈ હતી, જેમાં દાવો કરવામાં આવ્યો હતો કે ચૂંટણી કમિશનરો સુખબીર સિંહ સંધુ અને વિવેક જોશીએ SIR કવાયત અને અન્ય પ્રક્રિયાઓ સાથે જોડાયેલા નિર્ણયો પર ૧૦ મહિનામાં ઓછામાં ઓછા ૧૪ વખત વાંધા ઉઠાવ્યા હતા. જોકે, ચૂંટણી પંચે આ તમામ આક્ષેપોને નકારી કાઢતા સ્પષ્ટતા કરી હતી કે પંચના તમામ મોટા નિર્ણયો સર્વસંમતિથી લેવામાં આવ્યા છે.
‘ઇન્ડિયા’ ગઠબંધનની રેલીમાં દિગ્ગજ નેતાઓની ઉપસ્થિતિ
દિલ્હીના મિન્ટો રોડ-કનોટ પ્લેસ જંક્શનથી રામલીલા મેદાન સુધી કાઢવામાં આવેલા આ માર્ચમાં કોંગ્રેસ સાંસદ રાહુલ ગાંધી, સમાજવાદી પાર્ટીના વડા અખિલેશ યાદવ અને પશ્ચિમ બંગાળના મુખ્યમંત્રી મમતા બેનર્જી સહિત ‘ઇન્ડિયા’ ગઠબંધનના અનેક વરિષ્ઠ નેતાઓ જોડાયા હતા. હજારોની સંખ્યામાં વિરોધ પ્રદર્શનો કરવા માટે એકઠા થયેલા નાગરિકોએ ચૂંટણી પંચ અને કેન્દ્ર સરકાર વિરુદ્ધ નારેબાજી કરી હતી.
ભાજપનો પલટવાર: ૧૯૮૪ના સિખ રમખાણોની યાદ અપાવી ટીકા
બીજી તરફ, ભાજપે ‘ઇન્ડિયા’ ગઠબંધનની આ રેલી સામે તીખી પ્રતિક્રિયા આપી છે. ભારતીય જનતા પાર્ટીએ દીવાળીના તહેવાર ટાંકણે નાના વેપારીઓના ધંધા-રોજગારને અડચણરૂપ બનવા બદલ અને ખાસ કરીને ૧૯૮૪ના સિખ વિરોધી રમખાણોની વરસીના દિવસે જ આ રેલી યોજવા બદલ વિપક્ષની ઝાટકણી કાઢી હતી.
કેન્દ્રીય ગૃહમંત્રી અમિત શાહે પ્રેસ કોન્ફરન્સ યોજીને આલોચના કરતા જણાવ્યું હતું કે, “અમારી પાર્ટીએ વિપક્ષને અગાઉ જ અપીલ કરી હતી કે તેઓ ૧-૨-૩ નવેમ્બરના રોજ આ કાર્યક્રમ ન રાખે, કારણ કે આ એ જ દિવસો છે જ્યારે સિખ વિરોધી ભયાનક રમખાણો થયા હતા, જેનાથી સિખ સમુદાયની માતાઓ, બહેનો અને બાળકોની લાગણીઓને ગંભીર ઠેસ પહોંચી શકે છે. પરંતુ વિપક્ષી નેતાઓ પોતાની જીદ પર અડગ રહ્યા.”
આ ઉપરાંત, કેન્દ્રીય મંત્રી જે.પી. નડ્ડા અને મહારાષ્ટ્રના મુખ્યમંત્રી દેવેન્દ્ર ફડણવીસ સહિતના વરિષ્ઠ નેતાઓએ પણ કોંગ્રેસ અને રાહુલ ગાંધી પર આકરા પ્રહાર કર્યા હતા. જે.પી. નડ્ડાએ જણાવ્યું હતું કે, “રામલીલા મેદાનમાં આજે જે કંઈ થઈ રહ્યું છે તે લોકશાહી પ્રત્યેનો આદર નથી, પરંતુ લોકશાહીના નામે દેશને અરાજકતામાં ધકેલવાનું એક સુનિયોજિત ષડયંત્ર છે.” ભાજપના નેતાઓએ વિપક્ષી ગઠબંધનને જનતા દ્વારા નકારાયેલા હારેલા લોકોનું જૂથ ગણાવ્યું હતું.
