IND U19 vs NEP U19: ભારતે નેપાળને 10 વિકેટે હરાવ્યું, વીરેન્દ્ર સહેવાગના દીકરા આર્યવીરે 34 બોલમાં ફટકારી અડધી સદી
ભારતીય ક્રિકેટના બે દિગ્ગજ ખેલાડીઓ વીરેન્દ્ર સહેવાગ અને રાહુલ દ્રવિડના દીકરાઓ અંડર-19 એશિયા કપ 2026માં પોતાની પ્રતિભા બતાવવા મેદાનમાં ઉતર્યા છે. ભારત અને નેપાળ વચ્ચે રમાયેલી ટૂર્નામેન્ટની પ્રથમ મેચમાં વીરેન્દ્ર સહેવાગના દીકરા આર્યવીર સહેવાગે ધમાકેદાર બેટિંગ કરીને સૌનું ધ્યાન ખેંચ્યું હતું. તેની શાનદાર અડધી સદીની મદદથી ભારતીય અંડર-19 ટીમે નેપાળને 10 વિકેટે હરાવી ટૂર્નામેન્ટમાં જીત સાથે શરૂઆત કરી છે.
ઓમાનના અલ અમરાત ક્રિકેટ ગ્રાઉન્ડ પર રમાયેલી આ મેચમાં નેપાળની ટીમ પ્રથમ બેટિંગ કરતાં માત્ર 128 રનમાં ઓલઆઉટ થઈ ગઈ હતી. જવાબમાં ભારતીય ટીમે એકપણ વિકેટ ગુમાવ્યા વિના માત્ર 19.1 ઓવરમાં લક્ષ્ય હાંસલ કરી લીધું હતું. આર્યવીર સહેવાગે 70 રનની અણનમ ઇનિંગ રમી હતી, જ્યારે ભારતીય ટીમના કેપ્ટન લક્ષ્ય રાયચંદાનીએ પણ અડધી સદી ફટકારી હતી. આ જીત સાથે ભારતે અંડર-19 એશિયા કપમાં પોતાના અભિયાનની શાનદાર શરૂઆત કરી છે.
આર્યવીર સહેવાગની તોફાની બેટિંગ, 52 બોલમાં બનાવ્યા 70 રન
129 રનના લક્ષ્યનો પીછો કરવા ઉતરેલી ભારતીય ટીમને આર્યવીર સહેવાગ અને કેપ્ટન લક્ષ્ય રાયચંદાનીએ શાનદાર શરૂઆત અપાવી હતી. બંને બેટ્સમેનોએ નેપાળના બોલરોને કોઈ તક આપી નહોતી. ખાસ કરીને આર્યવીરે પોતાની આક્રમક બેટિંગથી મેચને એકતરફી બનાવી દીધી હતી.વીરેન્દ્ર સહેવાગના દીકરા આર્યવીરે માત્ર 52 બોલમાં અણનમ 70 રન બનાવ્યા હતા. તેની આ ઇનિંગમાં સાત ચોગ્ગા અને ચાર છગ્ગાનો સમાવેશ થાય છે. શરૂઆતમાં તેણે સાવચેતીપૂર્વક બેટિંગ કરી હતી, પરંતુ ત્યારબાદ મોટા શોટ રમવાનું શરૂ કર્યું હતું.આર્યવીરે માત્ર 34 બોલમાં પોતાની અડધી સદી પૂરી કરી હતી. તેણે નેપાળના બોલર અભય યાદવની બોલિંગમાં છગ્ગો ફટકારીને આ સિદ્ધિ મેળવી હતી. તેની બેટિંગમાં આક્રમકતા અને આત્મવિશ્વાસ બંને જોવા મળ્યાં હતાં.
બીજી તરફ, ભારતીય કેપ્ટન લક્ષ્ય રાયચંદાનીએ પણ શાનદાર સાથ આપ્યો હતો. તેમણે 63 બોલમાં અણનમ 53 રન બનાવ્યા હતા, જેમાં સાત ચોગ્ગાનો સમાવેશ થાય છે. બંને વચ્ચેની શાનદાર ભાગીદારીને કારણે ભારતીય ટીમે 19.1 ઓવરમાં જ મેચ જીતી લીધી હતી.આ રીતે ભારતે નેપાળ સામે 10 વિકેટે મોટી જીત નોંધાવી હતી. આર્યવીરની આ ઇનિંગ અંડર-19 એશિયા કપની શરૂઆતમાં ભારતીય ચાહકો માટે સૌથી આકર્ષક બાબતોમાંની એક રહી હતી.
ભારતીય બોલરો સામે નેપાળની બેટિંગ નિષ્ફળ
આ મેચમાં ટોસ જીતીને ભારતીય ટીમના કેપ્ટન લક્ષ્ય રાયચંદાનીએ પ્રથમ બોલિંગ કરવાનો નિર્ણય લીધો હતો. ભારતીય બોલરોએ કેપ્ટનના નિર્ણયને સાચો સાબિત કર્યો હતો અને શરૂઆતથી જ નેપાળના બેટ્સમેનો પર દબાણ બનાવ્યું હતું.નેપાળની ટીમ 42.3 ઓવરમાં 128 રન બનાવીને ઓલઆઉટ થઈ ગઈ હતી. ટીમ તરફથી દર્શ સોનારે સૌથી વધુ 43 રન બનાવ્યા હતા. તેણે 93 બોલમાં એક ચોગ્ગો અને એક છગ્ગો ફટકાર્યો હતો. આ ઉપરાંત આશિષ લુહારે 45 બોલમાં 29 રનનું યોગદાન આપ્યું હતું. બંને વચ્ચે પાંચમી વિકેટ માટે 45 રનની ભાગીદારી થઈ હતી.નીરજ કુમાર યાદવે પણ 20 રન બનાવ્યા હતા. જોકે, અન્ય બેટ્સમેનો ભારતીય બોલિંગ સામે ખાસ પ્રદર્શન કરી શક્યા નહોતા.
ભારત તરફથી ઈશાન સૂદે શાનદાર બોલિંગ કરતાં 18 રન આપીને ત્રણ વિકેટ ઝડપી હતી. સ્પિનર અર્જુન રાજપૂતે પણ ત્રણ વિકેટ પોતાના નામે કરી હતી. યશવીર ગૌડે બે વિકેટ ઝડપી હતી. જ્યારે કાવ્ય પટેલ અને મનલ ચૌહાણને એક-એક સફળતા મળી હતી.ભારતીય બોલરોના આ સામૂહિક પ્રદર્શનને કારણે નેપાળની ટીમ મોટો સ્કોર કરવામાં નિષ્ફળ રહી હતી. ત્યારબાદ આર્યવીર અને લક્ષ્યની બેટિંગે ભારતને આસાન જીત અપાવી હતી.
Aaryavir Sehwag gets underneath it and sends it sailing over long-on! 🚀
Watch #INDvNEP in the #DPWorldMensU19AsiaCup2026, LIVE NOW on Sony Sports Network TV channels & Sony LIV.
#SonySportsNetwork #SonyLIV https://t.co/9QhEUYHYUf
— Sony Sports Network (@SonySportsNetwk) November 6, 2026
આર્યવીર સહેવાગ અને અન્વય દ્રવિડ પર સૌની નજર
આ અંડર-19 એશિયા કપમાં આર્યવીર સહેવાગ ઉપરાંત પૂર્વ ભારતીય કેપ્ટન રાહુલ દ્રવિડના દીકરા અન્વય દ્રવિડ પણ ભારતીય ટીમનો ભાગ છે. અન્વય વિકેટકીપર-બેટ્સમેન તરીકે ટીમમાં સામેલ છે. નેપાળ સામેની મેચમાં તે ભારતની પ્લેઇંગ ઇલેવનમાં હતો. જોકે, ભારતે એકપણ વિકેટ ગુમાવી ન હોવાથી તેને બેટિંગ કરવાની તક મળી નહોતી.
આ ટૂર્નામેન્ટમાં ભારતને ગ્રુપ-Aમાં રાખવામાં આવ્યું છે. આ ગ્રુપમાં ભારત ઉપરાંત પાકિસ્તાન, નેપાળ અને સંયુક્ત આરબ અમીરાતની ટીમો છે. ગ્રુપ-Bમાં બાંગ્લાદેશ, શ્રીલંકા, અફઘાનિસ્તાન અને મલેશિયાની ટીમો સામેલ છે.ભારતીય ટીમ હવે 8 નવેમ્બરે પાકિસ્તાન સામે ટકરાશે. ત્યારબાદ 10 નવેમ્બરે સંયુક્ત આરબ અમીરાત સામે તેની મેચ રમાશે. બંને ગ્રુપમાંથી ટોચની બે ટીમો સેમિફાઇનલમાં પ્રવેશ મેળવશે. સેમિફાઇનલ મુકાબલા 12 નવેમ્બરે અને ફાઇનલ 14 નવેમ્બરે રમાવાની છે.
