ઘરઆધારિત અથાણાંના ઉદ્યોગથી બે પેઢીની મહિલાઓ મહિને કમાય છે લાખો રૂપિયા
અમરેલી જિલ્લામાં આજે ગ્રામ્ય અને શહેરી બંને વિસ્તારોની મહિલાઓ પોતાનું આગવું સ્થાન અને ઓળખ બનાવી રહી છે. આ પરિવર્તનનું જીવંત ઉદાહરણ છે અમરેલી શહેરની એક સાસુ–વહુની જોડીએ ઉભું કરેલો અથાણાંનો વ્યવસાય. છેલ્લા પંદર વર્ષથી વધુ સમયથી ચાલી રહેલો આ ઘરઆધારિત ઉદ્યોગ આજે સારો ખાસો વેપાર ઊભો કરી ચૂક્યો છે. સતત મહેનત, પરંપરાગત સ્વાદ અને શુદ્ધતા પરનો ભાર—આ ત્રણેય તત્ત્વોએ આ બે મહિલાઓને સફળ બિઝનેસ વુમન બનાવવામાં મહત્વની ભૂમિકા ભજવી છે.
કવિતાબેન અને તેમની વહુ મળીને બનાવે છે શુદ્ધ અને સ્વાદિષ્ટ અથાણાં, દેશભરમાં રહે છે માંગ
કવિતાબેન ઝિંઝુવાડીયા જણાવે છે કે તેઓ ગ્રેજ્યુએશન સુધી ભણેલી છે અને છેલ્લા ઘણા વર્ષોથી પોતાના ઘરે રહેતા-રહેતા અથાણાં બનાવવાનું કાર્ય કરી રહી છે. તેઓ કેરી, લસણ અને લીંબુના અથાણાં વિવિધ સ્વાદ અને પરંપરાગત રીતો મુજબ બનાવે છે. સૌથી મહત્વની બાબત એ છે કે તેમના કોઈ પણ ઉત્પાદનમાં પ્રેઝર્વેટિવનો ઉપયોગ થતો નથી, જેના કારણે ગ્રાહકોમાં તેમની વસ્તુઓને વિશેષ સ્વીકાર મળે છે. તેમના હાથના અથાણાં અમરેલીથી લઈને દેશના અનેક રાજ્ય સુધી પહોંચે છે અને સારી આવક પણ થતી રહે છે.
વહુ દિપાલીબેને સાસુની કળા અપનાવી, ઓનલાઈન–ઓફલાઈન બંને માધ્યમથી વિકસાવ્યો વ્યવસાય
દિપાલીબેન ઝિંઝુવાડીયા, જેઓ પોતાના સાસુ પાસેથી અથાણું બનાવવાની બારીક કળા શીખી છે, આજે આ સમગ્ર વ્યવસાયને નવી દિશા આપે છે. તેઓ જણાવે છે કે તેમના ચિતલ રોડ પર એક નાની દુકાન પણ શરૂ કરી છે, જ્યાંથી નિયમિત વેચાણ થાય છે. સાથે સાથે તેમણે બનાવેલી વેબસાઇટ મારફતે દેશના કોઈપણ ખૂણેથી ગ્રાહકો ઓર્ડર આપી શકે છે. ઓનલાઈન પ્લેટફોર્મ અને સોશિયલ મીડિયા તેમના વેચાણ માટે મુખ્ય માધ્યમ છે, જ્યારે ઓફલાઈન દુકાન પર પણ ગ્રાહકો સતત આવતા રહે છે.
ગુણવત્તાવાળા કાચામાલથી તૈયાર થતા ઉત્પાદનો દ્વારા દર મહિને લાખોની આવક
દિપાલીબેન જણાવે છે કે તેઓ લીંબુ, લસણ અને કેરીનું શ્રેષ્ઠ ગુણવત્તાવાળો કાચામાલ સાવધાનીથી પસંદ કરે છે. ઘરઆંગણે જ અથાણાંની સંપૂર્ણ પ્રક્રિયા પૂર્ણ કરીને 500 ગ્રામ અને 1 કિલો પેકિંગમાં તૈયાર કરી વેચાણ કરવામાં આવે છે. સરેરાશ દર મહિને 300 થી 400 કિલો અથાણાં વેચાય છે, જેમાં એક કિલોની કિંમત 500 થી 600 રૂપિયા રહે છે. આ વ્યવસાય આજે તેમને મહિને બે લાખથી વધુની આવક આપે છે, જે ઘરઆધારિત ઉદ્યોગ માટે એક ઉત્તમ સિદ્ધિ કહેવાય.
