ઉપસરપંચના રેટકાર્ડથી ખેડૂતોમાં રોષ, સહાય પેકેજ બન્યું બજાર
ધ્રોલ તાલુકાના સોયલી ગામમાં કૃષિ સહાય પેકેજને લઈ ગંભીર આક્ષેપો સામે આવતા સ્થાનિક સ્તરે ભારે ચર્ચા શરૂ થઈ છે. એક પીડિત ખેડૂતે જિલ્લા પંચાયતના ડીડીઓ સમક્ષ લેખિત રજૂઆત કરીને જણાવ્યું છે કે સહાય મેળવવા માટે ફોર્મ ભરાવાની સામાન્ય પ્રક્રિયા પણ હવે મોંઘી બની ગઈ છે. સરકાર ખેડૂતોને સહાય આપવા કરોડો રૂપિયા ફાળવે છે, પરંતુ મધ્યસ્થીઓના નખરા ખેડૂતોના હકના પૈસા સુધી પહોંચવાની પ્રક્રિયાને મુશ્કેલ બનાવી રહ્યા છે.
ઉપસરપંચનો ‘રેટકાર્ડ’ અને ખેડૂતોની મૂંઝવણ
ફરિયાદમાં જણાવ્યા મુજબ ગામના ઉપસરપંચે સહાયના ફોર્મ ભરાવવા માટે ખુલ્લેઆમ રકમ નક્કી કરી દીધી છે. જો ખેડૂત લાઈનમાં ઊભો રહીને ફોર્મ ભરાવે તો 100 રૂપિયા ચૂકવવા પડે છે. લાઈન ટાળવી હોય તો 300 રૂપિયા લેવામાં આવે છે. આથી ખેડૂત વર્ગમાં ભારે અસંતોષ ફેલાયો છે. સામાન્ય ખેતીકામ કરતા પરિવારો માટે આ રકમ પણ ભારરૂપ થઈ રહી છે.
44000 ના ચેકની ‘ડિલ’ અને સહાય આવવાની રાહ
ખેડૂતોએ વધુ ગંભીર આક્ષેપો કરતા કહ્યું છે કે જો કોઈને ગામ પંચાયત સુધી પણ ન જવું હોય તો 44000 રૂપિયાનો ચેક ઉપસરપંચને આપવો પડે છે. બાદમાં 22000 રૂપિયા રોકડા ખેડૂતને આપવામાં આવે છે અને બાકીની કામગીરી ગામ પંચાયત દ્વારા પૂરી થાય છે. સરકારી સહાય ખેડૂતના ખાતામાં આવે ત્યારબાદ આ જ ચેક દ્વારા આખી રકમ ઉપાડી લેવામાં આવે છે. આ પ્રકારે ખેડૂતોને મળવાની સહાય પહેલેથી જ ગોઠવાયેલા લોકોના હાથમાં જતી રહે છે.
અરજી “ગાયબ” કરવાની ધમકી અને ખેડૂતોનો ગુસ્સો
આપેલા પૈસા મુજબ કામ ન કરનાર અથવા ચૂકવણી ન કરનાર ખેડૂતોની અરજી “ગાયબ” કરવાની ધમકી આપવાના આરોપો પણ ઊભા થયા છે. ખેડૂતોએ સ્પષ્ટ શબ્દોમાં કહ્યું છે કે તેઓ દિવસભર ખેતરમાં મહેનત કરે છે અને સરકારની સહાય સાથે જોડાયેલા લોકો જ તેમનું શોષણ કરે છે. આ સમગ્ર મામલો વોટ્સએપ ગ્રુપોમાં ઝડપથી ફેલાતા ગામથી લઈને સમગ્ર ધ્રોલ-જામનગર વિસ્તારમાં રોષ જોવા મળી રહ્યો છે.
તાત્કાલિક કાર્યવાહી માટે ખેડૂતોની માંગ
ફરિયાદ મળ્યા પછી ડીડીઓએ તપાસના આદેશ આપ્યા હોવાનું જાણવા મળે છે. જોકે ખેડૂતો કહે છે કે માત્ર તપાસથી કંઈ બદલાશે નહીં. લાંચખોરીમાં સંકળાયેલા લોકોને કડક કાર્યવાહી વગર રોકી શકાશે નહીં. ખેડૂતોની એક જ માંગ છે કે આવા ઉપસરપંચોને તરત જ સસ્પેન્ડ કરીને ઉદાહરણ પૂરું પાડવું જરૂરી છે, નહીં તો સરકારની કોઈ યોજનાનો વાસ્તવિક લાભ ખેડૂત સુધી પહોંચશે નહીં.
