શહેરના પાંચ મુખ્ય વિસ્તારોમાં ખાસ ડ્રાઇવ, મહિલાઓની સલામતી માટે પોલીસ સજ્જ
અમદાવાદ શહેર પોલીસે આજે સાંજથી મહિલા સુરક્ષા મજબૂત કરવા ખાસ રાત્રિ ડ્રાઇવ શરૂ કરી છે. શહેરના મુખ્ય માર્ગો અને સંવેદનશીલ વિસ્તારોમાં ફૂટ પેટ્રોલિંગ પર ખાસ ધ્યાન અપાયું છે જેથી રાત્રે સ્ત્રીઓ નિર્ભય રીતે અવરજવર કરી શકે. પોલીસ કમિશનર જી.એસ. મલિકના માર્ગદર્શન હેઠળ આ અભિયાનને તેજ ગતિ આપવામાં આવી છે.
પાંચ મુખ્ય વિસ્તારોમાં વધારેલી નજર, મહિલા ટીમો પણ તૈનાત
આ વિશેષ ડ્રાઇવ હેઠળ ભાડજ સર્કલથી સાયન્સ સિટી રોડ, દધીચી બ્રિજ, દાસ્તાન સર્કલ તથા મહિલા પૂર્વ અને પશ્ચિમ પોલીસ સ્ટેશન વિસ્તારને વધુ સુરક્ષિત બનાવવા તૈનાતી વધારી દેવામાં આવી છે. ખાસ કરીને ભાડજ–સાયન્સ સિટી રૂટ પર મહિલા પોલીસની ટીમો સાથે ફૂટ પેટ્રોલિંગ શરૂ કરવામાં આવ્યું છે. શંકાસ્પદ વ્યક્તિ કે વાહન જોવા મળતાં જ તપાસ અને કાર્યવાહી કરવાની સૂચના આપવામાં આવી છે.
રાત્રિના સમયે મહિલાઓની સુરક્ષા પર ખાસ ભાર
પોલીસે જણાવ્યું છે કે છેલ્લા દિવસોમાં મહિલાઓ સામે બનતી કેટલીક ઘટનાઓને ધ્યાનમાં રાખીને શહેરના વિવિધ બ્રિજ, મુખ્ય માર્ગો અને ઓછા અવરજવરવાળા માર્ગો પર પોલીસની હાજરી વધુ મજબૂત કરવામાં આવી છે. મહિલા પોલીસ કર્મીઓની હાજરીથી યુવતીઓ અને મહિલાઓ સીધો સંપર્ક કરી મદદ મેળવી શકે તેવી સુવિધા પણ વધારવામાં આવી છે.
નાગરિકોને વધુ સજાગ રહેવાની અપીલ
પોલીસે નાગરિકોને અપીલ કરી છે કે કોઈ શંકાસ્પદ ચહેરો, વાહન અથવા પરેશાની જણાય તો તરત જ 100 અથવા 112 પર કૉલ કરવો. નજીકની પેટ્રોલિંગ ટીમ સુધી પહોંચવાની સલાહ પણ આપવામાં આવી છે. પોલીસ માને છે કે આવી સતત ચેકિંગ અને રાઉન્ડ પેટ્રોલિંગથી શહેરની મહિલાઓમાં સુરક્ષા પ્રત્યે વધુ વિશ્વાસ અને નિર્ભયતા વિકસશે.
