કોલ ડિટેઈલ્સથી ખુલ્યો ભેદ: ગુલબાનુ અને પ્રેમી પોલીસ કબજામાં
વડોદરા શહેરમાં એક એવી ઘટના સામે આવી છે કે જે દંપત્તિ વચ્ચેના વિશ્વાસને હચમચાવી નાખે. તાંદલજામાં રહેતા ઇરસાદ અલીની તેની પત્ની ગુલબાનુએ પોતાના પ્રેમી સાથે મળીને ગળું દબાવી હત્યા કરી નાખી હતી. વધુ ચોંકાવનારી વાત એ રહી કે બંનેએ કોઈને જાણ કર્યા વગર જ મૃતદેહને કબ્રસ્તાનમાં દફનાવી દીધો હતો. બાદમાં ગુલબાનુએ પરિવારજનને ફોન કરીને કહ્યું કે ઇરસાદ અલીને હાર્ટ એટેક આવ્યો હતો, પરંતુ આ વાત પર પરિવારને શંકા વધી ગઈ.
પરિવારને મોડું જણાવતાં શંકા વધુ ગાઢ બની
મૃતકના ભાઈ ઇમ્તિયાઝ અબ્દુલકરીમ મુજબ, ઇરસાદનું મોત રાત્રે થયું હતું, પરંતુ તેમને બીજા દિવસે બપોરે જાણ કરવામાં આવી. કુદરતી મૃત્યુ હોય તો તરત પરિવારજનોને જાણ કરવી જોઈએ, છતાં ગુલબાનુએ એકપણ જણને સંપર્ક કર્યો નહોતો. સીધી દફનવિધિ કરી દેતા તેમને કંઈક ગડબડ હોવાની લાગણી થઈ. આ શંકાના આધારે પરિવારજનો સીધા પોલીસ પાસે પહોંચ્યા અને વિગતવાર ફરિયાદ નોંધાવી.
પોલીસ તપાસમાં કોલ ડિટેઈલ્સે ખોલી આખી હકીકત
તપાસ દરમ્યાન ગુલબાનુના મોબાઇલના કોલ રેકોર્ડ તપાસતાં જણાયું કે તે એક જ નંબર પર લાંબા સમયથી વાત કરતી હતી. આ નંબર તેની પ્રેમીનો હોવાનું બહાર આવ્યું. આ માહિતી મળતાની સાથે જ પોલીસે વધુ તકેદારી અપનાવીને કબરમાંથી મૃતદેહ બહાર કાઢ્યો. પોસ્ટમોર્ટમમાં ગળું દબાવવાના સ્પષ્ટ નિશાન મળતાં હત્યાની વાત પાકી થઈ ગઈ અને ગુલબાનુ તથા તેના પ્રેમીની ધરપકડ કરવામાં આવી.
પોલીસને વધુ શંકા: લાંબા સમયથી ચાલતો સંબંધ
પોલીસના સૂત્રો અનુસાર, ગુલબાનુ અને તેનો પ્રેમી ઘણાં સમયથી સંબંધમાં હતા અને ઇરસાદ અલી તેમના માટે અડચણ બની રહ્યો હતો. હાલ બંનેને કસ્ટડીમાં રાખીને વધુ પૂછપરછ કરવામાં આવી રહી છે. પોલીસને આશંકા છે કે આ હત્યાનું કાવતરું ઘણા દિવસો થી તૈયાર કરવામાં આવતું હતું. કેસને લઈને પોલીસે અનેક મહત્વના પુરાવા એકત્ર કર્યા છે અને તપાસ હજુ ચાલુ છે.
