પેસેન્જરની બોમ્બ ધમકીથી ઉડાનમાં ચકચાર, સુરક્ષા એજન્સીઓએ એરપોર્ટને હાઈ એલર્ટ પર મૂક્યું
સાઉદી અરેબિયાના મદીનાથી હૈદરાબાદ જતી ઈન્ડિગો ફ્લાઈટને મધ્યઉડાન દરમિયાન બોમ્બની ધમકી મળતા આખું ઓપરેશન સતર્કતાથી ભરાયું. ક્રૂ મેમ્બરને એક પેસેન્જરે ધમકી આપતા પાઈલટે તરત જ ફ્લાઈટને અમદાવાદ એરપોર્ટ તરફ ડાયવર્ટ કરી હતી. બપોરે લગભગ 12.30 વાગ્યે ફ્લાઈટે ઈમર્જન્સી લેન્ડિંગ કર્યું હતું અને એરપોર્ટ પર તાત્કાલિક એલર્ટ જાહેર કરવામાં આવ્યુ હતું.
મળતી માહિતી પ્રમાણે, ફ્લાઈટ 6E058માં 180થી વધુ મુસાફરો અને 6 ક્રૂ મેમ્બર્સ સવાર હતા. યાત્રા દરમિયાન એક પેસેન્જરે ક્રૂ સભ્યને કહ્યું કે “મારી પાસે બોમ્બ છે અને થોડી જ વારમાં વિસ્ફોટ થશે.” આ વાત સાંભળતા જ ક્રૂએ તાત્કાલિક પાઈલટને જાણ કરી અને પ્રોટોકોલ મુજબ સુરક્ષિત લેન્ડિંગ માટે નિર્ણય લેવાયો. ધમકીની જાણ થતાં જ મુસાફરોમાં ક્ષણિક ગભરાટનો માહોલ સર્જાયો હતો.
સુરક્ષા એજન્સીઓ દ્વારા એરપોર્ટને હાઈ એલર્ટ પર મૂકાયુ
ઇમર્જન્સી લેન્ડિંગ પછી સુરક્ષા એજન્સીઓએ એરપોર્ટને હાઈ એલર્ટ પર મૂકી સંપૂર્ણ વિસ્તાર સીલ કર્યો હતો. તમામ મુસાફરોને સલામત રીતે ટર્મિનલમાં ખસેડ્યા હતા અને તેમની તબિયતની ચકાસણી પણ કરવામાં આવી હતી. ફ્લાઈટનું સઘન સર્ચ ઓપરેશન હાથ ધરવામાં આવ્યું છે અને એરક્રાફ્ટનું સેનિટાઈઝેશન ચાલુ છે.
ધમકી આપનાર પેસેન્જર પોલીસ કસ્ટડીમાં
ધમકી આપનાર પેસેન્જરને તાત્કાલિક કસ્ટડીમાં લેવામાં આવ્યો છે અને તેની પૂછપરછ તેજ કરવામાં આવી છે. સુરક્ષા એજન્સીઓ તેની પાછળનો હેતુ, માનસિક સ્થિતિ અને સંડોવણી સંબંધિત તમામ પાસાઓની વિગતવાર તપાસ કરી રહી છે. પ્રાથમિક તબક્કે કોઈ વિસ્ફોટક મળ્યું નથી, પરંતુ પ્રોટોકોલ મુજબ તમામ તપાસ ચાલુ છે.
