શિક્ષણ, દારૂબંધી અને ભ્રષ્ટાચાર વિરુદ્ધની લડાઈ અંગે આનંદીબેનના ખુલ્લા વિચારો
અમદાવાદમાં આજે એક ખાસ પ્રસંગે ઉત્તર પ્રદેશના રાજ્યપાલ અને ગુજરાતના ભૂતપૂર્વ મુખ્યમંત્રી આનંદીબેન પટેલે પોતાના જીવનપ્રસંગો પર આધારિત પુસ્તક “ચેલેન્જીસ ઇન્સ્પાયર મી”ના ગુજરાતી એડિશનનું વિમોચન કર્યું. પુસ્તકનું લોન્ચિંગ કેન્દ્રીય ગૃહમંત્રી અમિત શાહના હસ્તે થયું. આનંદીબેને જણાવ્યું કે આ પુસ્તકની કિંમત ₹1,000 રહેશે અને તેનો સમગ્ર નફો પીડિત દીકરીઓના શિક્ષણ અને કલ્યાણ માટે વપરાશે. પોતાના બાળપણના અનુભવો તેમણે જાતે લખ્યા છે અને બાકીની માહિતી સ્ટાફે સંકલિત કરી છે.
જીવનની લડાઈઓ અને મૂલ્યો અંગે આનંદીબેનનું ભાવુક સંબોધન
આ પ્રસંગે આનંદીબેને પોતાના રાજકીય અને સામાજિક જીવનના અનેક પડકારોને યાદ કર્યા. તેમણે જણાવ્યું કે પાર્ટીએ અનેક કાર્યકર્તાઓને ઘડ્યા છે, પરંતુ સારું કામ કરનારને વધુ અડચણો આવતી હોય છે. ભ્રષ્ટાચાર, શિક્ષણ સુધારણા અને મહિલા સશક્તિકરણ જેવા મુદ્દાઓ પર તેમણે સ્પષ્ટ મંતવ્ય રજૂ કર્યું. દારૂબંધીને તેઓએ રાજ્યની સુરક્ષા અને નૈતિક મૂલ્યો સાથે સીધી સંબંધિત ગણાવી. તેમની વાણીમાં કડક શાસન અને માનવતા બંનેના સંદેશનો સમન્વય જોવા મળ્યો.
આદિવાસી વિસ્તારના શિક્ષણ અંગે ગર્વભેર વાત : “શિક્ષકો ડરતા હતા, આજે બાળકો અધિકારી બને છે”
શિક્ષણ મંત્રી તરીકેની જવાબદારી યાદ કરતાં આનંદીબેન કહ્યું કે એક સમયે આદિવાસી વિસ્તારોમાં શિક્ષકો જવા તૈયાર નહોતા. મેરિટ આધારિત ભરતી કરવાના નિર્ણયે ઘણા વિરોધોને જન્મ આપ્યો, પરંતુ આજે તે વિસ્તારોમાંથી હજારો યુવાઓ ઇજનેર, ડોક્ટર અને અન્ય વ્યવસાયોમાં આગળ વધ્યા છે. ગુજરાતમાંથી ભ્રષ્ટાચાર હટાવવા નરેન્દ્રભાઈ મોદીનું યોગદાન તેઓએ વિશેષ રીતે ઉલ્લેખ્યું. તાજેતરમાં આવેલા અહેવાલો પણ આ વિસ્તારોમાં શિક્ષણના સ્તરમાં સુધારાને સમર્થન આપે છે.
અમિત શાહ અને નરેન્દ્ર મોદીના માર્ગદર્શન અંગે ખુલ્લી ચર્ચા
આનંદીબેને જણાવ્યું કે અમિત શાહને ચાણક્ય તરીકે ઓળખાવવાનું કારણ તેમની કાર્યશૈલી છે. મુખ્યમંત્રી તરીકેની શરૂઆતમાં નરેન્દ્ર મોદીએ ગૃહખાતું અમિત શાહને સોંપવાનું કહ્યું હતું અને તેમના સમયમાં અનેક સુધારાત્મક કાર્યો થયા. રાજ્યપાલ તરીકે નિયુક્ત થયા બાદ તેમણે નરેન્દ્ર મોદીને મળી આંગણવાડીઓ અને પ્રાકૃતિક ખેતી જેવા મુદ્દાઓ પર ચર્ચા કરી હતી. અમિત શાહે પણ આ પુસ્તકને આનંદીબેનની હિંમત અને સંકલ્પનો પ્રતિબિંબ ગણાવ્યું.
ઉત્તર પ્રદેશમાં ચાલુ કરેલા કાર્યો : “રાજભવન હવે લોકભવન બની ગયું છે”
ઉત્તર પ્રદેશમાં રાજ્યપાલ તરીકેના કામ અંગે તેમણે જણાવ્યું કે અયોધ્યામાં એક પણ આંગણવાડી ન હતી જ્યારે આજે ઘણી આંગણવાડીઓ તૈયાર થઈ રહી છે. રાજભવનની શાળામાં બાળકોની સંખ્યા વધારી, પોલીસ કર્મચારીઓના બાળકોને માટે વિશેષ સુવિધાઓ ઊભી કરી અને જનસહયોગથી નવી શૈક્ષણિક યોજનાઓ શરૂ કરી. તેમણે જણાવ્યું કે રાજ્યની યુનિવર્સિટીઓ હવે આંતરરાષ્ટ્રીય રેન્કિંગમાં સ્થાન મેળવી રહી છે. યુનિવર્સિટીઓને પાંચ પાંચ ગામ ગોદ લેવડાવી તેમની જીવનશૈલીમાં સુધારો લાવવાની પ્રેરણા આપી છે.
પોક્સો કેસ, દીકરીઓની સુરક્ષા અને નૈતિક જવાબદારી અંગે સ્પષ્ટ વલણ
પોક્સો એક્ટ હેઠળ મળેલા માર્ગદર્શન બાદ આનંદીબેન અનેક સંસ્થાઓ સુધી પહોંચી અને દીકરીઓની પરિસ્થિતિ જોઈ. તેમના સહયોગથી અબ્દુલ કલામ ટેકનિકલ યુનિવર્સિટીએ એક સારી શાળાનું નિર્માણ કર્યું, જ્યાં આજે બાળકો અભ્યાસ કરી રહ્યા છે. રાજભવનને “લોકભવન” ગણાવતા તેમણે જણાવ્યું કે કોઈપણ વ્યક્તિ પોતાની ફરિયાદ લઈ તેમની પાસે આવી શકે છે અને ન્યાય મળવો જોઈએ.
ગુજરાતમાં દારૂબંધી અંગે ફરી સ્પષ્ટ સંદેશ : “દીકરીઓ નિર્ભય બને છે એનું કારણ દારૂબંધી”
દારૂબંધી અંગે મીડિયામાં ચાલતી ચર્ચાઓ પર પ્રતિભાવ આપતાં આનંદીબેને જણાવ્યું કે ગુજરાતમાં દારૂબંધીથી મહિલાઓની સુરક્ષામાં વધારો થયો છે. નવરાત્રિ દરમિયાન દીકરીઓ નિર્ભય રીતે રાત્રે ચાર વાગ્યા સુધી ગરબા રમી શકે છે—તેનું મુખ્ય કારણ દારૂબંધી જ છે. તાજેતરના અહેવાલો પણ એ નીતિથી સામાજિક સ્થિરતા વધતી બતાવે છે. પુસ્તકમાં પણ તેમણે આ વિષય પર વિગતવાર લખ્યું છે.
