2030 માટેના ઇવી લક્ષ્ય તરફ ગુજરાતની ઝડપી દોડ
પેટ્રોલ, ડીઝલ અને સીએનજીની વધતી કિંમતો વચ્ચે ઇલેક્ટ્રિક વાહનો હવે સસ્તા અને પર્યાવરણમૈત્રીક વિકલ્પ તરીકે ઝડપથી સ્વીકારાઈ રહ્યા છે. ઇંધણથી થતા પ્રદુષણને ઘટાડવા માટે પણ ઇવી એક જરૂરી પગલું માનવામાં આવે છે. ગુજરાતમાં ઇલેક્ટ્રિક વાહનોનું બજાર છેલ્લા કેટલાક મહિનાથી સ્પષ્ટ રીતે તેજી પકડી રહ્યું છે. ઓટોમોબાઇલ ડીલર્સ એસોસિએશન મુજબ, ખાસ કરીને ઇલેક્ટ્રિક કાર સેગમેન્ટે નોંધપાત્ર વૃદ્ધિ દર્શાવી છે. ગુજરાત સરકારના 2030 સુધી 40થી 50 ટકા ઇવી હિસ્સો મેળવવાના વિઝન તરફ આ ગતિ મહત્વપૂર્ણ માનાય છે.
ઇવી કાર સેગમેન્ટમાં સૌથી વધુ વૃદ્ધિનો ટ્રેન્ડ
ફેડરેશન ઓફ ઓટોમોબાઇલ ડીલર્સ એસોસિએશનના ચેરમેન પ્રણવ શાહના જણાવ્યા પ્રમાણે ટુવ્હીલરની સરખામણીએ ઇલેક્ટ્રિક કારનું બજાર વધુ ઝડપથી વિકસ્યું છે. પહેલા કુલ કાર બજારમાં ઇવીનો શેર અઢી ટકા હતો, જે હવે વધી સાડા ત્રણ ટકા સુધી પહોંચ્યો છે. છેલ્લા અનેક મહિનાથી 30 થી 35 ટકાની વૃદ્ધિ સતત નોંધાઈ રહી છે. નવા મોડલ્સની આવક, ઓછો ટેક્સ અને શૂન્ય કોર્પોરેશન ટેક્સ જેવા પગલાઓએ ગ્રાહકોને ઇવી તરફ વાળવામાં મોટો ફાળો આપ્યો છે. અમદાવાદ જેવા શહેરોમાં આ સવલતો વધુ પ્રભાવશાળી બની છે.
ઈન્ફ્રાસ્ટ્રક્ચર અને પ્રાઇઝ ગેપ ઘટાડાશે તો ઇવી અપનાવામાં ઝડપ આવશે
જોકે ઇવી બજારમાં વૃદ્ધિ થઈ રહી છે, પરંતુ પ્રાઇઝ ગેપ અને ચાર્જિંગ ઈન્ફ્રાસ્ટ્રક્ચર હજુ પડકારરૂપ છે. સરકારના 2030 ના ઇવી લક્ષ્ય માટે ચાર્જિંગ સગવડ સૌથી મહત્વપૂર્ણ ગણાશે. ઇન્ડસ્ટ્રી તૈયાર છે અને ગ્રાહકો પણ ઇવી અપનાવવા ઉત્સુક છે, પરંતુ સબસિડી અને સુવિધા બંને ક્ષેત્રોમાં વધુ પ્રોત્સાહન મળવાથી વિકાસ વધુ ઝડપથી થશે. સોસાયટીઓમાં કોમન ચાર્જિંગ પોઇન્ટ અને વધુ સસ્તા વિકલ્પો ઉપલબ્ધ થશે તો ઇવી વેચાણ હજુ વધુ વધવાની શક્યતા છે.
ચાર્જિંગ સુવિધામાં વધારો બજાર વિકાસની કી
હાલમાં ચારથી પાંચ કિલોમીટરનાં અંતરે ચાર્જિંગ સ્ટેશન ઉપલબ્ધ છે, પરંતુ મોટાભાગના સ્ટેશનોમાં ફક્ત થોડા સ્લોટ જ છે. ગાડીઓની સંખ્યા વધશે ત્યારે આ સ્લોટ પૂરતા નહીં રહે તેવી શક્યતા છે. પ્રણવ શાહનું કહેવું છે કે જેટલા પેટ્રોલ પંપ છે તેની સરખામણીએ ઓછામાં ઓછા 30 ટકા જેટલા ચાર્જિંગ સ્ટેશન હોવા જોઈએ. અનેક પેટ્રોલ પંપોએ ચાર્જિંગ પોઇન્ટ શરૂ કર્યા છે, છતાં માંગને પહોંચી વળવા વધુ સ્ટેશન જરૂરી બનશે. ચાર્જિંગ નેટવર્ક મજબૂત થશે તો ઇવી બજાર વધુ ઝડપથી વિસ્તરી શકશે.
