રાજ્યની સુરક્ષા દળને મળશે નવા લોકરક્ષક, ભરતી બોર્ડે જાહેર કરી ફાઇનલ યાદી
ગુજરાત પોલીસમાં લોકરક્ષક ભરતી 2024ને લઈને લાંબા સમયથી રાહ જોઈ રહેલા ઉમેદવારો માટે મોટી જાહેરાત સામે આવી છે. ગુજરાત પોલીસ ભરતી બોર્ડે 12 ડિસેમ્બરે સત્તાવાર વેબસાઇટ પર અંતિમ પસંદગી યાદી જાહેર કરી છે. આ સાથે રાજ્યભરના લાખો ઉમેદવારોની આતુરતાનો અંત આવ્યો છે. ભરતી પ્રક્રિયા પૂર્ણ થતાં હવે પસંદ થયેલા ઉમેદવારો માટે આગામી તબક્કાની તૈયારી શરૂ થશે.
કુલ પસંદગી અને લિંગ મુજબ આંકડા
અંતિમ પરિણામ મુજબ કુલ 11,899 ઉમેદવારોની પસંદગી કરવામાં આવી છે. આ યાદીમાં પુરુષ અને મહિલા બંને ઉમેદવારોનો સમાવેશ થાય છે. પસંદ થયેલ ઉમેદવારોમાં 8,782 પુરુષ લોકરક્ષક અને 3,117 મહિલા લોકરક્ષક સામેલ છે. ભરતી દરમિયાન વિવિધ કારણોસર 382 ઉમેદવારોએ પોતાની ઉમેદવારી પાછી ખેંચી હોવાનું પણ સામે આવ્યું છે.
યુપીસી અને હથિયારી પોલીસનો કટઓફ
અંતિમ પસંદગી યાદીમાં કટઓફના આંકડા પણ જાહેર કરાયા છે. બિન હથિયારધારી પોલીસ કોન્સ્ટેબલમાં જનરલ કેટેગરીના પુરુષ ઉમેદવારો માટે કટઓફ 132.25 રહ્યો છે, જ્યારે મહિલાઓ માટે 113.50 નોંધાયો છે. હથિયારી પોલીસમાં જનરલ કેટેગરીના પુરુષ ઉમેદવારો માટે કટઓફ 124.50 અને મહિલા ઉમેદવારો માટે 100.75 રહ્યો છે.
લાંબી ભરતી પ્રક્રિયા બાદ પૂર્ણતા
ગુજરાતમાં લોકરક્ષક કેડરની આશરે 12 હજાર જગ્યાઓ માટે 10.93 લાખ ઉમેદવારો શારીરિક પરીક્ષામાં હાજર રહ્યા હતા. જેમાંથી 15 જૂન 2025ના રોજ 2.47 લાખથી વધુ ઉમેદવારોએ લેખિત પરીક્ષા આપી હતી. ત્યારબાદ 30 જૂને ફાઇનલ આન્સર કી જાહેર કરવામાં આવી હતી. હવે અંતિમ પરિણામ સાથે આ ભરતી પ્રક્રિયાને પૂર્ણવિરામ મળ્યું છે.
