ઘર બેઠા બદલાઈ જશે કિસ્મત! DDU-GKY યોજનામાં ફ્રી રહેવા-જમવા સાથે મળશે ગેરંટીડ નોકરી
રાજ્યના ગ્રામીણ અને છેવાડાના અંતરિયાળ વિસ્તારોમાં વસતા યુવાધનને પગભર કરવા અને તેમને આત્મનિર્ભર બનાવવા માટે કાર્યરત ‘દીનદયાળ ઉપાધ્યાય ગ્રામીણ કૌશલ્ય યોજના’ (DDU-GKY) ગુજરાતના યુવાનો માટે આશીર્વાદરૂપ સાબિત થઈ રહી છે. કૌશલ્ય વર્ધક તાલીમ પૂર્ણ કર્યા બાદ દર મહિને લઘુત્તમ રૂ. ૧૦,૦૦૦ના પગાર સાથે રોજગારીની સુરક્ષિત તક પૂરી પાડતી આ યોજના થકી નાણાકીય વર્ષ ૨૦૨૫-૨૬માં ૧૦ માર્ચ, ૨૦૨૬ સુધીમાં રાજ્યના ૧૮થી ૩૫ વર્ષની વયજૂથના ૧,૨૬૮થી વધુ યુવાનોને સફળતાપૂર્વક રોજગારલક્ષી તાલીમ આપીને વિવિધ ક્ષેત્રોમાં રોજગારી સાથે જોડવામાં આવ્યા છે. આ સમગ્ર પ્રક્રિયામાં મહિલા ઉમેદવારોની ભાગીદારી અત્યંત વિશેષ અને નોંધપાત્ર રહી છે.
૪૦થી વધુ ક્ષેત્રોમાં બજારની માંગ આધારિત મફત તાલીમ
મુખ્યમંત્રી શ્રી ભૂપેન્દ્ર પટેલના માર્ગદર્શન તથા ગ્રામ વિકાસ મંત્રી શ્રી કુંવરજીભાઈ બાવળીયા અને રાજ્ય મંત્રી શ્રી સંજયસિંહ મહિડાના નેતૃત્વ હેઠળ રાજ્યમાં ‘ગુજરાત લાઈવલીહૂડ પ્રમોશન કંપની લિમિટેડ’ (GLPC) દ્વારા આ યોજનાનું અત્યંત પારદર્શી અને સફળ સંચાલન કરવામાં આવી રહ્યું છે.
આ યોજના હેઠળ ૪૦થી વધુ ‘સેક્ટર સ્કિલ કાઉન્સિલ’ (SSC) માન્ય ક્ષેત્રોમાં તાલીમ આપવામાં આવે છે. જેમાં મુખ્યત્વે વર્તમાન બજારની માંગને ધ્યાનમાં રાખીને:
લોજિસ્ટિક્સ અને સપ્લાય ચેઈન
હેલ્થકેર અને પેશન્ટ કેર
રિટેલ સેલ્સ અને કસ્ટમર સર્વિસ
સોલાર ટેકનોલોજી અને રીન્યુએબલ એનર્જી
BPO અને કોલ સેન્ટર ઓપરેશન્સ
વેબ ડિઝાઇનિંગ અને સોફ્ટવેર બેઝિક્સ
ઇલેક્ટ્રિશિયન અને ટેકનિકલ મેન્ટેનન્સ
જેવા આધુનિક અને ભવિષ્યલક્ષી કોર્સનો સમાવેશ થાય છે, જેનાથી ગ્રામીણ યુવાનો આધુનિક કોર્પોરેટ જગતમાં સક્ષમતાથી કામ કરી શકે.
તાલીમાર્થીઓ માટે તમામ સુવિધાઓ તદ્દન નિઃશુલ્ક
આ યોજનાની સૌથી મોટી વિશેષતા એ છે કે તેમાં પ્રવેશ લેનાર કોઈપણ યુવક કે યુવતી પર આર્થિક બોજ પડવા દેવામાં આવતો નથી:
રહેવા-જમવાની વ્યવસ્થા: રેસિડેન્શિયલ તાલીમ મેળવતા યુવાનો માટે રહેવા તથા ઉત્તમ ગુણવત્તાયુક્ત ભોજનની નિઃશુલ્ક સુવિધા પૂરી પાડવામાં આવે છે.
મુસાફરી ભથ્થું: અપડાઉન કરતા બિન-નિવાસી તાલીમાર્થીઓને દર ૧૫ દિવસે મુસાફરી ભથ્થું સીધું તેમના બેંક ખાતામાં ડાયરેક્ટ બેંક ટ્રાન્સફર (DBT) મારફતે ચૂકવવામાં આવે છે.
અભ્યાસ સામગ્રી: તમામ તાલીમાર્થીઓને યુનિફોર્મ, ટેબ્લેટ, ID કાર્ડ અને જરૂરી પુસ્તકો તથા અભ્યાસ સામગ્રી તદ્દન વિનામૂલ્યે આપવામાં આવે છે.
આ ઉપરાંત, સમાજના અનુસૂચિત જાતિ (SC), અનુસૂચિત જનજાતિ (ST), લઘુમતી સમુદાય, મહિલાઓ અને દિવ્યાંગ તાલીમાર્થીઓને આ યોજના હેઠળ વિશેષ પ્રાથમિકતા આપીને પ્રોત્સાહિત કરવામાં આવે છે.
નોકરી મળ્યા બાદ ૧૨ મહિના સુધી ટેકનિકલ માર્ગદર્શન
ઘણીવાર એવું જોવા મળે છે કે ગ્રામીણ વિસ્તારના યુવાનો પ્રથમ વખત શહેરી કે કોર્પોરેટ વાતાવરણમાં નોકરી શરૂ કરે ત્યારે શરુઆતના મહિનાઓમાં અનુકૂળ થવામાં મુશ્કેલી અનુભવે છે. આ સમસ્યાના કાયમી ઉકેલ રૂપે, DDU-GKY યોજના માત્ર નોકરી અપાવવા પૂરતી સીમિત નથી રહેતી. યુવાનો પોતાના કાર્યક્ષેત્રમાં સ્થિર થઈ શકે અને લાંબા ગાળાનું સફળ કરિયર બનાવી શકે તે માટે નોકરી મેળવ્યા બાદ પણ ૧૨ મહિના સુધી તેમને જરૂરી ટેકનિકલ માર્ગદર્શન, સોફ્ટ સ્કિલ્સ અને જરૂરી સહયોગ સતત પૂરો પાડવામાં આવે છે.
‘DDU-GKY’ એ મારી જેવી ગ્રામીણ યુવતીને નવી દિશા આપી: શ્રી દક્ષાબેન ડામોર, મહીસાગર
મહીસાગર જિલ્લાના કાકરિયા ગામના રહેવાસી શ્રી દક્ષાબેન ડામોર માટે DDU-GKY યોજના જીવન બદલનારી સાબિત થઈ છે. પાંચ ભાઈ-બહેનોના મોટા પરિવારમાં આર્થિક તંગી વચ્ચે જીવન ગુજારતા દક્ષાબેનને તેમની સહેલી મારફતે આ યોજનાની જાણકારી મળી હતી.
યોજના હેઠળ વિનામૂલ્યે રહેવા-જમવાની સુવિધા સાથે તેમણે ‘રીટેલ સેલ્સ એક્ઝિક્યુટિવ’, ‘કોમ્પ્યુટર-IT’ અને ‘સોફ્ટ સ્કિલ્સ’ની સઘન તાલીમ સફળતાપૂર્વક પૂર્ણ કરી. તાલીમ મેળવ્યા પહેલાં અંગ્રેજી કે હિન્દી ભાષામાં બોલવામાં સંકોચ અને અચકાટ અનુભવતા દક્ષાબેન આજે સંપૂર્ણ આત્મવિશ્વાસ સાથે હિન્દી અને અંગ્રેજીમાં વાતચીત કરી રહ્યા છે. તેઓ પોતાની ખુશી વ્યક્ત કરતા જણાવે છે કે, “આ યોજનાએ મારા જેવી અંતરિયાળ વિસ્તારની યુવતીને પગભર થઈને આત્મનિર્ભર બનવાની સોનેરી તક આપી છે.”
યોજનાનો લાભ લેવા માટે માહિતી ક્યાંથી મેળવવી?
ગુજરાતના ગ્રામીણ વિસ્તારના જે યુવક-યુવતીઓ આ યોજના હેઠળ વિનામૂલ્યે કૌશલ્ય વર્ધક તાલીમ મેળવીને આત્મનિર્ભર બનવા ઈચ્છતા હોય, તેઓ પોતાની નજીકની તાલુકા પંચાયત કચેરી અથવા જિલ્લા ગ્રામ વિકાસ એજન્સી (DRDA) નો સંપર્ક કરી શકે છે.
વધુ વિગતો અને ઓનલાઇન માહિતી માટે અધિકૃત વેબસાઇટ kaushal.rural.gov.in અથવા glpc.co.in પર મુલાકાત લઈ શકાય છે.
