ખેતરોની વચ્ચે મેડિકલ કચરો મળતાં રોગચાળાની આશંકા, તંત્રની બેદરકારી સામે સવાલ
છોટાઉદેપુર જિલ્લાના સંખેડા તાલુકાના સણોલી ગામ નજીકથી પસાર થતી નર્મદાની માયનોર કેનાલ કિનારે જોખમી મેડિકલ કચરો મળતા વિસ્તારમાં ભય અને ચિંતા ફેલાઈ ગઈ છે. કેનાલ આસપાસ ખુલ્લી જગ્યાએ ફેંકાયેલા આ કચરાને કારણે આરોગ્ય અને પર્યાવરણ બંને માટે ગંભીર જોખમ ઊભું થયું છે. સ્થાનિક લોકોમાં રોગચાળાની આશંકા સાથે તંત્રની બેદરકારી અંગે રોષ જોવા મળી રહ્યો છે. ઘટનાની ગંભીરતા સામે આવતા આરોગ્ય વિભાગ તાત્કાલિક હરકતમાં આવ્યું છે.
સોશિયલ મીડિયામાં વીડિયો વાઇરલ થતાં તંત્રની આંખ ઉઘડી
મળતી વિગતો મુજબ, આ સ્થળે ઉપયોગમાં લેવાયેલી સિરીંજ, ખાલી દવાની બાટલીઓ અને સમયસીમા પૂરી થયેલી દવાઓનો મોટો જથ્થો પડેલો હતો. એક જાગૃત નાગરિકે આ દૃશ્યોનો વીડિયો ઉતારી સોશિયલ મીડિયા પર જાહેર કરતાં જ મામલો ચર્ચામાં આવ્યો. જ્યાં કચરો ફેંકાયો હતો તે વિસ્તાર ખેતરોની નજીક હોવાથી પશુઓ અને માનવો બંને માટે સંક્રમણનો ભય વધ્યો હતો. વીડિયો વાઇરલ થયા બાદ તંત્રને કાર્યવાહી કરવાની ફરજ પડી.
જેસીબીથી ખાડો ખોદી કચરો દાટી દેવાની કાર્યવાહી
જાણ થતાં જ આરોગ્ય વિભાગની ટીમ અધિકારીઓ સાથે સ્થળ પર પહોંચી હતી. તેમની દેખરેખ હેઠળ જેસીબી મશીન દ્વારા ખાડો ખોદી મેડિકલ કચરો જમીનમાં દાટી દેવાયો હતો. જોકે, આ નિકાલની રીતને લઈને પણ અનેક પ્રશ્નો ઊભા થયા છે. મેડિકલ વેસ્ટના નિકાલ માટે નિશ્ચિત નિયમો હોવા છતાં ખુલ્લી જગ્યાએ અને કેનાલ કિનારે કચરો ફેંકાવાનું જવાબદાર કોણ તે અંગે સ્પષ્ટતા નથી.
તપાસ તેજ, જવાબદારો સામે કાર્યવાહીનો સંકેત
આરોગ્ય વિભાગે હાલ કચરાના નમૂનાઓ લઈ તપાસ પ્રક્રિયા શરૂ કરી છે. કચરો ક્યાંથી આવ્યો અને કોણે ફેંક્યો તે જાણવા માટે આસપાસની હોસ્પિટલ અને ક્લિનિકોની માહિતી ચકાસવામાં આવી રહી છે. વીડિયો બનાવનાર નાગરિકે પણ જવાબદાર સામે પોલીસ ફરિયાદ કરવાની તૈયારી દર્શાવી છે. અગાઉ આવી ઘટનાઓ બન્યા છતાં કડક પગલાં ન લેવાતા હોવાની ચર્ચા ફરી એકવાર ઉઠી છે.
