પોષણ ટ્રેકરથી ગ્રાઉન્ડ રિયાલિટી સુધી: આણંદ જિલ્લામાં આંગણવાડીઓની સર્વાંગી સમીક્ષા
આણંદ જિલ્લામાં બાળકો અને માતાઓના પોષણ તેમજ શિક્ષણની સેવાઓને વધુ મજબૂત બનાવવાના હેતુથી વહીવટી તંત્ર સક્રિય થયું છે. જિલ્લા કલેક્ટર પ્રવીણ ચૌધરીએ પેટલાદ તાલુકાના સિંહોલ ગામના લાલપુર અને રાંદોલ સીમ આંગણવાડી કેન્દ્રોની ઓચિંતી મુલાકાત લીધી હતી. આ તપાસ દરમિયાન તેમણે કેન્દ્રની કામગીરી અને બાળકોના વિકાસ માટે ચાલતી વિવિધ યોજનાઓના અમલીકરણની પ્રત્યક્ષ વિગતો મેળવી હતી.
પોષણ ટ્રેકર અને આરોગ્યની તપાસ
કલેક્ટરે મુલાકાત દરમિયાન પોષણ ટ્રેકર એપ્લિકેશન મુજબ બાળકોના વજન અને ઊંચાઈનું ક્રોસ વેરિફિકેશન કર્યું હતું. બાળકોમાં કુપોષણની સ્થિતિ જેવી કે સ્ટંટિંગ અને અંડરવેઈટની સમસ્યાઓ અંગે તેમણે ઊંડાણપૂર્વક સમીક્ષા કરી હતી. આ ઉપરાંત કેન્દ્રમાં મળતા ટેક હોમ રાશન અને મુખ્યમંત્રી માતૃશક્તિ યોજનાના સ્ટોકની ચકાસણી કરવાની સાથે બાળકોને અપાતા નાસ્તાની ગુણવત્તા અને પોષણ સંગમની દવાઓની પણ ચકાસણી કરી હતી.
મેઘવા ગામે ડીડીઓનું આકસ્મિક નિરીક્ષણ
બીજી તરફ જિલ્લા વિકાસ અધિકારી દેવાહુતીએ મેઘવા ગામની એસ. નગર આંગણવાડી કેન્દ્રની મુલાકાત લઈને પાયાની સુવિધાઓનું નિરીક્ષણ કર્યું હતું. તેમણે બાળકોને પીરસવામાં આવતા ગરમ નાસ્તાનો સ્વાદ ચાખ્યો હતો અને તેની પૌષ્ટિકતા વિશે ખાતરી કરી હતી. બાળકોના પ્રારંભિક શિક્ષણના સ્તરની ચકાસણીની સાથે તેમણે આંગણવાડી કાર્યકર અને હેલ્પરને યોજનાકીય લાભો દરેક લાભાર્થી સુધી સમયસર પહોંચાડવા જરૂરી માર્ગદર્શન આપ્યું હતું.
યોજનાઓના અમલીકરણ પર વિશેષ ભાર
આ આકસ્મિક મુલાકાતોનો મુખ્ય હેતુ સરકારી યોજનાઓનો લાભ છેવાડાના બાળકો અને સગર્ભા માતાઓ સુધી અસરકારક રીતે પહોંચે તે સુનિશ્ચિત કરવાનો હતો. આંગણવાડી કેન્દ્રોમાં સ્વચ્છતા અને શિક્ષણના સ્તરને વધુ સુધારવા માટે અધિકારીઓએ સૂચનાઓ આપી હતી. જિલ્લાના ઉચ્ચ અધિકારીઓના આ પગલાથી આંગણવાડી સ્ટાફમાં સતર્કતા જોવા મળી છે અને પોષણ અભિયાનને નવો વેગ મળ્યો છે.
