નેશનલ હાઈવે થી લઈ આરોગ્ય સુધીના મુદ્દાઓ પર તીવ્ર ચર્ચા, અધિકારીઓને તાકીદ
વડોદરા કલેક્ટર કચેરી ખાતે આજે કલેક્ટર ડૉ. અનિલ ધામેલિયાની અધ્યક્ષતામાં જિલ્લા ફરિયાદ નિવારણ અને સંકલન સમિતિની મહત્વની બેઠક યોજાઈ હતી. આ બેઠકમાં સાંસદ ડૉ. હેમાંગભાઇ જોશી અને ધારાસભ્યો સર્વશ્રી શૈલેષભાઇ મહેતા, ધર્મેન્દ્રસિંહ વાઘેલા તથા કેયુરભાઇ રોકડિયાએ લોકહિતના વિવિધ પ્રશ્નો રજૂ કર્યા હતા. જેમાં મુખ્યત્વે નેશનલ હાઇવેની કામગીરી, પીવાનું પાણી, કેનાલની મરામત, સ્ટ્રીટ લાઇટ, ટ્રાફિક જામની સમસ્યા, ગેરકાયદે દબાણ, આરોગ્ય સુવિધાઓ અને વીજળી પુરવઠાને લગતા મુદ્દાઓ પર ચર્ચા કરવામાં આવી હતી.
યુવાનો માટે વ્યસન મુક્તિનો ‘સંકલ્પ’
બેઠકમાં એક મહત્વની લાગણી વ્યક્ત કરવામાં આવી હતી કે, વડોદરા શહેર પોલીસ દ્વારા જે રીતે વ્યસન મુક્તિ માટે ‘સંકલ્પ’ કાર્યક્રમ યોજવામાં આવ્યો છે, તેવો જ પ્રભાવશાળી કાર્યક્રમ જિલ્લાની તમામ શૈક્ષણિક સંસ્થાઓમાં પણ યોજવો જોઈએ. આ અભિયાન દ્વારા યુવા પેઢીને વ્યસનોથી દૂર રાખી તંદુરસ્ત સમાજનું નિર્માણ કરવાનો ઉદ્દેશ્ય છે. કલેક્ટરશ્રીએ આ સૂચનને આવકારીને શિક્ષણ વિભાગ અને પોલીસ તંત્રને આ દિશામાં આયોજન કરવા જણાવ્યું હતું.
સમયમર્યાદામાં નિરાકરણ અને ફોલોઅપ પર ભાર
કલેક્ટર ડૉ. અનિલ ધામેલિયાએ તમામ સંબંધિત વિભાગીય અધિકારીઓને સ્પષ્ટ સૂચના આપી હતી કે જનપ્રતિનિધિઓ દ્વારા રજૂ કરવામાં આવેલા પ્રશ્નો પર પૂરતું લક્ષ્ય આપીને તેનું ચોક્કસ સમયમર્યાદામાં નિરાકરણ લાવવું. માત્ર આશ્વાસન નહીં, પણ પ્રશ્નોનું સમયાંતરે ફોલોઅપ લેવા માટે પણ તેમણે તાકીદ કરી હતી. વહીવટી પ્રક્રિયામાં વિલંબ ન થાય અને લોકોની પાયાની જરૂરિયાતો વહેલી તકે સંતોષાય તે માટે તેમણે અધિકારીઓને જવાબદાર બનાવ્યા હતા.
વહીવટી તંત્રની સંયુક્ત કામગીરી
આ બેઠકમાં જિલ્લા વિકાસ અધિકારી મમતા હિરપરા, જિલ્લા પોલીસ અધિક્ષક સુશીલ અગ્રવાલ અને નિવાસી અધિક કલેક્ટર બી. એસ. પટેલ સહિતના ઉચ્ચ અધિકારીઓ હાજર રહ્યા હતા. તમામ વિભાગો વચ્ચે સંકલન સાધીને જિલ્લાના વિકાસ કામોને વેગ આપવા અને પડતર પ્રશ્નોના નિકાલ માટે આ બેઠક ફળદાયી રહી હતી.
