“No pending” સૂત્ર સાથે બાકી અને નવા વિકાસ કામો સમયમર્યાદામાં પૂર્ણ કરવા પ્રભારીમંત્રીની તાકીદ
કચ્છ જિલ્લાના પ્રભારી મંત્રી અને શ્રમ, કૌશલ્ય વિકાસ તથા રોજગાર રાજ્યમંત્રી શ્રી કાંતિલાલ અમૃતિયાના અધ્યક્ષસ્થાને ભુજ ખાતે જિલ્લા પંચાયતના અધિકારીઓ અને પદાધિકારીઓ સાથે ઉચ્ચ સ્તરીય સમીક્ષા બેઠક યોજાઈ હતી. બેઠકમાં મંત્રીશ્રીએ વહીવટી તંત્રને “No pending” નું સૂત્ર આપ્યું હતું. તેમણે સ્પષ્ટ જણાવ્યું હતું કે, ગત વર્ષોના બાકી કામો અને નવા આયોજનના કામોને સ્થાનિક પ્રતિનિધિઓ સાથે સંકલન સાધીને સમયમર્યાદામાં અને ઉચ્ચ ગુણવત્તા સાથે પૂર્ણ કરવાના રહેશે.
વિકાસની ગાથા છેવાડાના માનવી સુધી પહોંચશે
પ્રભારી મંત્રીશ્રીએ એક નવતર પ્રયોગ સૂચવતા જણાવ્યું હતું કે, વડાપ્રધાન શ્રી નરેન્દ્ર મોદીના નેતૃત્વમાં કચ્છમાં જે અભૂતપૂર્વ વિકાસ થયો છે, તેની નોંધ દરેક નાગરિક સુધી પહોંચવી જોઈએ. આ હેતુથી તેમણે કચ્છના વિકાસ કામોની એક વિશેષ બુકલેટ તૈયાર કરવા અધિકારીઓને સૂચના આપી હતી. આ ઉપરાંત, શિક્ષણ, આરોગ્ય અને કૃષિ જેવા પાયાના ક્ષેત્રોમાં સરકારી યોજનાઓનો લાભ છેવાડાના ગામો સુધી ત્વરિત પહોંચાડવા પર ભાર મૂક્યો હતો.
“જિલ્લા પંચાયત એ જિલ્લાની સરકાર છે”
રાજ્યમંત્રી શ્રી ત્રિકમભાઈ છાંગાએ બેઠકમાં મહત્વનું નિવેદન આપતા જણાવ્યું હતું કે, જિલ્લા પંચાયત એ સ્થાનિક સ્તરે ‘જિલ્લાની સરકાર’ સમાન છે. તેમણે અધિકારીઓ અને પદાધિકારીઓને એક ટીમ તરીકે સંકલનમાં રહીને કામ કરવા અનુરોધ કર્યો હતો. તેમણે આત્મવિશ્વાસ સાથે સુવ્યવસ્થિત આયોજન કરીને કચ્છમાં રોડ-રસ્તા, શૌચાલય અને પાકા મકાનોના કામોને વધુ ગતિ આપવા માર્ગદર્શન પૂરું પાડ્યું હતું.
જનપ્રતિનિધિઓની રજૂઆત અને પ્રશ્નોનો નિકાલ
બેઠકમાં જિલ્લા પંચાયત પ્રમુખ જનકસિંહ જાડેજા અને ધારાસભ્ય કેશુભાઈ પટેલ સહિતના અગ્રણીઓએ મંજૂર થયેલા કામોમાં આવતા અવરોધો રજૂ કર્યા હતા.
-
શિક્ષણ અને સિંચાઈ: તાલુકા પંચાયતના સભ્યોએ શિક્ષણ અને ઈરીગેશન વિભાગને લગતા પ્રશ્નો ઉઠાવ્યા હતા, જેનો મંત્રીશ્રીએ સ્થળ પર જ અમલીકરણ અધિકારીઓ પાસેથી અહેવાલ માંગી ત્વરિત ઉકેલ લાવવા આદેશ આપ્યા હતા.
-
કાર્યવાહીની સમીક્ષા: વર્ષ ૨૦૨૪-૨૫ના જે કામો હજુ શરૂ નથી થયા અથવા પ્રગતિ હેઠળ છે, તેની ખૂટતી કડીઓ દૂર કરી કામ પૂર્ણ કરવા તાકીદ કરાઈ હતી.
આ બેઠકમાં જિલ્લા સંગઠન પ્રમુખ મનિષાબેન વેલાણી, જિલ્લા વિકાસ અધિકારી ઉત્સવ ગૌતમ અને વિવિધ સમિતિના ચેરમેનશ્રીઓ ઉપસ્થિત રહ્યા હતા.
