૭૭મા પ્રજાસત્તાક પર્વની રાજ્યકક્ષાની ઉજવણી નવીન વાવ–થરાદ જિલ્લામાં
નવીન બનેલા વાવ–થરાદ જિલ્લા માટે આગામી ૨૬ જાન્યુઆરી, ૨૦૨૬નો દિવસ ઐતિહાસિક બની રહેશે. રાજ્યકક્ષાના ૭૭મા પ્રજાસત્તાક પર્વની ઉજવણી આ વર્ષે આ સીમાવર્તી જિલ્લામાં યોજાનાર છે. જિલ્લા કલેક્ટર શ્રી જે.એસ. પ્રજાપતિએ પ્રેસ કોન્ફરન્સ દ્વારા આ ભવ્ય આયોજનની રૂપરેખા આપી હતી. રાજ્યપાલ શ્રી આચાર્ય દેવવ્રતજી અને મુખ્યમંત્રી શ્રી ભૂપેન્દ્રભાઈ પટેલની પ્રેરક ઉપસ્થિતિમાં સમગ્ર જિલ્લો રાષ્ટ્રીય ગૌરવના રંગે રંગાશે.
મહત્વપૂર્ણ કાર્યક્રમોની શ્રેણી
ઉજવણી માત્ર ધ્વજવંદન પૂરતી મર્યાદિત ન રહેતા, જિલ્લાના વિકાસ અને સાંસ્કૃતિક વારસાને પણ સાંકળી લેવામાં આવી છે:
-
૨૫ જાન્યુઆરીના આયોજનો: મુખ્યમંત્રીશ્રીના હસ્તે નવા સેવા સદન અને દૂધવા GIDC નું ભૂમિપૂજન થશે. ઉપરાંત, ગૌમાતા સર્કલનું અનાવરણ અને નારી સશક્તિકરણ કાર્યક્રમ યોજાશે.
-
શસ્ત્ર પ્રદર્શન અને સંવાદ: ગાયત્રી મંદિર ખાતે શસ્ત્ર પ્રદર્શન યોજાશે, જે યુવા પેઢી માટે આકર્ષણનું કેન્દ્ર બનશે. મુખ્યમંત્રીશ્રી ગૌભક્તો સાથે વિશેષ સંવાદ પણ કરશે.
-
રાજ્યપાલશ્રીનો ‘એટ હોમ’ કાર્યક્રમ: મલુપુર ખાતે રાજ્યપાલશ્રીની ગરિમામય ઉપસ્થિતિમાં પરંપરાગત ‘એટ હોમ’ કાર્યક્રમ અને ભવ્ય સાંસ્કૃતિક સાંજનું આયોજન કરાયું છે.
જનભાગીદારી અને પૂર્વ તૈયારીઓ
સમગ્ર જિલ્લામાં દેશભક્તિનો જુવાળ ઊભો કરવા માટે વહીવટી તંત્ર દ્વારા માઈક્રો પ્લાનિંગ કરવામાં આવ્યું છે:
૧. પરેડ અને મોકડ્રીલ: ઉજવણીના ભાગરૂપે ચેતક કમાન્ડો દ્વારા મોકડ્રીલ યોજાઈ હતી, જ્યારે ૨૬મીએ પોલીસ વિભાગ દ્વારા ભવ્ય પરેડ પ્રસ્તુત કરવામાં આવશે.
૨. ગ્રામ્ય કક્ષાએ ઉજવણી: માત્ર જિલ્લા મથકે જ નહીં, પરંતુ દરેક ગામની શાળા અને પંચાયત સ્તરે પણ લોકો આ રાષ્ટ્રીય પર્વમાં જોડાય તેવું આયોજન છે.
૩. પ્રભાતફેરી અને સ્વચ્છતા: ૨૩ અને ૨૪ જાન્યુઆરીએ વહેલી સવારે પ્રભાતફેરીઓ યોજાશે. સમગ્ર જિલ્લામાં રોશની અને સ્વચ્છતા જાળવવા વિશેષ સૂચનાઓ અપાઈ છે.
કલેક્ટરશ્રીએ આ રાષ્ટ્રીય પર્વને જિલ્લાના સર્વાંગી વિકાસની તક ગણાવીને વધુમાં વધુ નાગરિકોને આ ગૌરવશાળી ઉજવણીમાં સહભાગી થવા અપીલ કરી છે. પ્રેસ કોન્ફરન્સમાં નિવાસી અધિક કલેક્ટર શ્રી તુષાર જાની સહિત માહિતી વિભાગના ઉચ્ચ અધિકારીઓ અને મીડિયા પ્રતિનિધિઓ હાજર રહ્યા હતા.
