ચૂંટણી પંચ પર મમતા બેનર્જીનો આકરો પ્રહાર, સુપ્રીમ કોર્ટમાં બંગાળને નિશાન બનાવવાનો આરોપ
પશ્ચિમ બંગાળના મુખ્યમંત્રી મમતા બેનર્જીએ ચૂંટણી પંચની કાર્યશૈલી પર ગંભીર સવાલો ઉઠાવી તેને ખુલ્લો પડકાર ફેંક્યો છે. સુપ્રીમ કોર્ટમાં સુનાવણી દરમિયાન મમતા બેનર્જીએ આરોપ લગાવ્યો હતો કે ચૂંટણી પંચ જાણીજોઈને પશ્ચિમ બંગાળને ટાર્ગેટ કરી રહ્યું છે અને રાજ્યમાં લાખો મતદારોના નામ મતદાર યાદીમાંથી હટાવી દેવામાં આવ્યા છે. તેમણે પંચ પર કટાક્ષ કરતા તેને “વોટ્સએપ આયોગ” પણ કહી દીધું હતું.
SIR પ્રક્રિયા સામે સુપ્રીમ કોર્ટમાં સુનાવણી
બુધવાર, 4 ફેબ્રુઆરીના રોજ સુપ્રીમ કોર્ટે પશ્ચિમ બંગાળમાં ચૂંટણી પંચ દ્વારા લાગુ કરાયેલ SIR (સ્પેશિયલ ઇન્ટેન્સિવ રિવિઝન) પ્રક્રિયાને પડકારતી અરજીઓ પર સુનાવણી કરી હતી. આ અરજી મુખ્યમંત્રી મમતા બેનર્જી અને TMC સાંસદો દ્વારા દાખલ કરવામાં આવી હતી. મુખ્ય ન્યાયાધીશ સૂર્યકાંત, ન્યાયમૂર્તિ જોયમાલ્યા બાગચી અને ન્યાયમૂર્તિ વિપુલ પંચોલીની બેન્ચ સામે સુનાવણી થઈ હતી, જેમાં મમતા બેનર્જીએ પોતે કોર્ટની પરવાનગી લઈને દલીલો રજૂ કરી હતી.
“58 લાખ નામ હટાવ્યા, કોઈ જવાબ ન મળ્યો”
મમતા બેનર્જીએ અદાલતમાં જણાવ્યું હતું કે ચૂંટણી પંચને છ વખત પત્ર લખવામાં આવ્યા હતા, પરંતુ એકપણનો જવાબ મળ્યો નથી. તેમણે આરોપ લગાવ્યો કે સામાન્ય ટેકનિકલ ખામીઓના નામે મતદારોને યાદીમાંથી બહાર કરવામાં આવી રહ્યા છે. મુખ્યમંત્રીના જણાવ્યા મુજબ, અત્યાર સુધીમાં અંદાજે 58 લાખ લોકોના નામ મતદાર યાદીમાંથી હટાવી દેવામાં આવ્યા છે.
સુપ્રીમ કોર્ટે ચૂંટણી પંચને નોટિસ પાઠવી
સુનાવણી બાદ સુપ્રીમ કોર્ટે ચૂંટણી પંચને નોટિસ જારી કરીને જવાબ માંગ્યો છે. અદાલતે આ મામલે આગામી સુનાવણી માટે 9 ફેબ્રુઆરી, સોમવારની તારીખ નક્કી કરી છે.
માઈક્રો ઓબ્ઝર્વરની નિમણૂક પર સવાલ
મુખ્યમંત્રી વતી વરિષ્ઠ વકીલ શ્યામ દીવાને કોર્ટને જણાવ્યું હતું કે રાજ્યમાં લગભગ 8,300 માઈક્રો ઓબ્ઝર્વર નિયુક્ત કરવામાં આવ્યા છે, જેની બંધારણ કે કાયદામાં કોઈ જોગવાઈ નથી. તેમણે કહ્યું કે આધાર કાર્ડ અને રહેઠાણના પુરાવા જેવા માન્ય દસ્તાવેજોને પણ નકારી કાઢવામાં આવી રહ્યા છે. લોકોએ કલાકો સુધી લાંબી કતારોમાં ઉભા રહેવું પડે છે અને જેમના નામ શંકાસ્પદ યાદીમાં મુકાયા છે તેના કારણો પણ જાહેર કરવામાં આવ્યા નથી.
મમતા બેનર્જીએ પોતે પક્ષ રાખ્યો
મમતા બેનર્જીએ કોર્ટને સંબોધતા કહ્યું કે ચૂંટણી પંચ બંગાળ સાથે ભેદભાવ કરી રહ્યું છે. તેમણે સવાલ ઉઠાવ્યો કે:
- લગ્ન પછી સાસરે ગયેલી મહિલાઓના નામ પણ યાદીમાંથી હટાવી દેવાયા છે.
- જો આધાર કાર્ડ પૂરતું નથી, તો આ શરત માત્ર પશ્ચિમ બંગાળ પર જ કેમ લાગુ છે? અસમ જેવા રાજ્યોમાં આવી કડકાઈ કેમ નથી?
- ભાજપ શાસિત રાજ્યોમાંથી માઈક્રો ઓબ્ઝર્વર લાવીને નામ હટાવવાનું કામ કરવામાં આવી રહ્યું છે.
- ઘણા જીવિત લોકોને મૃત જાહેર કરી દેવામાં આવ્યા છે.
SIR પ્રક્રિયાની માન્યતા પર સવાલ
મમતા બેનર્જીની અરજીમાં SIR પ્રક્રિયાને અસંવિધાનિક ગણાવી તેના પર તાત્કાલિક રોક લગાવવાની માંગ કરવામાં આવી છે. અરજીમાં જણાવાયું છે કે આ પ્રક્રિયાથી સમાજના નબળા અને વંચિત વર્ગોના લાખો લોકોનો મતાધિકાર છીનવાઈ શકે છે.
