“અમે પણ જડબાતોડ જવાબ આપીશું…” મહિલા અનામત બિલ પર વિપક્ષના હોબાળા વચ્ચે અમિત શાહનો હુંકાર
સંસદના ત્રણ દિવસીય વિશેષ સત્રના પ્રથમ દિવસે જ રાજકીય ગરમાવો જોવા મળ્યો હતો. ગુરુવારે જ્યારે ‘નારી શક્તિ વંદન અધિનિયમ’ હેઠળ મહિલા અનામત સાથે જોડાયેલા ત્રણ મહત્વપૂર્ણ બિલો રજૂ કરવામાં આવ્યા, ત્યારે સત્તાપક્ષ અને વિપક્ષ વચ્ચે જોરદાર શબ્દયુદ્ધ ખેલાયું હતું. બિલની જોગવાઈઓ અને સીમાંકન (Delimitation) ના મુદ્દે વિપક્ષી સાંસદોએ વાંધો ઉઠાવતા ગૃહમંત્રી અમિત શાહે કડક વલણ અપનાવ્યું હતું.
સંસદમાં ટેકનિકલ મુદ્દે જામ્યો જંગ
ગુરુવારે વિશેષ સત્રમાં જ્યારે મહિલા અનામત સુધારા વિધેયક અને તેને સંલગ્ન સીમાંકન વિધેયક રજૂ કરવામાં આવ્યું, ત્યારે સ્પીકર ઓમ બિરલાએ વિપક્ષની ટેકનિકલ આપત્તિઓ સાંભળવાની શરૂઆત કરી હતી. જોકે, જ્યારે વિપક્ષી સાંસદોએ બિલની યોગ્યતા, તેના અમલીકરણના સમય અને બેઠકોની સંખ્યા જેવા ગંભીર મુદ્દાઓ પર હોબાળો શરૂ કર્યો, ત્યારે ગૃહમંત્રી અમિત શાહ પોતાની બેઠક પરથી ઉભા થયા હતા.
અમિત શાહે નિયમોનો ઉલ્લેખ કરતા સ્પષ્ટ કર્યું કે, બિલ રજૂ કરતી વખતે સભ્યોએ માત્ર તેના ટેકનિકલ પાસાઓ પર જ પોતાની રાય આપવી જોઈએ. તેમણે કહ્યું કે નિયમ ૨૭૨ હેઠળ વાત રાખવાની તક હોય છે, પરંતુ અહીં વિપક્ષ બિનજરૂરી ચર્ચાઓ કરી રહ્યો છે.
“તમે દયાળુ છો, પણ અમે પણ તૈયાર છીએ”: અમિત શાહ
સ્પીકર ઓમ બિરલાને સંબોધતા અમિત શાહે થોડા કટાક્ષ અને આત્મવિશ્વાસ સાથે કહ્યું, “આપ (સ્પીકર) ખૂબ જ દયાળુ છો કે તેમને આટલી બધી તક આપો છો. તેમને બોલવા દો, અમને કોઈ વાંધો નથી. અમે પણ તૈયાર છીએ અને સમય આવ્યે દરેક વાતનો ‘કસકર’ (જડબાતોડ) જવાબ આપીશું.”
અમિત શાહના આ નિવેદન બાદ સત્તાપક્ષના સભ્યોએ પાટલીઓ થપથપાવીને તેમનું જોરદાર સમર્થન કર્યું હતું. ગૃહમંત્રીએ સ્પષ્ટ સંકેત આપ્યો હતો કે સરકાર આ બિલના મુદ્દે કોઈ પણ પ્રકારના દબાણમાં આવવાની નથી અને વિપક્ષના દરેક સવાલનો સામનો કરવા સજ્જ છે.
માઈક અને ટીખળ: સંસદમાં હળવી પળો
ચર્ચા દરમિયાન વિપક્ષી નેતા કેસી વેણુગોપાલે બિલ પર પોતાની વાત રાખવાનો આગ્રહ કર્યો હતો. આ દરમિયાન જ્યારે રાહુલ ગાંધીએ માઈકને લઈને વેણુગોપાલને કંઈક ટોક્યા, ત્યારે સ્પીકર ઓમ બિરલાએ તરત જ ટકોર કરી હતી. સ્પીકરે સ્મિત સાથે કહ્યું, “તમારું માઈક ચાલુ જ છે, ચિંતા ન કરો. માત્ર તમારું જ માઈક બંધ થાય છે.” સ્પીકરની આ રમૂજી ટકોર પર આખા ગૃહમાં હાસ્યનું મોજું ફરી વળ્યું હતું અને વિપક્ષી સાંસદોએ પણ આ હળવી પળનો આનંદ લીધો હતો.
મહિલા અનામત પર કેમ છે વિવાદ?
સરકાર આ બિલને મહિલા સશક્તિકરણની દિશામાં એક ક્રાંતિકારી કદમ ગણાવી રહી છે, જ્યારે વિપક્ષનો આરોપ છે કે બિલની સાથે સીમાંકનની શરત જોડીને સરકાર તેને લંબાવવા માંગે છે. વિપક્ષી સાંસદોનું કહેવું છે કે જો સરકાર ખરેખર ગંભીર હોય તો સીમાંકન વગર જ તાત્કાલિક અસરથી અનામત લાગુ કરવી જોઈએ.
