આણંદ બન્યું સંપૂર્ણ તિરંગામય! જુઓ વિદ્યાનગરની ઐતિહાસિક તિરંગા યાત્રાના અદ્ભુત દ્રશ્યો
દેશના ૮૦મા સ્વાતંત્ર્ય પર્વની ઉજવણીના મહોત્સવ અંતર્ગત સમગ્ર રાષ્ટ્રમાં “હર ઘર તિરંગા” અભિયાન અત્યંત ધામધૂમથી ઉજવવામાં આવી રહ્યું છે. આ ક્રાંતિકારી અને રાષ્ટ્રપ્રેમ પ્રેરક અભિયાનના ભાગરૂપે ચરોતરની પવિત્ર અને ઐતિહાસિક ધરતી એવા આણંદ જિલ્લામાં એક અભૂતપૂર્વ વાતાવરણ સર્જાયું હતું. આણંદ જિલ્લા વહીવટી તંત્ર અને કરમસદ-આણંદ મહાનગરપાલિકાના સંયુક્ત ઉપક્રમે એક અત્યંત ભવ્ય, દિવ્ય અને અવિસ્મરણીય તિરંગા યાત્રાનું આયોજન કરવામાં આવ્યું હતું.
આ ભવ્ય તિરંગા યાત્રામાં આણંદ, કરમસદ અને વલ્લભ વિદ્યાનગરના ખૂણે-ખૂણેથી ૧૦ હજારથી પણ વધુ દેશપ્રેમી નાગરિકો, યુવાનો, બહેનો, શાળાઓ અને કોલેજના વિદ્યાર્થીઓ હાથમાં આદરપૂર્વક રાષ્ટ્રધ્વજ લઈને ઉત્સાહભેર જોડાયા હતા. વિદ્યાનગર રોડ પર ઉમટેલી જનમેદનીના વિરાટ ઉત્સાહ અને દેશભક્તિના નારાઓથી સમગ્ર આણંદ શહેર તિરંગામય બની ગયું હતું.
ઐતિહાસિક શાસ્ત્રી મેદાનથી લીલી ઝંડી આપી પ્રસ્થાન કરાવતા મહાનુભાવો
આ ભવ્ય તિરંગા યાત્રાનું પ્રસ્થાન વલ્લભ વિદ્યાનગરના ઐતિહાસિક શાસ્ત્રી મેદાન ખાતેથી કરવામાં આવ્યું હતું. વિદ્યાનગરીના શૈક્ષણિક અને સાંસ્કૃતિક વારસાને અનુરૂપ શાસ્ત્રી મેદાન ખાતે સવારથી જ હજારોની સંખ્યામાં નગરજનો અને યુવાનો હાથમાં ત્રિરંગો લઈને એકત્રિત થઈ ગયા હતા.
આ પ્રસંગે ગુજરાતના નાયબ મુખ્યમંત્રી હર્ષભાઈ સંઘવી સાથે મંત્રી સર્વ રમણભાઈ સોલંકી, કમલેશભાઈ પટેલ, સંજય સિંહ મહિડા, સાંસદ મિતેશભાઈ પટેલ, ધારાસભ્ય સર્વ યોગેશભાઈ પટેલ, ચિરાગભાઈ પટેલ, વિપુલભાઈ પટેલ, હર્ષદભાઈ પરમાર તેમજ અગ્રણી સંજયભાઈ પટેલ સહિતના નેતાઓએ સંયુક્ત રીતે લીલી ઝંડી બતાવીને આ ભવ્ય યાત્રાનું પ્રસ્થાન કરાવ્યું હતું.
લીલી ઝંડી બતાવવાની સાથે જ સમગ્ર મેદાન “ભારત માતા કી જય” અને “વંદે માતરમ્”ના ગગનભેદી નારાઓથી ગુંજી ઊઠ્યું હતું.
નાયબ મુખ્યમંત્રી હર્ષ સંઘવીનો સંદેશ અને નગરજનોનું બહુમાન
તિરંગા યાત્રાના શુભારંભ પ્રસંગે રાજ્યના નાયબ મુખ્યમંત્રી હર્ષ સંઘવીએ આણંદના દેશપ્રેમી નાગરિકોના અભૂતપૂર્વ ઉત્સાહને દિલથી બિરદાવ્યો હતો. તેમણે જણાવ્યું હતું કે, આણંદની આ ક્રાંતિકારી અને શિક્ષિત ધરતીએ આજે રાષ્ટ્રપ્રેમનો એક અનોખો દાખલો બેસાડ્યો છે.
હર્ષ સંઘવીએ જણાવ્યું કે, “હર ઘર તિરંગા” માત્ર એક સત્તાવાર કાર્યક્રમ નથી પરંતુ ભારત દેશના દરેક નાગરિકના હૃદયમાં રહેલી રાષ્ટ્રભક્તિને પ્રગટ કરવાનું એક પવિત્ર માધ્યમ છે. તેમણે આ રાષ્ટ્રીય મહાયજ્ઞમાં કોઈ પણ જાતના ભેદભાવ વગર, પદ-પ્રતિષ્ઠા ભૂલીને પદયાત્રા કરી સહભાગી બનવા બદલ આણંદ જિલ્લા વહીવટી તંત્ર, મહાનગરપાલિકા અને તમામ નગરજનોને હૃદયપૂર્વકના અભિનંદન અને શુભકામનાઓ પાઠવી હતી.
તિરંગા યાત્રાનો મુખ્ય રૂટ અને લોકઉત્સાહ
આ ભવ્ય તિરંગા યાત્રા વલ્લભ વિદ્યાનગરના શાસ્ત્રી મેદાન ખાતેથી શરૂ થઈને વિદ્યાનગરના શહીદ ચોક અને ત્યારબાદ પ્રખ્યાત ભાઈકાકા સ્ટેચ્યુ થઈને વિદ્યાનગર-આણંદ મુખ્ય રોડ ઉપરથી આગળ વધી હતી. સમગ્ર રૂટ દરમિયાન રસ્તાની બંને બાજુએ હજારો નાગરિકો, વેપારીઓ અને ઘરના મોભીઓએ ઊભા રહીને યાત્રા પર પુષ્પવર્ષા કરી હતી અને તિરંગો લહેરાવીને યાત્રાનું ઉષ્માભર્યું સ્વાગત કર્યું હતું.
આ યાત્રા વિદ્યાનગર રોડ પરથી પસાર થઈને આણંદના ટાઉનહોલ ખાતે પહોંચી હતી, જ્યાં તેનું ભવ્ય સમાપન કરવામાં આવ્યું હતું. સમગ્ર રૂટ દરમિયાન વાતાવરણ એટલું ભક્તિમય અને રાષ્ટ્રપ્રેમથી સભર હતું કે વિદ્યાનગર રોડ આખોય દેશભક્તિના અનન્ય રંગે રંગાઈ ગયો હતો.
સાંસ્કૃતિક નૃત્યો, વિશેષ વેશભૂષા અને અદ્ભુત સુશોભન
તિરંગા યાત્રાને વધુ આકર્ષક બનાવવા માટે શાળાઓ અને કોલેજના શિસ્તબદ્ધ વિદ્યાર્થીઓએ રાષ્ટ્રીય નેતાઓ, ક્રાંતિવીરો અને દેશભક્તોની વિશેષ વેશભૂષા ધારણ કરી હતી. કાર્યક્રમના પ્રારંભે વિદ્યાર્થીઓ દ્વારા દેશભક્તિના ગીતો પર અત્યંત સુંદર અને મનોહર નૃત્ય રજૂ કરવામાં આવ્યું હતું, જેણે ત્યાં ઉપસ્થિત સૌ કોઈના દિલ જીતી લીધા હતા.
આ ઉપરાંત, કરમસદ-આણંદ મહાનગરપાલિકા દ્વારા વિદ્યાનગર રોડની બંને બાજુ આવેલ તમામ નાની-મોટી ઇમારતો અને કોમર્શિયલ બિલ્ડીંગો ઉપર સન્માનપૂર્વક રાષ્ટ્રધ્વજ લગાવવામાં આવ્યા હતા. એટલું જ નહીં, રસ્તાની બંને બાજુના તમામ વીજળીના થાંભલાઓ (પોલ) પર રંગબેરંગી રોશનીની સિરીઝ અને વિશેષ સુશોભનની લાઇટો લગાવવામાં આવી હતી. રાત્રિના સમયે આ સુશોભન અને તિરંગાના પ્રકાશથી સમગ્ર આણંદ-વિદ્યાનગર રોડ એક નયનરમ્ય અને મંત્રમુગ્ધ કરી દે તેવા દ્રશ્યમાં ફેરવાઈ ગયો હતો.
વિવિધ સુરક્ષા દળો, એનસીસી કેડેટ્સ અને સંગઠનોની સક્રિય ભાગીદારી
આ યાત્રાની શિસ્ત અને ભવ્યતામાં વધારો કરવા માટે વિવિધ દળોએ વિશેષ યોગદાન આપ્યું હતું. યાત્રાની શરૂઆતમાં:
-
દેશભક્તિની ધૂન વગાડતું સુસજ્જ પોલીસ બેન્ડ,
-
કદમથી કદમ મિલાવતા ઘોડેસવાર પોલીસ અને તિરંગા સાથે બાઈક સવાર પોલીસ જવાનો,
-
રાષ્ટ્રધ્વજ સાથે શિસ્તબદ્ધ માર્ચ કરતા એનસીસી (NCC) બોયઝ અને ગર્લ્સ બટાલિયનના કેડેટ્સ,
-
દેશનું ગૌરવ વધારતા રમતવીરો અને યુવાનો,
-
સેવાભાવથી જોડાયેલા હોમગાર્ડ, ટીઆરબી (TRB) જવાનો, ગ્રાહક રક્ષક દળ (GRD) અને મહિલા પોલીસ કોન્સ્ટેબલો.
આ તમામ દળોએ યુનિફોર્મમાં શિસ્તબદ્ધ રીતે પદયાત્રા કરી યાત્રાને એક આર્મી પરેડ જેવો ગૌરવવંતો લુક આપ્યો હતો.
પદ અને પ્રતિષ્ઠા ભૂલીને એક સામાન્ય નાગરિક તરીકે સહભાગી થતા અધિકારીઓ
આ તિરંગા યાત્રાનું સૌથી પ્રેરણાદાયી અને સુંદર પાસું એ હતું કે રાજ્યના નાયબ મુખ્યમંત્રી, મંત્રીઓ, ધારાસભ્યો, સાંસદઓ તેમજ જિલ્લાના તમામ ઉચ્ચ સનદી અધિકારીઓએ પોતાના હોદ્દા કે પદ-પ્રતિષ્ઠા ભૂલીને એક સામાન્ય દેશપ્રેમી ભારતીય નાગરિક તરીકે હાથમાં તિરંગો પકડીને કિલોમીટરો સુધી પદયાત્રા કરી હતી.
આ ભવ્ય યાત્રામાં કરમસદ-આણંદ મહાનગરપાલિકાના મેયર દીપિકાબેન પટેલ, ડેપ્યુટી મેયર કમલેશભાઈ ડાભી, સ્ટેન્ડિંગ કમિટીના ચેરમેન મયુરભાઈ સુથાર, જિલ્લા કલેક્ટર પ્રવીણ ચૌધરી, મ્યુનિસિપલ કમિશનર આર. એન. ડોડીયા, જિલ્લા વિકાસ અધિકારી સુ દેવાહુતી, પોલીસ અધિક્ષક ગૌરવ જસાણી, નિવાસી અધિક કલેકટર રાહુલ ગમારા, સરદાર પટેલ યુનિવર્સિટીના કુલપતિ નિરંજનભાઇ પટેલ, પ્રાંત અધિકારી સન્ની પટેલ, નાયબ મ્યુનિસિપલ કમિશ્નરઓ એસ.કિ. ગરવાલ તથા સંગાડા અને મામલતદાર સહિતના તમામ વહીવટી અધિકારીઓ અને કર્મચારીઓ એકસાથે કદમ મિલાવીને ચાલ્યા હતા.
