પાકિસ્તાનને વેસ્ટ ઈન્ડિઝ સામે શરમજનક હાર: બાબર આઝમની કેપ્ટનશીપમાં પણ પ્રદર્શન સુધર્યું નહીં
ક્રિકેટ જગતમાં પાકિસ્તાનની મુશ્કેલીઓ ઓછી થવાનું નામ નથી લઈ રહી. બાબર આઝમે ફરી એકવાર ટેસ્ટ ટીમની કેપ્ટનશીપ સંભાળી છે, પરંતુ ટીમનું પ્રદર્શન અગાઉની જેમ જ નિરાશાજનક રહ્યું છે. વેસ્ટ ઈન્ડિઝના પ્રવાસ પર ગયેલી પાકિસ્તાની ટીમને પ્રથમ ટેસ્ટ મેચમાં જ 90 રનથી કારમી હારનો સામનો કરવો પડ્યો છે. આ હાર સાથે પાકિસ્તાને વિદેશી ધરતી પર પોતાની હારનો સિલસિલો પણ લંબાવ્યો છે, જેણે ચાહકો અને ક્રિકેટ વિશેષજ્ઞોને ચિંતામાં મૂકી દીધા છે.
તારોબામાં પાકિસ્તાનની બેટિંગ ધારાશાયી
વેસ્ટ ઈન્ડિઝના તારોબા સ્થિત પ્રખ્યાત બ્રાયન લારા સ્ટેડિયમ ખાતે રમાયેલી આ બે મેચની શ્રેણીની પ્રથમ ટેસ્ટ મેચમાં વેસ્ટ ઈન્ડિઝે શાનદાર પ્રદર્શન કર્યું હતું. મેચની ચોથી અને અંતિમ ઇનિંગમાં પાકિસ્તાન સામે જીત માટે 211 રનનો લક્ષ્યાંક હતો. ક્રિકેટના આધુનિક ધોરણો અને આજના બેટિંગ પીચોને જોતા આ લક્ષ્ય બહુ મોટું નહોતું, પરંતુ પાકિસ્તાની બેટ્સમેનોનું પ્રદર્શન એટલું કંગાળ રહ્યું કે આખી ટીમ માત્ર 120 રનમાં જ સમેટાઈ ગઈ.
વેસ્ટ ઈન્ડિઝના યુવા અને ખતરનાક ઝડપી બોલર જેડેન સીલ્સે પાકિસ્તાની બેટિંગ લાઇન-અપની કમર તોડી નાખી હતી. સીલ્સે ઘાતક બોલિંગ કરતા માત્ર 14.2 ઓવરમાં માત્ર 20 રન આપીને 5 મહત્વપૂર્ણ વિકેટ ઝડપી હતી. પાકિસ્તાનનો કોઈ પણ બેટ્સમેન વેસ્ટ ઈન્ડિઝના ઝડપી આક્રમણ સામે ટકી શક્યો નહીં, જેના કારણે ટીમને શરમજનક પરાજય સહન કરવો પડ્યો. આ જીત સાથે વેસ્ટ ઈન્ડિઝે બે મેચની શ્રેણીમાં 1-0ની મહત્વપૂર્ણ લીડ મેળવી લીધી છે.
વિદેશી ધરતી પર સતત આઠમો પરાજય
પાકિસ્તાન ક્રિકેટ બોર્ડ (PCB) દ્વારા બાબર આઝમને ફરીથી કેપ્ટન બનાવવાનો મુખ્ય ઉદ્દેશ્ય ટીમની કથળતી સ્થિતિ સુધારવાનો હતો. ખાસ કરીને વિદેશી ધરતી પર પાકિસ્તાનનું ટેસ્ટ ક્રિકેટમાં પ્રદર્શન અત્યંત નબળું રહ્યું છે. જોકે, બાબરના પરત ફર્યા છતાં પરિસ્થિતિમાં કોઈ જ ફરક પડ્યો નથી.
આંકડાઓ પર નજર કરીએ તો, પાકિસ્તાને છેલ્લે જુલાઈ 2023માં શ્રીલંકાના પ્રવાસ દરમિયાન વિદેશમાં કોઈ ટેસ્ટ મેચ જીતી હતી. ત્યારથી લઈને અત્યાર સુધી પાકિસ્તાન વિદેશમાં સતત આઠ ટેસ્ટ મેચ હારી ચૂક્યું છે. પાકિસ્તાનના ટેસ્ટ ક્રિકેટ ઇતિહાસમાં વિદેશી ધરતી પર આ સૌથી લાંબો પરાજયનો સિલસિલો છે. બીજી તરફ, વેસ્ટ ઈન્ડિઝ માટે આ વિજય ભારે રાહત લઈને આવ્યો છે, કારણ કે તેમની છેલ્લી 11 ટેસ્ટ મેચોમાં આ માત્ર તેમની બીજી જ જીત છે.
ટેસ્ટ ક્રિકેટના ઇતિહાસમાં અનોખો અને દુર્લભ રેકોર્ડ
આ મેચ માત્ર હાર-જીત પૂરતી સીમિત નહોતી, પરંતુ તેણે ટેસ્ટ ક્રિકેટના ઇતિહાસમાં એક એવો અનોખો રેકોર્ડ નોંધાવ્યો જે અગાઉ ભાગ્યે જ જોવા મળ્યો છે. વેસ્ટ ઈન્ડિઝ અને પાકિસ્તાન વચ્ચેની આ મેચમાં બંને ટીમોના ફાસ્ટ બોલરોએ મેચ પર સંપૂર્ણ વર્ચસ્વ જમાવ્યું હતું.
ટેસ્ટ ક્રિકેટના સમગ્ર ઇતિહાસમાં આ માત્ર છઠ્ઠી એવી ઘટના બની છે જ્યારે મેચની બધી જ 40 વિકેટ ઝડપી બોલરો દ્વારા લેવામાં આવી હોય. આ ઉપરાંત, ટેસ્ટ ક્રિકેટના ઇતિહાસમાં આ પહેલીવાર બન્યું છે જ્યારે વેસ્ટ ઈન્ડિઝના ઝડપી બોલરોએ પાકિસ્તાન સામેની કોઈ ટેસ્ટ મેચમાં તમામ 20 વિકેટ ઝડપી હોય.
ટેસ્ટ મેચ જેમાં ઝડપી બોલરોએ લીધી તમામ 40 વિકેટ:
ઇંગ્લેન્ડ વિરુદ્ધ વેસ્ટ ઇન્ડીઝ – ધ ઓવલ, 1984
પાકિસ્તાન વિરુદ્ધ ઝિમ્બાબ્વે – રાવલપિંડી, 1993
ઇંગ્લેન્ડ વિરુદ્ધ દક્ષિણ આફ્રિકા – લીડ્સ, 1998
દક્ષિણ આફ્રિકા વિરુદ્ધ ભારત – જોહાનિસબર્ગ, 2018
ઇંગ્લેન્ડ વિરુદ્ધ ન્યુઝીલેન્ડ – લોર્ડ્સ, 2026
વેસ્ટ ઇન્ડીઝ વિરુદ્ધ પાકિસ્તાન – તારોઉબા, 2026
