કોણ છે 18 વર્ષીય મોહિત ઉલ્વા? પાકિસ્તાન સામે ફાઇનલના છેલ્લા બોલે ચોગ્ગો ફટકારી ભારતને અપાવી ઐતિહાસિક જીત
ભારતીય અંડર-19 ક્રિકેટ ટીમે પાકિસ્તાનને હરાવીને એશિયા કપ 2026નો ખિતાબ પોતાના નામે કર્યો છે. આ રોમાંચક ફાઇનલમાં એક એવો યુવા ખેલાડી ચમક્યો, જેણે પોતાની બેટિંગથી મેચનું આખું પાસું પલટી નાખ્યું. આ ખેલાડી બીજું કોઈ નહીં, પરંતુ 18 વર્ષીય મોહિત ઉલ્વા છે. મોહિતે માત્ર 26 બોલમાં અણનમ 49 રનની તોફાની ઇનિંગ રમીને ભારતને જીતની મંઝિલ સુધી પહોંચાડ્યું હતું. ખાસ વાત એ રહી કે તેણે મેચના છેલ્લા બોલ પર ચોગ્ગો ફટકારીને ટીમ ઈન્ડિયાની જીત નિશ્ચિત કરી હતી. આ શાનદાર પ્રદર્શન બદલ તેને પ્લેયર ઓફ ધ મેચનો પુરસ્કાર પણ આપવામાં આવ્યો હતો.
પાકિસ્તાન સામેની આ ફાઇનલમાં ભારતીય ટીમને 338 રનનો વિશાળ લક્ષ્યાંક મળ્યો હતો. એક સમયે ટીમ મુશ્કેલીમાં મુકાઈ ગઈ હતી, પરંતુ મોહિત ઉલ્વાએ દબાણમાં પણ હિંમત હાર્યા વગર આક્રમક બેટિંગ કરી હતી. તેની આ ઇનિંગે તેને રાતોરાત ક્રિકેટ ચાહકોમાં ચર્ચાનો વિષય બનાવી દીધો છે. હવે દરેક ક્રિકેટપ્રેમી જાણવા માગે છે કે આખરે આ 18 વર્ષીય ખેલાડી કોણ છે અને તેણે અહીં સુધી પહોંચવા માટે કેટલી મહેનત કરી છે.
કોણ છે મોહિત ઉલ્વા? સૌરાષ્ટ્રથી શરૂ થઈ ક્રિકેટની સફર
18 વર્ષીય મોહિત ઉલ્વા જમણા હાથનો બેટ્સમેન છે અને જમણા હાથે મીડિયમ પેસ બોલિંગ પણ કરે છે. તેણે સૌરાષ્ટ્રની જુનિયર ક્રિકેટ ટીમો તરફથી રમતાં પોતાની પ્રતિભા સાબિત કરી હતી. સ્થાનિક ક્રિકેટમાં સતત સારા પ્રદર્શનના આધારે તેને ભારતીય અંડર-19 ટીમમાં સ્થાન મળ્યું હતું.
મોહિતની ક્રિકેટ સફર પણ સામાન્ય રીતે શરૂ થઈ હતી. અહેવાલો અનુસાર, તેણે પોતાના ગામમાં ટેનિસ બોલથી ક્રિકેટ રમવાનું શરૂ કર્યું હતું. તેના પિતા રેલવે પ્રોટેક્શન ફોર્સ (RPF)માં ફરજ બજાવે છે. તેમણે શરૂઆતમાં જ પોતાના પુત્રની ક્રિકેટ પ્રત્યેની રુચિ અને પ્રતિભા ઓળખી લીધી હતી. મોહિતને વધુ સારી તાલીમ મળે તે માટે તેના પિતાએ તેને પ્રોફેશનલ ક્રિકેટ એકેડેમીમાં મોકલવા માટે પ્રોત્સાહિત કર્યો હતો.
ત્યારબાદ મોહિતે જામનગરની જાણીતી ‘ક્રિકેટ બંગલા’ એકેડેમીમાં તાલીમ લેવાનું શરૂ કર્યું હતું. અહીં તેને કોચ મહેન્દ્રસિંહ ચૌહાણનું માર્ગદર્શન મળ્યું હતું. મહેન્દ્રસિંહ ચૌહાણે ભારતીય ક્રિકેટના સ્ટાર ઓલરાઉન્ડર રવિન્દ્ર જાડેજાને પણ માર્ગદર્શન આપ્યું હોવાનું જણાવાય છે. આ એકેડેમીમાં મોહિતે પોતાની બેટિંગ અને બોલિંગ બંનેમાં સુધારો કર્યો હતો. સતત મહેનત અને શિસ્તના કારણે તે જુનિયર ક્રિકેટમાં પોતાની અલગ ઓળખ બનાવવામાં સફળ રહ્યો હતો.
ઓફ સ્પિનરથી મીડિયમ પેસર બનવાની રસપ્રદ સફર
મોહિત ઉલ્વાની ક્રિકેટ કારકિર્દીનો એક રસપ્રદ કિસ્સો તેની બોલિંગ સાથે જોડાયેલો છે. આજે તે જમણા હાથનો મીડિયમ પેસ બોલર છે, પરંતુ તેની શરૂઆત ફાસ્ટ બોલર તરીકે થઈ નહોતી. જ્યારે તે પહેલીવાર ક્રિકેટ એકેડેમીમાં આવ્યો હતો, ત્યારે તે ઓફ સ્પિન બોલિંગ કરતો હતો.
જોકે, કોચ મહેન્દ્રસિંહ ચૌહાણે મોહિતની શારીરિક ક્ષમતા અને બાંધો જોઈને તેને ફાસ્ટ બોલિંગ તરફ ધ્યાન આપવા સલાહ આપી હતી. મોહિતે કોચની સલાહ માનીને મીડિયમ પેસ બોલિંગની પ્રેક્ટિસ શરૂ કરી હતી. આ નિર્ણય તેની ક્રિકેટ કારકિર્દી માટે મહત્વપૂર્ણ સાબિત થયો હતો.ત્યારબાદ તેણે સૌરાષ્ટ્રની જુનિયર ટીમો માટે સારો દેખાવ કર્યો અને ધીમે ધીમે પોતાની બેટિંગ તથા બોલિંગ બંનેથી પસંદગીકારોનું ધ્યાન ખેંચ્યું. તેની ઓલરાઉન્ડ ક્ષમતાએ તેને અન્ય ખેલાડીઓથી અલગ ઓળખ અપાવી હતી.
ઓસ્ટ્રેલિયા સામેના પ્રદર્શનથી અંડર-19 ટીમમાં મળી જગ્યા
મોહિત ઉલ્વાની ભારતીય અંડર-19 ટીમમાં પસંદગી પાછળ ઓસ્ટ્રેલિયા અંડર-19 ટીમ સામેનું તેનું પ્રદર્શન પણ મહત્વનું રહ્યું હતું. યુવા સ્તરે રમાયેલી ટેસ્ટ અને વન-ડે શ્રેણીમાં તેણે પોતાની પ્રતિભાનો પરિચય આપ્યો હતો.
એક યુથ ટેસ્ટ મેચમાં મોહિતે ત્રણ વિકેટ ઝડપી હતી અને બેટિંગમાં અણનમ અડધી સદી પણ ફટકારી હતી. આ ઉપરાંત, ઓસ્ટ્રેલિયા સામેની ત્રણ મેચની યુથ વન-ડે શ્રેણીમાં તેણે કુલ પાંચ વિકેટ મેળવી હતી. આ પ્રદર્શનથી તેની ઓલરાઉન્ડર તરીકેની ક્ષમતા સામે આવી હતી અને અંડર-19 એશિયા કપ માટેની ટીમમાં તેનું સ્થાન મજબૂત બન્યું હતું.
