BCCI દ્વારા ભારતની 2026-27 હોમ સીઝનની જાહેરાત; બોર્ડર-ગાવસ્કર ટ્રોફીના વેન્યુ નક્કી
ભારતીય ક્રિકેટ કંટ્રોલ બોર્ડ (BCCI) એ ટીમ ઈન્ડિયાના 2026-27ના આંતરરાષ્ટ્રીય હોમ સીઝનનું સંપૂર્ણ ટાઈમ ટેબલ જાહેર કરી દીધું છે. આ વર્ષે ભારતીય ચાહકોને ઘરઆંગણે ક્રિકેટનો રોમાંચ ભરપૂર માણવા મળશે, કારણ કે ભારતીય પુરુષ ટીમ કુલ 17 અલગ-અલગ શહેરોમાં 22 આંતરરાષ્ટ્રીય મેચો રમવાની છે. આ સીઝનની શરૂઆત સપ્ટેમ્બરમાં વેસ્ટ ઈન્ડિઝ સામેની લિમિટેડ ઓવરની સિરીઝથી થશે.
વેસ્ટ ઈન્ડિઝ અને શ્રીલંકા સામે વ્હાઈટ બોલ ક્રિકેટનો જંગ
સીઝનનો પ્રારંભ સપ્ટેમ્બર મહિનામાં વેસ્ટ ઈન્ડિઝના પ્રવાસથી થશે, જેમાં ત્રણ વનડે અને પાંચ T20 મેચો રમાશે. વનડે મેચો તિરુવનંતપુરમ, ગુવાહાટી અને મુલ્લાંપુરમાં રમાશે, જ્યારે T20 શ્રેણી લખનૌ, રાંચી, ઈન્દોર, હૈદરાબાદ અને બેંગલુરુમાં યોજાશે.
ત્યારબાદ ડિસેમ્બર 2026માં શ્રીલંકાની ટીમ ભારતની મુલાકાતે આવશે. શ્રીલંકા સામે ત્રણ વનડે અને ત્રણ T20 મેચોની શ્રેણી રમાશે. વનડે મેચો દિલ્હી, બેંગલુરુ અને અમદાવાદમાં યોજાશે, જ્યારે ટૂંકી ફોર્મેટની T20 મેચો રાજકોટ, કટક અને પુણેમાં રમાશે. વર્ષ 2027ની શરૂઆતમાં જાન્યુઆરીમાં ઝિમ્બાબ્વેની ટીમ પણ ભારત આવશે, જ્યાં તેઓ કોલકાતા, હૈદરાબાદ અને મુંબઈમાં ત્રણ વનડે મેચ રમશે.
સૌથી વધુ રાહ જોવાતી બોર્ડર-ગાવસ્કર ટ્રોફી
આ સીઝનનું મુખ્ય આકર્ષણ ઓસ્ટ્રેલિયા સામેની પાંચ મેચોની ટેસ્ટ શ્રેણી એટલે કે ‘બોર્ડર-ગાવસ્કર ટ્રોફી’ હશે. આ હાઈ-પ્રોફાઈલ શ્રેણી 21 જાન્યુઆરીથી શરૂ થઈને 3 માર્ચ સુધી ચાલશે. ટેસ્ટ મેચો માટે નાગપુર, ચેન્નાઈ, ગુવાહાટી, રાંચી અને અમદાવાદની પસંદગી કરવામાં આવી છે. નોંધનીય છે કે, 2001ની ઐતિહાસિક ટેસ્ટનું સાક્ષી બનેલું કોલકાતાનું ઈડન ગાર્ડન્સ ફરી એકવાર ઓસ્ટ્રેલિયા સામેની ટેસ્ટની યજમાનીથી વંચિત રહ્યું છે.
— BCCI (@BCCI) March 26, 2026
ભારતની 2026-27 હોમ સીઝનનું સંપૂર્ણ શિડ્યુલ
| પ્રવાસ | તારીખ | મેચ વિગતો | સ્થળ |
| વેસ્ટ ઈન્ડિઝ | 27 સપ્ટેમ્બર – 17 ઓક્ટોબર | 3 ODI, 5 T20I | વિવિધ (તિરુવનંતપુરમ થી બેંગલુરુ) |
| શ્રીલંકા | 13 ડિસેમ્બર – 27 ડિસેમ્બર | 3 ODI, 3 T20I | દિલ્હી, અમદાવાદ, રાજકોટ, પુણે વગેરે |
| ઝિમ્બાબ્વે | 3 જાન્યુઆરી – 9 જાન્યુઆરી | 3 ODI | કોલકાતા, હૈદરાબાદ, મુંબઈ |
| ઓસ્ટ્રેલિયા | 21 જાન્યુઆરી – 3 માર્ચ | 5 ટેસ્ટ મેચ | નાગપુર, ચેન્નાઈ, ગુવાહાટી, રાંચી, અમદાવાદ |
