રશિયા-યુક્રેન યુદ્ધમાં હવે ચીનની એન્ટ્રી! રશિયન સેનામાં જોડાશે ચીની નાગરિકો, જાણો બેજિંગે શું આપી સૂચના

રશિયાની સેનામાં હવે ચીની નાગરિકો પણ જોડાશે? બેઇજિંગે પોતાના નાગરિકો માટે જાહેર કરી એડવાઇઝરી

રશિયામાં વસતા વિદેશી નાગરિકો, ખાસ કરીને ચીની નાગરિકો માટે એક ચિંતાજનક સમાચાર સામે આવ્યા છે. રશિયાના નવા કાયદા મુજબ, હવે જો કોઈ વિદેશી પુરુષ રશિયામાં લાંબા ગાળાના રહેઠાણ (Permanent Residency) માટે અરજી કરશે, તો તેણે ફરજિયાતપણે એક વર્ષ સુધી રશિયન સેનામાં સેવા આપવી પડી શકે છે. વ્લાદિવોસ્તોક સ્થિત ચીની દૂતાવાસે આ અંગે નોટિસ જાહેર કરીને પોતાના નાગરિકોને સાવધ રહેવાની સલાહ આપી છે.

શું છે રશિયાનો નવો લશ્કરી નિયમ?

યુક્રેન સાથે ચાલી રહેલા લાંબા યુદ્ધને કારણે રશિયા અત્યારે સૈનિકોની અછતનો સામનો કરી રહ્યું છે. સૈન્ય બળ વધારવા માટે રાષ્ટ્રપતિ વ્લાદિમીર પુતિને એક નવા વટહુકમ પર હસ્તાક્ષર કર્યા છે. આ નિયમ મુજબ, 18 થી 65 વર્ષની વયના કોઈપણ વિદેશી પુરુષ જે રશિયાની નાગરિકતા અથવા કાયમી નિવાસ માટે અરજી કરે છે, તેમણે રશિયન સેના સાથે ઓછામાં ઓછા એક વર્ષનો સર્વિસ કોન્ટ્રાક્ટ સાઈન કરવો પડશે. જોકે, જેમણે અગાઉ સૈન્ય સેવા આપી છે અથવા જેઓ મેડિકલ ગ્રાઉન્ડ પર અસમર્થ છે, તેમને યોગ્ય દસ્તાવેજો બતાવ્યા બાદ મુક્તિ મળી શકે છે.

ચીનનું વલણ: નાગરિકોને સાવચેતી રાખવા અપીલ

આ નવા નિયમને પગલે ચીન સરકાર હરકતમાં આવી છે. ચીની વાણિજ્ય દૂતાવાસે સોશિયલ મીડિયા પર પોસ્ટ કરીને નાગરિકોને જણાવ્યું છે કે તેઓ કોઈપણ દસ્તાવેજ પર સહી કરતા પહેલા વિચારે, જેથી તેમનો કાયદેસરનો દરજ્જો જોખમમાં ન મુકાય. ચીનના વિદેશ મંત્રાલયે અગાઉ પણ સ્પષ્ટ કર્યું હતું કે તેમના નાગરિકોએ યુક્રેન યુદ્ધમાં કોઈ પણ પક્ષ તરફથી લડવું જોઈએ નહીં. ચીનના પ્રખ્યાત વિશ્લેષકોનું માનવું છે કે રશિયા અને યુક્રેન બંને માનવશક્તિની અછત અનુભવી રહ્યા છે, તેથી ચીની નાગરિકોએ અજાણતા આ ભરતીમાં ફસાવાથી બચવું જોઈએ.

ટ્રમ્પનો મોટો ખુલાસો: ઈરાન સાથેની દુશ્મની વચ્ચે અમેરિકાએ નક્કી કરી દીધી લક્ષ્મણ રેખા

પાકિસ્તાન સાથેની મિત્રતા પર તુર્કિએનું ખુલ્લું સમર્થન: ભારત માટે શું છે સંદેશ?

યુક્રેન યુદ્ધ અને વિદેશી લડવૈયાઓ

રશિયા 2022 થી સતત વિદેશી લડવૈયાઓને પોતાની સેનામાં સામેલ કરવાનો પ્રયાસ કરી રહ્યું છે. અહેવાલો મુજબ, રશિયાએ 2026 સુધીમાં વધુ 2.61 લાખ નવા સૈનિકોની ભરતી કરવાનું લક્ષ્ય રાખ્યું છે. બીજી તરફ, યુક્રેને દાવો કર્યો છે કે તેણે યુદ્ધના મેદાનમાં રશિયા તરફથી લડતા બે ચીની નાગરિકોને પકડ્યા છે. આ આંકડો 150 થી વધુ હોવાની પણ આશંકા સેવાઈ રહી છે.

ભારત અને અન્ય દેશોના નાગરિકો પર અસર

આ નિયમ માત્ર ચીન જ નહીં પણ રશિયામાં રહેતા અન્ય દેશોના નાગરિકો પર પણ લાગુ થઈ શકે છે (બેલારુસ સિવાય). ખાસ કરીને જે લોકો કામકાજ કે અભ્યાસ અર્થે રશિયામાં સ્થાયી થવા માંગે છે, તેમના માટે હવે સૈન્ય સેવા એક અનિવાર્ય શરત બની ગઈ છે. આનાથી વિદેશી નાગરિકોમાં રશિયા છોડવાની અથવા નવી અરજીઓ ન કરવાની ચિંતા વધી ગઈ છે.