ટ્રમ્પની ચીન મુલાકાત પહેલા જ જંગ જામ્યો: ચીને દોરી ‘લક્ષ્મણ રેખા’, આ 4 મુદ્દાઓ પર ચર્ચાની મનાઈ
ચીની રાષ્ટ્રપતિ શી ચિનફિંગના આમંત્રણ પર અમેરિકી રાષ્ટ્રપતિ ડોનાલ્ડ ટ્રમ્પ 13 થી 15 મે સુધી ચીનની સત્તાવાર મુલાકાતે છે. જોકે, ટ્રમ્પ બેઇજિંગ પહોંચે તે પહેલા જ અમેરિકામાં સ્થિત ચીની દૂતાવાસે સોશિયલ મીડિયા પર ‘ફોર રેડ લાઈન્સ’ (ચાર લાલ રેખાઓ) જાહેર કરીને અમેરિકાને ચેતવણી આપી દીધી છે. ચીને સ્પષ્ટ કર્યું છે કે જો સંબંધોમાં સ્થિરતા જોઈતી હોય, તો આ ચાર મુદ્દાઓને પડકારવા નહીં.
શું છે ચીનની આ ‘ચાર રેડ લાઈન્સ’?
ચીની દૂતાવાસે સોશિયલ મીડિયા પર એક ગ્રાફિક શેર કરીને જણાવ્યું છે કે નીચે મુજબના મુદ્દાઓ પર કોઈ પણ પ્રકારનું સમાધાન કરવામાં આવશે નહીં:
તાઈવાનનો મુદ્દો: ચીન તાઈવાનને પોતાનો આંતરિક ભાગ માને છે અને આ બાબતે અમેરિકાના હસ્તક્ષેપને તે જરાય સહન નહીં કરે.
લોકશાહી અને માનવાધિકાર: પશ્ચિમી દેશો દ્વારા માનવાધિકારના નામે ચીનની ટીકા કરવામાં આવે છે, જેને ચીને પોતાની લાલ રેખા ગણાવી છે.
રાજકીય વ્યવસ્થા: ચીનની કોમ્યુનિસ્ટ પાર્ટીનું શાસન અને ત્યાંની સમાજવાદી વ્યવસ્થાને બદલવાનો કોઈ પણ પ્રયાસ ચીન સ્વીકારશે નહીં.
વિકાસનો અધિકાર: ટેકનોલોજી અને આર્થિક ક્ષેત્રે ચીનની પ્રગતિને અટકાવવા માટે જે નિયંત્રણો લાદવામાં આવે છે, તેનો ચીને સખત વિરોધ કર્યો છે.
તાઈવાનને હથિયારો વેચવા મુદ્દે તણાવ
ટ્રમ્પની મુલાકાત પહેલા ચીને તાઈવાનને હથિયારો વેચવા બાબતે અમેરિકાની કડક શબ્દોમાં આલોચના કરી છે. ચીનના તાઈવાન બાબતોના કાર્યાલયના પ્રવક્તા ઝાંગ હાને સ્પષ્ટ કહ્યું કે, “તાઈવાન અમારો આંતરિક મુદ્દો છે. અમે અમેરિકા દ્વારા તાઈવાનને હથિયારો વેચવાના અને સૈન્ય સંબંધો બાંધવાના સખત વિરોધી છીએ.”
નોંધનીય છે કે ડિસેમ્બરમાં ટ્રમ્પ વહીવટીતંત્રે તાઈવાન માટે 11 અબજ ડોલરના હથિયાર પેકેજની જાહેરાત કરી હતી, જે અત્યાર સુધીનું સૌથી મોટું પેકેજ છે. આ બાબત ચીન માટે મોટી ચિંતાનો વિષય છે.
The four red lines in #China–#US relations must not be challenged. #ChinaUSRelations #ChinaDiplomacy pic.twitter.com/4kmNeEWLGH
— Chinese Embassy in US (@ChineseEmbinUS) May 12, 2026
અન્ય આંતરિક મામલાઓ અને આર્થિક પ્રતિબંધો
ચીન પશ્ચિમી દેશો દ્વારા લાદવામાં આવેલા પ્રતિબંધો સામે પણ વળતી વ્યૂહરચના બનાવી રહ્યું છે. ઈરાની ક્રૂડ ઓઈલની આયાત પર અમેરિકાએ જે દંડની જોગવાઈ કરી છે, તેને નજરઅંદાજ કરવા માટે ચીને પોતાના ‘બ્લોકિંગ રૂલ્સ’ સક્રિય કર્યા છે. આ સિવાય આર્ટિફિશિયલ ઇન્ટેલિજન્સ (AI) માં ચાલી રહેલી હરીફાઈ અને ટ્રેડ વોર પણ આ શિખર સંમેલનમાં ચર્ચાના કેન્દ્રમાં રહેશે તેવી ધારણા છે.
9 વર્ષ પછી ટ્રમ્પની ચીન મુલાકાત
ડોનાલ્ડ ટ્રમ્પ વર્ષ 2017 પછી પહેલીવાર ચીનની મુલાકાતે જઈ રહ્યા છે. આ બે દિવસીય યાત્રા દરમિયાન તેમના માનમાં સ્ટેટ ડિનર અને ટી-સેરેમની જેવા ભવ્ય કાર્યક્રમોનું આયોજન કરવામાં આવ્યું છે. જોકે, આ મુલાકાત એવા સમયે થઈ રહી છે જ્યારે ટ્રમ્પને ટેરિફ (શુલ્ક) બાબતે કોર્ટના નિર્ણયોથી ફટકો પડ્યો છે. નિષ્ણાતો માને છે કે હવે ટ્રમ્પનું ધ્યાન માત્ર બીન્સ, બીફ અને બોઇંગ જેટ્સ જેવા કેટલાક મોટા સોદાઓ કરવા પર જ મર્યાદિત રહી શકે છે.
