ચીની હથિયારો ફરી ‘ફ્લોપ’: કમ્બોડિયામાં ચીની રોકેટ સિસ્ટમ ફાટતા 8 સૈનિકોના મોત, ડ્રેગનની ટેકનોલોજી પર ઉઠ્યા સવાલો
ચીની હથિયારોની ગુણવત્તા પર ફરી એકવાર ગંભીર સવાલો ઉભા થયા છે. થાઈલેન્ડ અને કમ્બોડિયા વચ્ચે ચાલી રહેલા સરહદી સંઘર્ષ દરમિયાન ચીન નિર્મિત રોકેટ સિસ્ટમ અચાનક ફાટતા 8 કમ્બોડિયાઈ સૈનિકોના મોત થયા હોવાના અહેવાલ સામે આવ્યા છે. આ ઘટનાનો વીડિયો સોશિયલ મીડિયા પર વાયરલ થઈ રહ્યો છે, જે ચીની સૈન્ય ટેકનોલોજીની વિશ્વસનીયતા પર મોટું પ્રશ્નાર્થ ચિહ્ન મૂકે છે.
PHL-81 રોકેટ સિસ્ટમમાં વિસ્ફોટ
કમ્બોડિયાની સેના થાઈલેન્ડ સામે ચીન દ્વારા બનાવવામાં આવેલી PHL-81 પ્રકારની મલ્ટીપલ લોન્ચ રોકેટ સિસ્ટમ (MLRS) નો ઉપયોગ કરી રહી હતી. આ સિસ્ટમ 80ના દાયકાની સોવિયત સંઘની ‘BM-21 ગ્રેડ’ ની નકલ હોવાનું મનાય છે.
વાયરલ વીડિયોમાં જોઈ શકાય છે કે સૈનિકો જ્યારે રોકેટ ફાયર કરી રહ્યા હતા, ત્યારે શરૂઆતના થોડા રાઉન્ડ બાદ આખી સિસ્ટમમાં ભયાનક વિસ્ફોટ થયો હતો. આ અકસ્માતમાં આસપાસ ઉભેલા સૈનિકો ગંભીર રીતે દાઝી ગયા હતા અને 8 જવાનોએ જીવ ગુમાવ્યા હતા. નિષ્ણાતોના મતે, આ ઘટના ચીની હથિયારોમાં રહેલી ‘ડિઝાઇન ફ્લો’ (ખામી) અને નબળી ગુણવત્તાના દારૂગોળાનું પરિણામ હોઈ શકે છે.
પાકિસ્તાન અને લીબિયા વચ્ચેનો JF-17 સોદો
બીજી તરફ, પાકિસ્તાન પણ ચીની હથિયારોના વેચાણમાં મુશ્કેલીનો સામનો કરી રહ્યું છે. પાકિસ્તાની સેના પ્રમુખ આસિમ મુનીરે હાલમાં જ લીબિયાને JF-17 થન્ડર ફાઇટર જેટ વેચવા માટે મોટો દાવો કર્યો હતો. તેમણે કહ્યું હતું કે આ વિમાનોએ ‘ઓપરેશન સિંદૂર’ દરમિયાન ભારતના રાફેલ અને સુખોઈ જેવા અત્યાધુનિક વિમાનોને તોડી પાડ્યા હતા.
જોકે, હકીકત એ છે કે પાકિસ્તાન આ દાવાના સમર્થનમાં કોઈ પુરાવા કે વિમાનના કાટમાળની તસવીરો રજૂ કરી શક્યું નથી. ભારતની વાયુસેનાની તાકાત સામે ચીની ટેકનોલોજી પર આધારિત આ વિમાનો નબળા સાબિત થયા હોવાનું અનેક આંતરરાષ્ટ્રીય અહેવાલોમાં જણાવાયું છે.
ANOTHER FAILURE OF CHINESE TECH
Chinese MLRS explodes during firing in the Cambodia–Thailand war
Chinese technology 👀pic.twitter.com/nkYk823uIy
— Frontalforce 🇮🇳 (@FrontalForce) December 25, 2025
ભારતીય બ્રહ્મોસ સામે ચીની ડિફેન્સ સિસ્ટમ ફેલ
મે 2025 માં ભારત અને પાકિસ્તાન વચ્ચે થયેલા ‘ઓપરેશન સિંદૂર’ એ ચીની એર ડિફેન્સ સિસ્ટમની પણ પોલ ખોલી નાખી હતી. પાકિસ્તાને પોતાની સુરક્ષા માટે ચીનની HQ-9 અને LY-80 ડિફેન્સ સિસ્ટમ તૈનાત કરી હતી.
- ડિટેક્શનમાં નિષ્ફળતા: ભારતની સુપરસોનિક બ્રહ્મોસ (BrahMos) મિસાઇલ જ્યારે પાકિસ્તાની સીમામાં પ્રવેશી, ત્યારે ચીની રડાર સિસ્ટમ તેને ટ્રેક કરવામાં સંપૂર્ણ નિષ્ફળ રહી હતી.
- ટેકનિકલ મર્યાદા: ચીની ઉત્પાદકોએ પોતે સ્વીકાર્યું છે કે તેમની સિસ્ટમ બ્રહ્મોસ જેવી હાઈ-સ્પીડ અને લો-ફ્લાઈંગ મિસાઈલોને રોકવા માટે સક્ષમ નથી.
થાઈલેન્ડ-કમ્બોડિયા જંગમાં થયેલી આ હોનારત અને પાકિસ્તાનમાં મળેલી નિષ્ફળતા બાદ, વૈશ્વિક શસ્ત્ર બજારમાં ચીની હથિયારોની વિશ્વસનીયતા ઝડપથી ઘટી રહી છે. મ્યાનમાર અને આફ્રિકન દેશો બાદ હવે કમ્બોડિયા પણ ચીની બનાવટના ખામીયુક્ત હથિયારોનો ભોગ બન્યું છે.
