કિડની અને યુટીઆઈ (UTI) માં મકાઈના વાળનું પાણી કેટલું ફાયદાકારક? જાણો સાચું સત્ય
તાજેતરમાં યોગ અને વેલનેસ કોચ રાધેસાએ મકાઈના વાળ (જેને ‘કોર્ન સિલ્ક’ પણ કહેવામાં આવે છે) ના સ્વાસ્થ્ય લાભો વિશે ચર્ચા કરી છે. તેમણે કિડની અને યુરિનરી સિસ્ટમ માટે આના ફાયદા જણાવતા કહ્યું કે, આ કિડની, લિવર અને મૂત્રાશય માટે દવા સમાન છે. મકાઈ ખાધા પછી તેના વાળ ફેંકી દેવાને બદલે તેનો ઉપયોગ કરવા માટે તેમણે સોશિયલ મીડિયા પર એક રસપ્રદ વીડિયો પણ શેર કર્યો છે. તો ચાલો જાણીએ કે મકાઈના વાળ ખરેખર કિડનીના સ્વાસ્થ્ય માટે કેટલા ઉપયોગી છે અને વિજ્ઞાન આ વિશે શું કહે છે.
શું મકાઈના વાળ પેશાબનો પ્રવાહ વધારી શકે છે?
એક્સપર્ટ્સના મતે, મકાઈના સિલ્કમાં ડ્યુરેટિક (diuretic) ગુણો હોય છે, એટલે કે તે યુરિન આઉટપુટ (પેશાબનું પ્રમાણ) વધારી શકે છે. આ પ્રવાહી સંતુલન માટે મહત્વપૂર્ણ છે અને તે જ કારણ છે કે પરંપરાગત રીતે તેનો ઉપયોગ મૂત્ર માર્ગના સ્વાસ્થ્ય માટે થાય છે. આ સિવાય તેમાં કેટલાક એવા સંયોજનો હોય છે જે બ્લડ પ્રેશર ઘટાડવામાં મદદરૂપ સાબિત થઈ શકે છે. તેમાં એન્ટીઓક્સિડેન્ટ અને એન્ટી-ઇન્ફ્લેમેટરી ગુણો પણ હોય છે જે કિડનીના પેશીઓ માટે સારા છે.
પરંતુ તેનો અર્થ એ નથી કે મકાઈના વાળ કિડનીની બિમારીને મટાડી શકે છે. કિડનીના કાર્યને હળવા ડ્યુરેટિક દ્વારા ટેકો આપવો અને કિડનીની ગંભીર બિમારીને મટાડવી એ બંને સાવ અલગ બાબતો છે. આ દાવાને સાબિત કરતા કોઈ મોટા માનવ પરીક્ષણો હજુ સુધી ઉપલબ્ધ નથી.
શું કિડનીની પથરીમાં મકાઈના વાળનું પાણી મદદરૂપ છે?
ઘણા લોકો માને છે કે મકાઈના વાળ પથરી મટાડી શકે છે. નિષ્ણાતોના જણાવ્યા અનુસાર, પેશાબનો પ્રવાહ વધવાથી મૂત્રાશયમાં ખનિજો અને તત્વોનું પ્રમાણ ઘટે છે, જેનાથી નવી પથરી બનવાની શક્યતાઓ ઘટી શકે છે. આ બરાબર એવું જ છે જેમ પાણી પીવાથી પથરી અટકે છે.
વધુ પ્રવાહી લેવાથી પેશાબ પાતળો બને છે અને પથરી બનાવતા તત્વોનું પ્રમાણ ઘટે છે. મકાઈના વાળની ચા એ માત્ર પ્રવાહી પૂરું પાડવાનો એક સારો અને સ્વાદિષ્ટ રસ્તો છે, પણ તે પાણીનો વિકલ્પ નથી. જો કોઈ વ્યક્તિને પહેલેથી જ પથરી હોય, તો આ પાણી પીવાથી પથરી ગાયબ થઈ જશે એવું માનવું ભૂલભરેલું છે. પથરીના કદ અને સ્થાનના આધારે તબીબી સારવાર જ લેવી પડે છે.
વારંવાર થતા યુટીઆઈ (UTI) વિશે શું?
મકાઈના વાળના ડ્યુરેટિક ગુણધર્મોને કારણે તે યુરિનરી ટ્રેક્ટ ઇન્ફેક્શન (UTI) નું જોખમ ઘટાડવામાં મદદ કરી શકે છે, પરંતુ જો કોઈને વારંવાર ઇન્ફેક્શન થતું હોય તો ડૉક્ટરની સલાહ લેવી ખૂબ જ જરૂરી છે. પેશાબ કરતી વખતે બળતરા, વારંવાર પેશાબ આવવો, તાવ કે પેશાબમાં લોહી પડવા જેવા લક્ષણો દેખાય તો માત્ર ઘરેલું નુસખા પર આધાર ન રાખવો જોઈએ. બેક્ટેરિયલ ઇન્ફેક્શન માટે ડૉક્ટર દ્વારા સૂચવાયેલી એન્ટિબાયોટિક દવાઓ જ લેવી જોઈએ.
શું મકાઈના વાળનું પાણી નિયમિત પીવું સુરક્ષિત છે?
આ પાણી પીતી વખતે પોટેશિયમના સ્તર પર વિશેષ ધ્યાન આપવું પડે છે. મકાઈના વાળ શરીરમાંથી પોટેશિયમનું પ્રમાણ ઘટાડી શકે છે, જે ખાસ કરીને ત્યારે જોખમી બને છે જ્યારે વ્યક્તિ પહેલેથી જ પ્રિસ્ક્રાઇબ કરેલી ડ્યુરેટિક દવાઓ લેતી હોય. જો તમે આવી દવાઓ લેતા હોવ, તો મકાઈનું પાણી તેનો પ્રભાવ વધુ વધારી શકે છે.
જે લોકોની કિડની યોગ્ય રીતે કામ કરતી નથી તેમણે ડૉક્ટરની સલાહ વગર આનો ઉપયોગ ન કરવો જોઈએ, કારણ કે તેમની કિડની માટે પોટેશિયમનું સંતુલન જાળવવું મુશ્કેલ બની શકે છે. આ ઉપરાંત, સગર્ભા સ્ત્રીઓએ પણ ડૉક્ટરની સલાહ વગર તેનું વધુ સેવન ન કરવું જોઈએ, કારણ કે તેનાથી ગર્ભાશયમાં સંકોચન થઈ શકે છે. વળી, જેને મકાઈથી એલર્જી હોય તેમણે તો તેનું સેવન બિલકુલ ન કરવું જોઈએ.
