કોમનવેલ્થ ગેમ્સ 2026: ગ્લાસગોમાં બીજો દિવસ, સ્વિમર શ્રીહરિ નટરાજ અને પેરા-પાવરલિફ્ટર પર રહેશે દેશની નજર
સ્કોટલેન્ડના ગ્લાસગો ખાતે ચાલી રહેલી કોમનવેલ્થ ગેમ્સ (CWG 2026) નો રોમાંચ હવે ચરમસીમા પર પહોંચી ગયો છે. મહાસ્પર્ધાના બીજા દિવસ એટલે કે 24 જુલાઈએ ભારતીય ટુકડી વિવિધ છ રમતોમાં પોતાના પરાક્રમ બતાવવા માટે સંપૂર્ણપણે સજ્જ છે. ગતરોજ ઉદ્ઘાટન સમારોહ અને લોન બાઉલ્સની શાનદાર શરૂઆત બાદ, આજે સમગ્ર દેશની નજર ખાસ કરીને ઓલિમ્પિયન શ્રીહરિ નટરાજની સ્વિમિંગ ઇવેન્ટ અને પેરા-પાવરલિફ્ટિંગની મેડલ સ્પર્ધાઓ પર કેન્દ્રિત રહેશે.
ગઈકાલની યાદગાર શરૂઆત અને બોક્સિંગમાંથી સારા સમાચાર
ગ્લાસગોમાં રમાઈ રહેલી આ રમતોના ઉદ્ઘાટન સમારોહ પહેલા જ બોક્સિંગ એરેનામાંથી ભારત માટે અત્યંત ખુશીના સમાચાર સામે આવ્યા હતા. ભારતીય સ્ટાર બોક્સર લોવલીના બોર્ગોહેને સીધી સેમિફાઇનલમાં પ્રવેશ કરીને ભારત માટે મેડલ નિશ્ચિત કરી દીધો છે. આ ઉપરાંત, લોન બાઉલ્સમાં પણ ભારતીય ખેલાડીઓએ પ્રભાવશાળી પ્રદર્શન સાથે પોતાના અભિયાનની શાનદાર શરૂઆત કરી હતી. હવે બીજા દિવસે, એટલે કે આજે કુલ 14 જેટલી રોમાંચક મેડલ ઇવેન્ટ્સ રમાવાની છે, જેમાં ભારતીય એથ્લેટ્સ મેડલ જીતવા માટે મેદાન પર એડીનું જોર લગાવશે.
સ્વિમિંગમાં શ્રીહરિ નટરાજ પર રહેશે સૌની મીટ
આજની રમતોમાં સૌથી મોટું અને આકર્ષક નામ દેશના સ્ટાર સ્વિમર અને ઓલિમ્પિયન શ્રીહરિ નટરાજનું છે. શ્રીહરિ પુરુષોની 50 મીટર બેકસ્ટ્રોક હીટ 4 માં બપોરે 3:56 વાગ્યે એક્શનમાં જોવા મળશે. જો તે પોતાની આ હીટમાં શાનદાર પ્રદર્શન કરીને ક્વોલિફાય કરવામાં સફળ રહેશે, તો મોડી રાત્રે 12:29 વાગ્યે તેની સેમિફાઇનલ રેસ પણ યોજાશે. ભારતીય ખેલપ્રેમીઓ તેમના આ હોનહાર ખેલાડી પાસેથી શાનદાર પ્રદર્શનની આશા રાખી રહ્યા છે.
પેરા પાવરલિફ્ટિંગમાં મેડલ માટે પ્રબળ આશાઓ
CWG 2026 ના બીજા દિવસે પેરા-પાવરલિફ્ટિંગમાં સાત ભારતીય એથ્લેટ્સ મેડલ માટે પોતાની તાકાત અજમાવશે, અને આ કેટેગરીમાંથી દેશ માટે મેડલ આવવાની પૂરી સંભાવના છે.
સાંજે 5:40 વાગ્યે શરૂ થનાર પુરુષોની લાઇટવેઇટ ફાઇનલમાં અશોક કુમાર મલિક અને પરમજીત કુમાર મેદાનમાં ઉતરશે.
સાંજે 7:20 વાગ્યે મહિલા લાઇટવેઇਟ કેટેગરીમાં જસપ્રીત કૌર અને સુમન દેવી પોતાનો દબદબો દેખાડશે.
રાત્રે 10:40 વાગ્યે મહિલા હેવીવેઇટ ફાઇનલમાં કસ્તુરી રાજામણિ મેડલ માટે ઝઝૂમશે.
મોડી રાત્રે 12:30 વાગ્યે પુરુષોની હેવીવેઇટ ફાઇનલમાં સુધીર અને ઝાંડુ કુમાર દેશ માટે મેડલ જીતવા પરસેવો પાડશે.
આ ઉપરાંત, પેરા સ્વિમિંગમાં પણ પુરુષોની S13 100 મીટર ફ્રીસ્ટાઇલ હીટ બપોરે 3:40 વાગ્યે રમાશે, જેમાં રવિ વીરા વેંકટ ભવાની કાર્તિક બુડિગીના અને ઇમામ અલી ભાગ લેશે, અને તેની ફાઇનલ રાત્રે 12:00 વાગ્યે યોજાશે.
