Donald Trump Announcement: આંતરરાષ્ટ્રીય સ્થિરીકરણ દળ સંભાળશે ગાઝાનો હવાલો: ટ્રમ્પનો નવો શાંતિ પ્રસ્તાવ
Donald Trump Announcement મધ્ય પૂર્વમાં ચાલી રહેલા ભયાનક સંઘર્ષ વચ્ચે યુનાઇટેડ સ્ટેટ્સના રાષ્ટ્રપતિ ડોનાલ્ડ ટ્રમ્પે એક અત્યંત મહત્વપૂર્ણ અને ઐતિહાસિક જાહેરાત કરી છે. ટ્રમ્પે દાવો કર્યો છે કે ગાઝા પટ્ટીમાં સક્રિય સશસ્ત્ર જૂથ હમાસ અને અન્ય તમામ ના નાના-મોટા આતંકવાદી જૂથોના સંપૂર્ણ નિઃશસ્ત્રીકરણ (Disarmament) માટે એક વ્યાપક આંતરરાષ્ટ્રીય કરાર પર સંતોષકારક સંમતિ સાધી લેવામાં આવી છે.
તેમનું માનવું છે કે આ ક્રાંતિકારી પગલાથી ગાઝામાં નવા પેલેસ્ટિનિયન વહીવટની સ્થાપના થશે અને ઇઝરાયેલી દળોને પાછા ખેંચવાનો માર્ગ મોકળો બનશે.
‘બોર્ડ ઓફ પીસ’ દ્વારા કરાર પૂર્ણ થયાનો ટ્રમ્પનો દાવો
પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર એક વિશેષ પોસ્ટ શેર કરતા ડોનાલ્ડ ટ્રમ્પે જણાવ્યું હતું કે ગાઝામાં યુદ્ધ પછીના શાસન, પુનર્નિર્માણ અને સ્થિરતાની દેખરેખ માટે એક વિશેષ આંતરરાષ્ટ્રીય સંસ્થા ‘બોર્ડ ઓફ પીસ’ (Board of Peace) ની રચના કરવામાં આવી છે.
Donald Trump Announcement ટ્રમ્પે લખ્યું, “આજે, બોર્ડ ઓફ પીસ ગાઝા પટ્ટીમાં હમાસ અને અન્ય તમામ સશસ્ત્ર જૂથોના સંપૂર્ણ નિઃશસ્ત્રીકરણ માટે એક ઐતિહાસિક કરાર પર પહોંચવામાં સફળ રહ્યું છે. આ કરાર ઇઝરાયલને તે તમામ સુરક્ષા પૂરી પાડશે જેનું તે હક્કદાર છે. હવે પછી ગાઝાનો ઉપયોગ ક્યારેય આતંકવાદી હુમલાઓ માટેના આધાર તરીકે થઈ શકશે નહીં.”
તબક્કાવાર અમલીકરણ અને નવું સુરક્ષા માળખું
યુએસ પ્રમુખે કરારની રૂપરેખા સ્પષ્ટ કરતા જણાવ્યું કે આ કરારને એકસાથે નહીં પરંતુ તબક્કાવાર રીતે અમલમાં મૂકવામાં આવશે. યોજના મુજબ, ઇઝરાયેલી દળો ધીમે ધીમે ગાઝાના વિસ્તારોમાંથી પાછા હટી જશે.
ઇઝરાયેલી સૈન્યની વાપસી બાદ આંતરરાષ્ટ્રીય સ્થિરીકરણ દળ (International Stabilization Force) ગાઝા પટ્ટીની સુરક્ષા અને વ્યવસ્થાનો હવાલો સંભાળી લેશે. આ વિદેશી દળની સાથે સ્થાનિક કાયદો અને વ્યવસ્થા જાળવવા માટે એક નવા અને તટસ્થ પેલેસ્ટિનિયન પોલીસ દળની પણ રચના કરવામાં આવશે.
ઇઝરાયલનો અસંતોષ અને હમાસનું વલણ
ટ્રમ્પની આ સનસનાટીભરી જાહેરાત છતાં, આ કરાર કેટલો ટકાઉ રહેશે તે અંગે આંતરરાષ્ટ્રીય રાજદ્વારી વર્તુળોમાં શંકાઓ સેવાઈ રહી છે. એક ઉચ્ચ ઇઝરાયલી અધિકારીએ સમાચાર સંસ્થા રોઇટર્સને જણાવ્યું હતું કે પ્રસ્તાવિત શરતો ઇઝરાયલ માટે સંપૂર્ણપણે સંતોષકારક નથી.
ઇઝરાયલની માંગ છે કે કોઈપણ પ્રક્રિયા માટે પૂર્વશરત તરીકે હમાસનું સત્તાવાર અને સંપૂર્ણ નિઃશસ્ત્રીકરણ થવું જોઈએ, જેમાં ગાઝામાંથી તમામ પ્રકારના શસ્ત્રો દૂર કરવા અને આખા વિસ્તારનું સંપૂર્ણ વિ-લશ્કરીકરણ (Demilitarization) કરવા નો સમાવેશ થાય છે.
બીજી તરફ, આ જાહેરાત પર હમાસ તરફથી સત્તાવાર રીતે તાત્કાલિક કોઈ પ્રતિક્રિયા આપવામાં આવી નથી. જોકે, હમાસના વિદેશી રાજદ્વારી વર્તુળોનું કહેવું છે કે આ કરારની સફળતા ઇઝરાયલના વાસ્તવિક પ્રતિભાવ પર અને તે વ્યાપક યુદ્ધવિરામ તરફ દોરી જશે કે નહીં તેના પર નિર્ભર રહેશે.
હિંસા વચ્ચે રાજદ્વારી પ્રયાસો
ટ્રમ્પ દ્વારા આ શાંતિ કરારની જાહેરાત એવા સમયે થઈ છે જ્યારે ગાઝા પટ્ટીમાં હજુ પણ હિંસા અને લશ્કરી કાર્યવાહી ચાલુ છે. પેલેસ્ટિનિયન તબીબી અધિકારીઓના જણાવ્યા અનુસાર, ગુરુવારે થયેલા ઇઝરાયલી બોમ્બમારામાં બે બાળકો સહિત કમસે કમ છ લોકોએ જીવ ગુમાવ્યા હતા.
આવા તંગદિલીભર્યા વાતાવરણ વચ્ચે અમેરિકા દ્વારા રજૂ કરવામાં આવેલો આ શાંતિ પ્રસ્તાવ મધ્ય પૂર્વના ભૌગોલિક-રાજકીય સમીકરણોમાં કેવો વળાંક લાવે છે તેના પર સમગ્ર વિશ્વની નજર ટકેલી છે.
