આજના સમયમાં નોકરી મેળવવા માટે ડિગ્રી અને અનુભવને ખૂબ મહત્વ આપવામાં આવે છે. પરંતુ અમેરિકામાં એક એવી અનોખી નોકરી સામે આવી છે, જેમાં ન તો કોઈ ખાસ ડિગ્રીની જરૂર છે કે ન તો અગાઉના અનુભવની. આ નોકરીમાં તમારે કોઈ જીવતા કૂતરાને નહીં, પરંતુ રોબોટ ડોગને રસ્તા પર ફેરવવાનો છે. આ કામ માટે કંપની દર કલાકે 20 ડોલર એટલે કે અંદાજે 1,700થી 1,800 રૂપિયા ચૂકવવાની ઓફર કરી રહી છે.
આ અનોખી નોકરી અમેરિકાના સાન ફ્રાન્સિસ્કોમાં આવેલી Dimensional નામની ટેક્નોલોજી સ્ટાર્ટઅપ કંપની દ્વારા રજૂ કરવામાં આવી હતી. કંપનીનો હેતુ માત્ર લોકોને રોજગાર આપવાનો નથી, પરંતુ આર્ટિફિશિયલ ઇન્ટેલિજન્સ (AI)ની મદદથી રોબોટને વાસ્તવિક દુનિયામાં સ્વતંત્ર રીતે કામ કરવા માટે સક્ષમ બનાવવાનો છે.
રોજના 4થી 6 કલાક રોબોટને ફેરવવાનું કામ
કંપની દ્વારા જાહેર કરવામાં આવેલી ભરતીની જાહેરાત મુજબ પસંદગી પામેલા લોકોને દરરોજ ચારથી છ કલાક સુધી રોબોટ ડોગ સાથે શહેરના રસ્તાઓ પર ચાલવાનું હતું. આ દરમિયાન રોબોટને નક્કી કરેલા રસ્તા પર ચલાવવાનો હોય છે. તેના માટે હેન્ડહેલ્ડ રિમોટ અથવા મોબાઇલ એપ્લિકેશનનો ઉપયોગ કરી શકાય છે.
આ નોકરીની ખાસ વાત એ છે કે ઉમેદવાર પાસે રોબોટિક્સ ક્ષેત્રનો અનુભવ હોવો જરૂરી નથી. કંપની તરફથી જરૂરી તાલીમ અને સુરક્ષાની માહિતી આપવામાં આવે છે. દરેક શિફ્ટ પૂર્ણ થયા બાદ કર્મચારીઓને ચૂકવણી કરવાની વ્યવસ્થા પણ રાખવામાં આવી હતી.
જોકે, આ કામ એટલું સરળ પણ નથી. રોબોટનું વજન આશરે 15 કિલોગ્રામ છે. જો રસ્તામાં રોબોટ વધારે ગરમ થઈ જાય અથવા અચાનક કામ કરવાનું બંધ કરી દે તો તેને ઉઠાવીને કંપનીની ઓફિસ સુધી લઈ જવાની જવાબદારી પણ કર્મચારીની રહેશે.
આખરે કંપનીને શા માટે છે માણસોની જરૂર?
હવે સવાલ એ થાય કે જ્યારે રોબોટ બનાવવાનો હેતુ માણસોનું કામ ઓછું કરવાનો છે, તો પછી તેને ફેરવવા માટે માણસોની ભરતી કેમ કરવામાં આવી રહી છે?
હકીકતમાં Dimensional કંપની AI આધારિત એવી ટેક્નોલોજી વિકસાવી રહી છે, જેના દ્વારા રોબોટ ભવિષ્યમાં પોતાની મેળે વિવિધ કામ કરી શકે. આ માટે રોબોટને શહેરના રસ્તાઓ, લોકોની અવરજવર, રસ્તામાં આવતા અવરોધો અને આસપાસના વાતાવરણને સમજવાની તાલીમ આપવી જરૂરી છે.
રોબોટમાં લગાવવામાં આવેલા કેમેરા અને સેન્સર રસ્તા પરની વિવિધ ગતિવિધિઓનો ડેટા એકત્રિત કરે છે. જ્યારે માણસ રોબોટને રસ્તા પર ચલાવે છે ત્યારે AIને સમજવામાં મદદ મળે છે કે અલગ-અલગ પરિસ્થિતિમાં કેવી રીતે આગળ વધવું જોઈએ.
AI હજુ માણસોની બરાબરી કરી શકતું નથી
કંપનીના પ્રયોગોમાં જાણવા મળ્યું કે માણસ દ્વારા નિયંત્રિત કરવામાં આવતા રોબોટની કામગીરી AI દ્વારા નિયંત્રિત રોબોટ કરતાં વધુ સારી રહી હતી. એટલે કે AI ટેક્નોલોજી ઝડપથી આગળ વધી રહી હોવા છતાં વાસ્તવિક દુનિયામાં રોબોટને સંપૂર્ણપણે સ્વતંત્ર રીતે ચલાવવાનું હજુ પડકારજનક છે.
ભવિષ્યમાં ફેક્ટરી અને સુરક્ષામાં કામ કરશે રોબોટ
કંપનીની યોજના ભવિષ્યમાં આ ટેક્નોલોજીનો ઉપયોગ ફેક્ટરીઓ, ડેટા સેન્ટર, બાંધકામ સ્થળો અને સુરક્ષા ક્ષેત્રમાં કરવાની છે. રોબોટ ભારે સામાન ઉઠાવવા, પેટ્રોલિંગ કરવા અને જોખમી સ્થળોએ કામ કરવા જેવા કાર્યો કરી શકશે.
આ અનોખી નોકરી દર્શાવે છે કે આવનારા સમયમાં AI અને રોબોટિક્સની દુનિયામાં રોજગારની નવી તકો પણ ઊભી થઈ શકે છે. જોકે, હાલ તો રોબોટને માણસોની મદદની જરૂર છે અને કદાચ આ જ ટેક્નોલોજીની સૌથી રસપ્રદ હકીકત છે.
