કરોડો કર્મચારીઓ માટે EPFO નો મોટો આદેશ: પીએફ એકાઉન્ટમાં લાગુ થયો ‘૨૫ અને ૭૫’ નો નવો નિયમ!
દેશના કરોડો નોકરિયાત વર્ગ અને EPF એકાઉન્ટ હોલ્ડર્સ માટે એક અત્યંત મહત્વપૂર્ણ સમાચાર સામે આવ્યા છે. એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (EPFO) એ વર્ષ ૨૦૨૬ માટે નવી EPF, EPS અને EDLI સ્કીમ લાગુ કરી દીધી છે. આ નવી સિસ્ટમમાં કર્મચારીઓને મળતા હાલના મૂળભૂત ફાયદાઓ અને વ્યાજની સુવિધા તો યથાવત રાખવામાં આવી છે, પરંતુ પીએફ ઉપાડ (PF Withdrawal), ક્લેમ પ્રોસેસ, નોમિનેશન અને જવાબદારીને લગતા ઘણા પાયાના નિયમોમાં મોટા ફેરફારો કરવામાં આવ્યા છે.
૧. પીએફ યોગદાન (PF Contribution) ના નિયમોમાં કોઈ ફેરફાર નહીં
કર્મચારીઓ માટે રાહતના સમાચાર એ છે કે નવી સ્કીમમાં પીએફના યોગદાનના દર કે ગણતરીમાં કોઈ ફેરફાર કરવામાં આવ્યો નથી. નિયમ મુજબ, કર્મચારી પોતાની બેઝિક સેલરી (મૂળ પગાર + ડીએ) ના ૧૨ ટકા હિસ્સો EPF એકાઉન્ટમાં જમા કરાવશે અને એમ્પ્લોયર (કંપની) પણ તેટલો જ બરાબરનો હિસ્સો આપશે. ₹૧૫,૦૦૦ સુધીની માસિક બેઝિક સેલરી ધરાવતા કર્મચારીઓ માટે આ પીએફ યોગદાન ફરજિયાત રહેશે. જ્યારે તેનાથી વધુ પગાર પર પીએફ કાપવો કે નહીં, તે પહેલાંની જેમ જ સ્વૈચ્છિક (Voluntary) રહેશે.
૨. વેજ સીલિંગ (Wage Ceiling) બદલવાની પ્રક્રિયા થઈ સરળ
નવી સ્કીમના દસ્તાવેજોમાંથી ₹૧૫,૦૦૦ ની ફિક્સ વેજ સીલિંગનો સીધો ઉલ્લેખ હટાવી દેવામાં આવ્યો છે. તેની જગ્યાએ હવે ‘કેન્દ્ર સરકાર દ્વારા નિર્ધારિત વેજ સીલિંગ’ એવો શબ્દપ્રયોગ કરવામાં આવ્યો છે. આ ફેરફાર પાછળનું ટેકનિકલ કારણ એ છે કે ભવિષ્યમાં જ્યારે પણ સરકાર પીએફની મર્યાદા (દા.ત. ₹૧૫,૦૦૦ થી વધારીને ₹૨૧,૦૦૦) વધારવા માંગે, ત્યારે આખી સ્કીમમાં સુધારો કરવાને બદલે માત્ર એક સામાન્ય નોટિફિકેશન બહાર પાડીને સીધો ફેરફાર કરી શકશે.
૩. પીએફ ઉપાડના નિયમોને બનાવાયા અત્યંત સરળ
અત્યાર સુધી પીએફમાંથી એડવાન્સ કે પૈસા ઉપાડવા માટે અસંખ્ય જટિલ નિયમો અને શરતો હતી, જેના કારણે સામાન્ય કર્મચારીઓ મૂંઝવણમાં મુકાઈ જતા હતા. હવે EPFO એ આ તમામ અલગ-અલગ શરતોને નાબૂદ કરીને ઉપાડની પ્રક્રિયાને મુખ્યત્વે ત્રણ સરળ કેટેગરીમાં વહેંચી દીધી છે:
-
જરૂરી આકસ્મિક જરૂરિયાતો (તબીબી ખર્ચ વગેરે)
-
મકાન અથવા જમીનની ખરીદી/બાંધકામ
-
ખાસ અથવા અણધારી પરિસ્થિતિઓ
આનાથી સભ્યો માટે નિયમો સમજવા અને ઓનલાઈન ક્લેમ કરવો ઘણો સરળ બની જશે.
૪. પીએફ બેલેન્સમાં હવે લાગુ થશે ‘૨૫ અને ૭૫’ નો નવો નિયમ
નવી સિસ્ટમ હેઠળ, EPFO તમારા પીએફ એકાઉન્ટમાં જમા કુલ રકમને બે હિસ્સામાં ટ્રેક કરશે. નવો નિયમ એવો છે કે તમારી કુલ જમા રાશિનો ૨૫ ટકા હિસ્સો ‘ન્યૂનતમ બેલેન્સ’ (Minimum Balance) તરીકે એકાઉન્ટમાં અનામત રાખવામાં આવશે, જેને તમે સામાન્ય સંજોગોમાં ઉપાડી શકશો નહીં. જ્યારે બાકીનો ૭૫ ટકા હિસ્સો તમારી પાત્રતા અને જરૂરિયાત મુજબ આંશિક ઉપાડ (Partial Withdrawal) કે એડવાન્સ તરીકે મેળવવા માટે હંમેશા ઉપલબ્ધ રહેશે. આ નિયમ કર્મચારીઓના નિવૃત્તિ ભંડોળને સુરક્ષિત રાખવા માટે બનાવાયો છે.
૫. તમામ પ્રકારના ઉપાડ માટે એકસરખો સર્વિસ નિયમ
અગાઉના નિયમોમાં અલગ-અલગ કારણોસર પીએફના પૈસા ઉપાડવા માટે નોકરીનો સમયગાળો (Service Period) પણ અલગ-અલગ નક્કી થયેલો હતો. પરંતુ હવે નવી સિસ્ટમમાં સમાનતા લાવવા માટે મોટાભાગની કેટેગરીમાં ૧૨ મહિનાની સળંગ નોકરી અનિવાર્ય કરી દેવામાં આવી છે. ગંભીર બીમારી કે મેડિકલ ઈમરજન્સીના કિસ્સામાં પણ એડવાન્સ લેવા માટે હવે ઓછામાં ઓછી ૧૨ મહિનાની સર્વિસ પૂરી કરવી જરૂરી રહેશે.
૬. નોકરી છોડ્યા પછી ફુલ સેટલમેન્ટ માટે વધ્યો વેઇટિંગ પિરિયડ
જો તમે નોકરી છોડી દો છો અને તમારા પીએફના પૂરેપૂરા પૈસા (Full & Final Settlement) ઉપાડવા માંગો છો, તો હવે તમારે થોડી લાંબી રાહ જોવી પડશે. જૂના નિયમ મુજબ નોકરી છોડ્યાના ૨ મહિના પછી પૂરા પૈસા ઉપાડી શકાતા હતા, જે વેટિંગ પિરિયડ નવી સ્કીમમાં વધારીને ૧૨ મહિના (૧ વર્ષ) કરી દેવામાં આવ્યો છે. જો કે, આ સમયગાળા દરમિયાન પણ તમે ૭૫ ટકા સુધીનો આકસ્મિક ઉપાડ કરી શકશો. આ ઉપરાંત, પેન્શન સ્કીમ (EPS) હેઠળ આ વેટિંગ પિરિયડ વધારીને ૩૬ મહિના (૩ વર્ષ) નો કરવામાં આવ્યો છે, જેથી કર્મચારીઓ વારંવાર પેન્શનનું ફંડ ઉપાડી ન લે અને તેમનું ભવિષ્ય સુરક્ષિત રહે.
