અમીરો પણ હવે લઈ રહ્યા છે ‘ગોલ્ડ લોન’: સોનાના દાગીના ગીરવે મૂકવામાં હવે શરમ નહીં, સ્માર્ટનેસ છે!

ગોલ્ડ લોન માર્કેટમાં મોટો ઉલટફેર: ₹5 લાખથી વધુની લોન લેનારાઓમાં ઉછાળો, જાણો કેમ બદલાયો ટ્રેન્ડ

ભારતના ફાઇનાન્સ સેક્ટરમાં અત્યારે એક મોટો અને આશ્ચર્યજનક બદલાવ જોવા મળી રહ્યો છે. જે ગોલ્ડ લોન (Gold Loan) એક સમયે માત્ર મજબૂરી કે આર્થિક તંગીનું પ્રતીક ગણાતી હતી, તે હવે અમીરો અને ઉદ્યોગપતિઓ માટે ‘સ્માર્ટ ફાઇનાન્સિંગ’નું સાધન બની ગઈ છે. લોકો હવે સોનું ગીરવે મૂકવામાં શરમ અનુભવવાને બદલે તેને એક બિઝનેસ સ્ટેટજી તરીકે જોઈ રહ્યા છે. આ કલ્ચરલ શિફ્ટને કારણે ગોલ્ડ લોન માર્કેટમાં હાઈ-વેલ્યુ લોન લેનારાઓની સંખ્યામાં ધરખમ વધારો થયો છે.

સામાજિક માન્યતામાં બદલાવ: મજબૂરી નહીં, હવે માસ્ટરસ્ટ્રોક

ભારતીય સમાજમાં પરંપરાગત રીતે ઘરના દાગીના ગીરવે મૂકવાને આર્થિક પતન અથવા મુશ્કેલીની નિશાની માનવામાં આવતી હતી. મધ્યમ વર્ગના પરિવારોમાં આ વિષય પર વાત કરવી પણ એક ટેબૂ (નિષેધ) સમાન હતી. પરંતુ બદલાતા સમય અને સોનાના વધતા ભાવે અમીરોની માનસિકતા બદલી નાખી છે. આજે હાઈ-નેટવર્થ ઇન્ડિવિજ્યુઅલ્સ (HNIs) અને ઉદ્યોગપતિઓ માને છે કે તિજોરીમાં પડેલા સોનાનો ઉપયોગ જો બિઝનેસના વિસ્તરણ કે રોકાણ માટે કરવામાં આવે, તો તે વધુ નફાકારક છે.

આંકડાઓ પર નજર કરીએ તો, 5 લાખ રૂપિયાથી વધુની ગોલ્ડ લોન લેનારાઓનો હિસ્સો હવે કુલ માર્કેટ વેલ્યુના ત્રીજા ભાગથી પણ વધી ગયો છે. આ સ્પષ્ટ સંકેત આપે છે કે હવે માત્ર નાના કામદારો કે ખેડૂતો જ નહીં, પણ મોટા વેપારીઓ પણ સોનાની ચમકનો ઉપયોગ પોતાની લિક્વિડિટી (રોકડની ઉપલબ્ધતા) વધારવા માટે કરી રહ્યા છે.

ઉબેરનો મોટો નિર્ણય: HR ટીમમાં 23% કર્મચારીઓની છટણી, જાણો કંપનીની પાછળનું કારણ!

ટેક્સના બોજથી મળશે મુક્તિ! ભારત સરકારે અર્થતંત્રને મજબૂત કરવા માટે લીધું મોટું પગલું

શા માટે અમીરોની પહેલી પસંદ બની રહી છે ગોલ્ડ લોન?

અમીર વર્ગમાં ગોલ્ડ લોન લોકપ્રિય થવાના કેટલાક નક્કર કારણો છે:

1. ઝડપી પ્રોસેસિંગ: પર્સનલ લોન કે બિઝનેસ લોન માટે લાંબી કાગળની કાર્યવાહી અને ક્રેડિટ સ્કોરની તપાસમાં ઘણો સમય લાગે છે. તેની સામે ગોલ્ડ લોન માત્ર થોડી મિનિટોમાં જ મંજૂર થઈ જાય છે.

2. ઓછો વ્યાજ દર: અસુરક્ષિત લોન (Unsecured Loans) ની સરખામણીમાં ગોલ્ડ લોન સુરક્ષિત હોવાથી બેંકો અને NBFCs ઓછા વ્યાજ દરે નાણાં ધીરે છે.

3. લવચીક ચુકવણી: ગોલ્ડ લોનમાં ઘણી વખત માત્ર વ્યાજ ચૂકવવાનો અને મુદ્દલ રકમ લોનના અંતે ચૂકવવાનો વિકલ્પ મળે છે, જે બિઝનેસમેન માટે કેશ-ફ્લો મેનેજ કરવામાં સરળતા રહે છે.

4. કોઈ એન્ડ-યુઝ મર્યાદા નથી: તમે આ પૈસાનો ઉપયોગ શેરબજારમાં રોકાણ કરવા, નવો બિઝનેસ શરૂ કરવા કે પ્રોપર્ટી ખરીદવા માટે પણ કરી શકો છો, જેની પર બેંક કોઈ પાબંદી લગાવતી નથી.

નવા ભારતનું ગોલ્ડ ઇકોનોમિક મોડલ

ભારત દુનિયામાં સોનાનો સૌથી મોટો ગ્રાહક છે. ભારતીય ઘરોમાં અંદાજે 25,000 થી 27,000 ટન સોનું હોવાનો અંદાજ છે. આ ‘ડેડ એસેટ’ (નિષ્ક્રિય સંપત્તિ) ને હવે ભારતીયો ‘વર્કિંગ કેપિટલ’ માં ફેરવી રહ્યા છે. ગોલ્ડ લોન માર્કેટ હવે સંગઠિત થઈ રહ્યું છે અને મોટી બેંકો પણ આ ક્ષેત્રમાં આક્રમક રીતે આગળ વધી રહી છે.

જ્યારે સોનાના ભાવ આસમાને હોય ત્યારે લોન-ટુ-વેલ્યુ (LTV) પણ વધી જાય છે, એટલે કે ઓછા સોના સામે વધુ રકમ મળે છે. આ જ કારણ છે કે હવે રઈસ લોકો પોતાના ઘરેણાં છુપાવી રાખવાને બદલે તેને આર્થિક પ્રગતિનું એન્જિન બનાવી રહ્યા છે. આ બદલાતી માનસિકતા એ સાબિત કરે છે કે ભારત હવે નાણાકીય બાબતોમાં વધુ પરિપક્વ અને પ્રેક્ટિકલ બની રહ્યું છે.