વેસ્ટ ઈન્ડિઝના વિસ્ફોટક બેટ્સમેન એવિન લુઈસનો યુ-ટર્ન: નિવૃત્તિ પાછી ખેંચી, 9 વર્ષ પછી રેડ બોલ ક્રિકેટમાં કરશે વાપસી
વેસ્ટ ઈન્ડિઝના સ્ટાર T20 બેટ્સમેન એવિન લુઈસે ક્રિકેટ જગતને ચોંકાવી દેનારો નિર્ણય લીધો છે. આ વર્ષની શરૂઆતમાં આંતરરાષ્ટ્રીય ક્રિકેટમાંથી નિવૃત્તિ જાહેર કરનાર લુઈસે હવે પોતાનો ફેંસલો બદલી નાખ્યો છે. 34 વર્ષીય આ બેટ્સમેને માત્ર બે મહિનાના ગાળામાં જ મેદાનમાં પરત ફરવાની તૈયારી બતાવી છે. જોકે, આ વખતે તેમની વાપસી સફેદ બોલથી નહીં પણ લાલ બોલના ક્રિકેટમાં થવા જઈ રહી છે.
T20 વર્લ્ડ કપમાં પસંદગી ન થતા લીધો હતો સંન્યાસ
એવિન લુઈસે આ વર્ષની શરૂઆતમાં ત્યારે નિવૃત્તિની જાહેરાત કરી હતી જ્યારે તેમને વેસ્ટ ઈન્ડિઝની T20 વર્લ્ડ કપ ટીમમાં સ્થાન મળ્યું નહોતું. આ ઉપેક્ષાથી નારાજ થઈને તેમણે આંતરરાષ્ટ્રીય ક્રિકેટને અલવિદા કહી દીધું હતું. પરંતુ હવે તેમણે વેસ્ટ ઈન્ડિઝની ઘરેલું ફર્સ્ટ-ક્લાસ ટુર્નામેન્ટ ‘રીજનલ ફોર-ડે કોમ્પિટિશન’ માં ત્રિનિદાદની ટીમ તરફથી રમવા માટે પોતાની ઉપલબ્ધતા દર્શાવી છે.
9 વર્ષના લાંબા વિરામ બાદ રેડ બોલ ક્રિકેટમાં એન્ટ્રી
સૌથી વધુ ચોંકાવનારી વાત એ છે કે લુઈસ લગભગ 9 વર્ષ પછી રેડ બોલ (ટેસ્ટ ફોર્મેટ) ક્રિકેટમાં પરત ફરી રહ્યા છે. તેમણે છેલ્લે 2017માં ફર્સ્ટ-ક્લાસ મેચ રમી હતી. અત્યાર સુધીના કરિયરમાં તેમણે 22 ફર્સ્ટ-ક્લાસ મેચોમાં 30.72ની સરેરાશથી 1,229 રન બનાવ્યા છે, જેમાં જમૈકા સામે ફટકારેલી એકમાત્ર સદીનો સમાવેશ થાય છે. રસપ્રદ વાત એ છે કે આટલો અનુભવ હોવા છતાં લુઈસ ક્યારેય વેસ્ટ ઈન્ડિઝ માટે ટેસ્ટ મેચ રમી શક્યા નથી.
ત્રિનિદાદના કોચનું નિવેદન: પસંદગીકારો માટે વધશે મુશ્કેલી
ત્રિનિદાદના કોચ રાયદ એમરિટ લુઈસના આ નિર્ણયથી ખૂબ જ ઉત્સાહિત છે. તેમણે જણાવ્યું હતું કે:
“એવિન લુઈસે પોતાની જાતને નેશનલ ટીમ (ઘરેલું) માટે ઉપલબ્ધ કરી છે, જે અમારા માટે ખૂબ જ સારા સંકેત છે. અમારી પાસે જેરેમી સોલોઝાનો અને જેસન મોહમ્મદ જેવા શાનદાર ખેલાડીઓ છે, ત્યારે લુઈસના આવવાથી ટીમમાં સ્પર્ધા વધશે. અંતિમ પ્લેઈંગ ઈલેવન પસંદ કરવી એ પસંદગીકારો માટે હવે એક મીઠું માથાનું દર્દ સાબિત થશે.”
આંતરરાષ્ટ્રીય ક્રિકેટમાં લુઈસનો દબદબો
એવિન લુઈસ મુખ્યત્વે વ્હાઇટ બોલ ક્રિકેટના દિગ્ગજ ખેલાડી ગણાય છે. તેમના આંકડાઓ પર નજર કરીએ તો:
- વનડે (ODI): 70 મેચોમાં 36.75ની સરેરાશથી 2,279 રન.
- T20I: 67 મેચોમાં 152.07ના શાનદાર સ્ટ્રાઈક રેટથી 1,799 રન.
- લિસ્ટ-એ: 114 મેચોનો બહોળો અનુભવ.
