જાપાનના એક્સપ્રેસ-વે પર કાળમુખો અકસ્માત: ૫૦થી વધુ વાહનોની ટક્કર અને ભીષણ આગ, એક મહિલાનું મોત, 26ઘાયલ
જાપાનમાં નવા વર્ષની રજાઓની શરૂઆત વચ્ચે એક હૃદયદ્રાવક માર્ગ અકસ્માત સર્જાયો છે. શુક્રવારે મોડી રાત્રે બરફથી ઢંકાયેલા એક્સપ્રેસ-વે પર વાહનોનો એવો મેળાવડો સર્જાયો કે એક પછી એક ૫૦થી વધુ વાહનો એકબીજા સાથે અથડાઈ પડ્યા હતા. આ ભયાનક ટક્કર બાદ વાહનોમાં આગ ફાટી નીકળી હતી, જેમાં એક ૭૭ વર્ષીય વૃદ્ધ મહિલાનું કરૂણ મોત નીપજ્યું છે, જ્યારે ૨૬ લોકો ગંભીર રીતે ઘાયલ થયા છે.
કેવી રીતે સર્જાયો ‘ચેન રિએક્શન’ અકસ્માત?
પોલીસના જણાવ્યા અનુસાર, આ દુર્ઘટના ગુનમા પ્રાંતના મિનાકામી શહેર પાસેના એક્સપ્રેસ-વે પર બની હતી. પ્રારંભિક તપાસમાં બહાર આવ્યું છે કે અકસ્માતની શરૂઆત બે ભારે ટ્રકો વચ્ચેની ટક્કરથી થઈ હતી. રસ્તો બરફના કારણે અત્યંત લપસણો હોવાથી પાછળથી આવતા વાહનો સમયસર બ્રેક લગાવી શક્યા નહોતા. પરિણામે, એક પછી એક ગાડીઓ પાછળથી અથડાતી ગઈ અને જોતજોતામાં વાહનોની લાંબી હારમાળા ખડકાઈ ગઈ હતી.
આગના ગોળામાં ફેરવાઈ ગાડીઓ
અકસ્માતની ગંભીરતા ત્યારે વધી જ્યારે ટક્કર બાદ અનેક વાહનોમાં અચાનક આગ લાગી ગઈ. પેટ્રોલ અને ડીઝલના લીકેજને કારણે આગ ઝડપથી ફેલાઈ અને અંદાજે ૧૨ થી વધુ ગાડીઓ સંપૂર્ણપણે બળીને ખાખ થઈ ગઈ હતી. ફાયર ફાઈટરની ટીમોને આ ભીષણ આગ પર કાબૂ મેળવતા સાત કલાક જેટલો સમય લાગ્યો હતો. સદનસીબે, આગ વધુ ફેલાય તે પહેલા બાકીના લોકોને વાહનોમાંથી બહાર કાઢી લેવામાં આવ્યા હતા.
જાનહાનિ અને ઘાયલોની સ્થિતિ
આ દુર્ઘટનામાં ટોક્યોની રહેવાસી ૭૭ વર્ષીય મહિલાનું ઘટનાસ્થળે જ મોત નીપજ્યું છે. કુલ ૨૬ લોકો ઘાયલ થયા છે, જેમાંથી ૫ લોકોની હાલત અત્યંત ગંભીર હોવાનું હોસ્પિટલના સૂત્રો દ્વારા જાણવા મળ્યું છે. તમામ ઘાયલોને નજીકની હોસ્પિટલોમાં દાખલ કરવામાં આવ્યા છે અને નિષ્ણાત તબીબોની દેખરેખ હેઠળ તેમની સારવાર ચાલી રહી છે.
15-VEHICLE pileup in Japan triggers MASSIVE blaze
Cars and trucks engulfed in flames
Some victims severely injured pic.twitter.com/0r9CIS2BHI
— RT (@RT_com) December 26, 2025
એક્સપ્રેસ-વે બંને બાજુથી બંધ
જાપાનના અહેવાલ મુજબ, આ અકસ્માત બાદ નિગાતા પ્રાંતના યુઝાવા ઇન્ટરચેન્જ અને ગુનમા પ્રાંતના ત્સુકિયોનો ઇન્ટરચેન્જ વચ્ચેનો માર્ગ બંને બાજુથી બંધ કરી દેવામાં આવ્યો છે. રસ્તા પર વાહનોનો કાટમાળ અને બળી ગયેલી ગાડીઓ હોવાથી વાહનવ્યવહાર પૂર્વવત કરવામાં સમય લાગી રહ્યો છે. પોલીસ અને ફોરેન્સિક ટીમ ઘટનાસ્થળે તપાસ કરી રહી છે.
ચશ્મદીદની આપવીતી: “જીવ બચાવવો મુશ્કેલ હતો”
અકસ્માતમાં માંડ-માંડ બચેલા ૬૦ વર્ષીય ટ્રક ચાલકે જણાવ્યું કે, “બરફના કારણે રસ્તા પર કોઈ કંટ્રોલ નહોતો. મારી સામેની કારને બચાવવા મેં સ્ટેયરિંગ વાળ્યું તો મારો ટ્રક ડિવાઈડર સાથે અથડાયો. ત્યારબાદ પાછળથી આવતા વાહનોના અથડાવાનો જોરદાર અવાજ સતત આવતો રહ્યો. મને લાગ્યું કે આજે મારો છેલ્લો દિવસ છે.”
સાવચેતીનો સંદેશ: જાપાન વહીવટીતંત્રએ રજાઓ દરમિયાન મુસાફરી કરતા લોકોને ચેતવણી આપી છે કે હિમવર્ષાના સમયે વાહનોની ગતિ મર્યાદિત રાખવી અને ટાયર ચેનનો ઉપયોગ કરવો જેથી આવી હોનારતો ટાળી શકાય.
