ફિન એલનનો કરિશ્મા: 20 છગ્ગા ફટકારી તોડ્યો વર્લ્ડ રેકોર્ડ, ક્રિસ ગેલ પણ ન કરી શક્યા આવો પરાક્રમ
T20 વર્લ્ડ કપ 2026માં એક એવો અદ્ભુત વિક્રમ સર્જાયો છે, જે અત્યાર સુધી ક્રિકેટના ઈતિહાસમાં ક્યારેય જોવા મળ્યો નથી. ન્યુઝીલેન્ડના વિસ્ફોટક ઓપનર ફિન એલને એક જ ટૂર્નામેન્ટમાં 20 છગ્ગા ફટકારીને નવો વર્લ્ડ રેકોર્ડ પોતાના નામે કરી લીધો છે. તેમની આ તોફાની રમત જોઈને દિગ્ગજ બેટ્સમેનો પણ સ્તબ્ધ થઈ ગયા છે.
ન્યુઝીલેન્ડે ફાઈનલમાં મારી ધમાકેદાર એન્ટ્રી
કોલકાતાના ઈડન ગાર્ડન્સ સ્ટેડિયમમાં 4 માર્ચના રોજ રમાયેલી સેમીફાઈનલમાં દક્ષિણ આફ્રિકા અને ન્યુઝીલેન્ડ સામસામે હતા. દક્ષિણ આફ્રિકાએ પ્રથમ બેટિંગ કરતા માંડ-માંડ 169 રન બનાવ્યા હતા. જવાબમાં ન્યુઝીલેન્ડના બેટ્સમેનોએ આક્રમક રમત બતાવી અને માત્ર 12.5 ઓવરમાં જ 170 રનનો ટાર્ગેટ હાંસલ કરી લીધો હતો. આ જીત સાથે ન્યુઝીલેન્ડ બીજી વાર T20 વર્લ્ડ કપની ફાઈનલમાં પહોંચવામાં સફળ રહ્યું છે. આ ઐતિહાસિક જીતના હીરો ફિન એલન રહ્યા હતા, જેમણે મેદાનની ચારેબાજુ રનનો વરસાદ કર્યો હતો.
હેટમાયરનો રેકોર્ડ થયો ધરાશાયી
26 વર્ષીય ફિન એલને ઓપનિંગમાં આવતા જ દક્ષિણ આફ્રિકાના બોલરો પર આક્રમણ કર્યું અને માત્ર 33 બોલમાં અણનમ 100 રનની તોફાની ઇનિંગ રમી. આ ઇનિંગ દરમિયાન તેમણે 10 ચોગ્ગા અને 8 ગગનચુંબી છગ્ગા ફટકાર્યા હતા. આ 8 છગ્ગાની મદદથી આ ટૂર્નામેન્ટમાં તેમના કુલ છગ્ગાની સંખ્યા 20 પર પહોંચી ગઈ છે. આ સાથે એલન દુનિયાના એવા પ્રથમ બેટ્સમેન બન્યા છે જેમણે એક જ T20 વર્લ્ડ કપ એડિશનમાં 20 કે તેથી વધુ છગ્ગા માર્યા હોય.
આ પહેલા આ રેકોર્ડ વેસ્ટ ઈન્ડિઝના શિમરોન હેટમાયરના નામે હતો, જેણે ચાલુ વર્લ્ડ કપમાં જ 7 મેચમાં 19 છગ્ગા ફટકાર્યા હતા. હેટમાયરે 1 માર્ચે ભારત સામે આ સિદ્ધિ મેળવી હતી, પરંતુ તેનો રેકોર્ડ માત્ર ત્રણ દિવસ જ ટકી શક્યો.
T20 વર્લ્ડ કપની એક એડિશનમાં સૌથી વધુ છગ્ગા
| ખેલાડીનું નામ | વર્ષ | છગ્ગાની સંખ્યા |
| ફિન એલન | 2026 | 20 |
| શિમરોન હેટમાયર | 2026 | 19 |
| સાહિબજાદા ફરહાન | 2026 | 18 |
| નિકોલસ પૂરન | 2024 | 17 |
| ક્રિસ ગેલ | 2012 | 16 |
| રહેમાનુલ્લા ગુરબાઝ | 2024 | 16 |
એક ઇનિંગમાં પણ સર્જ્યો ઈતિહાસ
ફિન એલન હવે T20 વર્લ્ડ કપની એક ઇનિંગમાં સૌથી વધુ છગ્ગા મારનારા ખેલાડીઓની યાદીમાં સંયુક્ત રીતે ત્રીજા નંબરે પહોંચી ગયા છે. આ યાદીમાં ક્રિસ ગેલ અને એરોન જોન્સ હજુ પણ તેમની આગળ છે. ગેલે એક મેચમાં બે વાર 10 થી વધુ છગ્ગા મારવાનો રેકોર્ડ બનાવેલો છે.
ફિન એલનના આ પ્રદર્શને સાબિત કરી દીધું છે કે તે હાલના સમયના સૌથી ખતરનાક બેટ્સમેનોમાંના એક છે. હવે જોવાનું એ રહેશે કે ફાઈનલ મેચમાં તેઓ પોતાની આ ફોર્મ જાળવી રાખીને ન્યુઝીલેન્ડને પ્રથમ વખત ચેમ્પિયન બનાવી શકે છે કે નહીં.
