પ્રધાનમંત્રીના આયુષ વિઝનને સાકાર કરતી ગાંધીનગર આયુર્વેદ હોસ્પિટલ
ભારતની પ્રાચીન ચિકિત્સા પદ્ધતિ આયુર્વેદ આજે આધુનિક યુગમાં પણ અસાધ્ય રોગો માટે આશીર્વાદરૂપ સાબિત થઈ રહી છે. પ્રધાનમંત્રી નરેન્દ્ર મોદીના વિઝન મુજબ, આયુર્વેદને માત્ર ઉપચાર નહીં પણ જીવન જીવવાની કલા તરીકે પ્રોત્સાહન આપવામાં આવી રહ્યું છે. આ દિશામાં ગાંધીનગરના કોલાવડા સ્થિત ‘સ્ટેટ મોડલ આયુર્વેદ કોલેજ’ સંલગ્ન હોસ્પિટલે એક મોટી સફળતા મેળવી છે. દાહોદ જિલ્લાની એક ૩૪ વર્ષીય મહિલા, જે વર્ષોથી ગંભીર રીતે વાળ ખરવાની અને ટાલ પડવાની સમસ્યાથી પીડાતી હતી, તેમને આયુર્વેદિક સારવાર દ્વારા નવા વાળ ઉગાડવામાં સફળતા મળી છે.
શાસ્ત્રીય સારવાર અને નિષ્ણાતોનું માર્ગદર્શન
આ મહિલા દર્દીએ અગાઉ અનેક મોંઘી સારવાર કરાવી હતી પરંતુ કોઈ પરિણામ મળ્યું નહોતું, જેના કારણે તેઓ ભારે માનસિક તણાવમાં હતા. ગાંધીનગરની સરકારી હોસ્પિટલમાં તેમને દાખલ કરી શાલક્ય તંત્ર વિભાગના વડા પ્રોફેસર કિરણ રાજની દેખરેખ હેઠળ સારવાર શરૂ કરવામાં આવી હતી. આયુર્વેદના સિદ્ધાંતો મુજબ દર્દીની પ્રકૃતિને સમજીને ખાસ ચિકિત્સા પદ્ધતિ તૈયાર કરવામાં આવી હતી. પ્રોફેસર કિરણ રાજે જણાવ્યું કે જો સચોટ અને ચોકસાઈપૂર્વક આયુર્વેદિક પદ્ધતિ અપનાવવામાં આવે, તો વર્ષો જૂની હઠીલી સમસ્યાઓ પણ દૂર થઈ શકે છે.
છ મહિનાની મહેનત અને આયુર્વેદ પર વધતો વિશ્વાસ
લગભગ છ મહિના સુધી ચાલેલી સઘન સારવારના અંતે મહિલાના માથા પર કુદરતી રીતે નવા વાળ ઉગવાનું શરૂ થયું છે. હોસ્પિટલ દ્વારા સારવાર પહેલા અને પછીના ફોટા દ્વારા આ સફળતાની પુષ્ટિ કરવામાં આવી છે. આ સફળતા માત્ર એક મેડિકલ કેસ નથી, પરંતુ સરકારી આયુર્વેદ હોસ્પિટલોમાં મળતી ઉત્કૃષ્ટ સુવિધાઓ અને લોકોનો આયુર્વેદ પ્રત્યે વધતો અતૂટ વિશ્વાસ દર્શાવે છે. હવે જટિલ અને લાંબા ગાળાના રોગો માટે સામાન્ય માણસ પણ આયુર્વેદિક ચિકિત્સા પર વધુ ભરોસો કરી રહ્યો છે.
