ગાંધીનગર જિલ્લામાં નાગરિક પુરવઠા અને ગ્રાહક સુરક્ષા વ્યવસ્થાની સર્વગ્રાહી સમીક્ષા બેઠક યોજાઈ

સંગ્રહખોરી અને કાળાબજાર અટકાવવા જિલ્લા તપાસણી એકમ દ્વારા કડક મોનિટરિંગ

ગાંધીનગર જિલ્લામાં અન્ન અને નાગરિક પુરવઠાની વ્યવસ્થાને વધુ મજબૂત બનાવવા માટે નિવાસી અધિક કલેક્ટર શ્રીમતી નિશા શર્માના અધ્યક્ષસ્થાને એક મહત્વની બેઠક યોજાઈ હતી. આ બેઠકમાં જિલ્લાના નાગરિકોને મળતા અનાજ અને અન્ય જરૂરી ચીજવસ્તુઓના વિતરણની વર્તમાન સ્થિતિની ચર્ચા કરવામાં આવી હતી. અધિકારીઓએ ખાતરી કરી હતી કે સરકારી યોજનાઓનો લાભ દરેક જરૂરિયાતમંદ પરિવાર સુધી પારદર્શક રીતે પહોંચે.

રેશનિંગ વિતરણ અને આધાર સીડીંગમાં મેળવેલી સફળતા

જાન્યુઆરી-૨૦૨૬ માસના આંકડાઓ મુજબ, જિલ્લાના ૧.૬૩ લાખથી વધુ રેશનકાર્ડ ધારકોમાંથી લગભગ ૧.૫૫ લાખ પરિવારોને રાશનનું સફળતાપૂર્વક વિતરણ કરવામાં આવ્યું છે. આ ઉપરાંત, નેશનલ ફૂડ સિક્યુરિટી એક્ટ (NFSA) હેઠળના કાર્ડ ધારકોમાં ૯૯.૯૮% જેટલું આધાર સીડીંગનું કામ પૂર્ણ કરી લેવાયું છે, જે એક મોટી સિદ્ધિ છે. નવા પરિવારોને આ યોજનામાં સામેલ કરવા માટે મળેલી ૨૭૪ અરજીઓનો પણ હકારાત્મક નિકાલ કરવામાં આવ્યો છે.

કાળાબજાર રોકવા માટે દુકાનો અને પેટ્રોલ પંપ પર આકસ્મિક તપાસ

સંગ્રહખોરી અને કાળાબજાર જેવી પ્રવૃત્તિઓ પર લગામ કસવા માટે જિલ્લા તપાસણી ટીમ સતત સક્રિય છે. જાન્યુઆરી મહિનામાં ૯૦ વાજબી ભાવની દુકાનો અને ૧ પેટ્રોલ પંપની ઓચિંતી તપાસ કરવામાં આવી હતી. તંત્ર દ્વારા સ્પષ્ટ સૂચના આપવામાં આવી છે કે તકેદારી સમિતિના સભ્યોની તમામ વિગતો ઓનલાઈન પોર્ટલ પર અપડેટ રાખવી, જેથી મોનિટરિંગની પ્રક્રિયા વધુ સરળ અને ઝડપી બની શકે.

ગાંધીનગરના લોકભવન ખાતે ભવ્ય રાજ્યસ્તરીય ‘સંસ્કૃત સન્માન સમારોહ’નું આયોજન

ગાંધીનગર સિવિલ હોસ્પિટલ ખાતે એક માસ માટે ‘વર્લ્ડ ઓરલ હેલ્થ મંથ’ની ઉજવણી

ગુણવત્તાયુક્ત ખોરાક અને પૂરો જથ્થો મળે તે માટે કડક સૂચના

બેઠક દરમિયાન તોલમાપ વિભાગ અને ફૂડ એન્ડ ડ્રગ્સ વિભાગની કામગીરીની પણ ચર્ચા કરવામાં આવી હતી. નિવાસી અધિક કલેક્ટરે અધિકારીઓને કડક તાકીદ કરી હતી કે ગ્રાહકોને તોલમાપમાં પૂરો જથ્થો મળે અને ખાદ્ય પદાર્થોની ગુણવત્તા જળવાય તે જોવાની જવાબદારી તેમની છે. વાજબી ભાવની દુકાનો સમયસર જથ્થો ઉપાડે અને સામાન્ય નાગરિકોને કોઈ હાલાકી ન ભોગવવી પડે તે માટે દરેક સ્તરે તકેદારી રાખવા સૂચના અપાઈ હતી.