રાજ્યપાલનો આવો અંદાજ ભાગ્યે જ જોવા મળે! શાળામાં રોકાયા અને ગ્રામજનો સાથે કર્યા યોગ
રાજ્યના સર્વોચ્ચ બંધારણીય પદ પર બિરાજમાન હોવા છતાં સાદગીભર્યું જીવન કેવું હોઈ શકે અને જનતાની વચ્ચે રહીને તેમના સુખ-દુઃખમાં કઈ રીતે સહભાગી બની શકાય, તેનું ઉત્તમ ઉદાહરણ ગુજરાતના માનનીય રાજ્યપાલ આચાર્ય દેવવ્રતજીએ ફરી એકવાર પૂરું પાડ્યું છે. ‘ગ્રામ કલ્યાણ કાર્યક્રમ’ અભિયાન અંતર્ગત ખેડા જિલ્લાના પ્રવાસે આવેલા રાજ્યપાલએ કોઈ સર્કિટ હાઉસ કે વૈભવી ઉતારાને બદલે નડિયાદ તાલુકાના નરસંડા ગામની પ્રાથમિક શાળાના એક અત્યંત સાધારણ કક્ષમાં રાત્રિ વિસામો કરીને ગ્રામજનોના દિલ જીતી લીધા હતા.
શુક્રવારની રાત્રે ગ્રામ સભામાં લોકો સાથે સંવાદ સાધ્યા બાદ શાળાના ઓરડામાં રાત્રિ રોકાણ કરીને, શનિવારે વહેલી સવારે રાજ્યપાલએ શાળાના પ્રાંગણમાં જ સૌની સાથે મળીને યોગાભ્યાસ કર્યો હતો. રાજ્યના વડાને આટલી સહજતા અને સાદગીથી ગામડાની શાળામાં રહેતા અને સવારે સૌની સાથે યોગ કરતા જોઈને નરસંડાના ગ્રામજનો, શિક્ષકો અને ખાસ કરીને નાના ભૂલકાઓમાં ભારે ઉત્સાહ અને પ્રેરણા જોવા મળી હતી.
વહેલી સવારે શાળાના પ્રાંગણમાં જામ્યો યોગનો માહોલ
શનિવારે સૂર્યોદયની સાથે જ નરસંડા ગામની પ્રાથમિક શાળાનું કેમ્પસ એક અલગ જ આધ્યાત્મિક અને સ્વાસ્થ્યવર્ધક ઉર્જાથી ગુંજી ઉઠ્યું હતું. વહેલી સવારે રાજ્યપાલ આચાર્ય દેવવ્રતજી પોતે શાળાના મેદાનમાં પધાર્યા હતા અને ગામના વિદ્યાર્થીઓ, શિક્ષકો, સ્થાનિક ગ્રામવાસીઓ તેમજ યોગસાધકો સાથે એકસાથે બેસીને સતત એક કલાક સુધી યોગાભ્યાસ કર્યો હતો.
આ સત્ર દરમિયાન રાજ્યપાલએ માત્ર યોગ કર્યા જ નહીં, પરંતુ એક કુશળ યોગ ગુરુની જેમ ઉપસ્થિત સૌ કોઈને વિવિધ આસનો અને પ્રાણાયામનો અભ્યાસ પણ કરાવ્યો હતો. તેમણે અનુલોમ-વિલોમ, કપાલભાતી જેવા મહત્વપૂર્ણ પ્રાણાયામની સાથે નૌકાસન, શવાસન, સેતુબંધ આસન અને અર્ધસર્વાંગાસન જેવા વિવિધ યોગાસનો કરાવીને સૌને નિયમિત યોગ કરવા માટે પ્રેરિત કર્યા હતા.
યોગ અને પ્રાણાયામના શારીરિક તેમજ માનસિક લાભોનું માર્ગદર્શન
યોગાભ્યાસ બાદ રાજ્યપાલ આચાર્ય દેવવ્રતજીએ ઉપસ્થિત ગ્રામજનો અને વિદ્યાર્થીઓને સંબોધતા યોગનું જીવનમાં શું મહત્વ છે તે અંગે ખૂબ જ સરળ ભાષામાં સમજણ આપી હતી. તેમણે જણાવ્યું હતું કે આજના ભાગદોડભર્યા અને તણાવપૂર્ણ જીવનમાં નિરોગી રહેવા માટે યોગ એ સૌથી અકસીર અને વિનામૂલ્યે મળતી દવા છે.
રાજ્યપાલએ પ્રાણાયામ અને વિવિધ આસનો કરવાથી શરીરને થતા ફાયદાઓ વિશે વિગતવાર વાત કરતા કહ્યું હતું કે નિયમિત યોગાભ્યાસથી શરીરની રોગપ્રતિકારક શક્તિ મજબૂત બને છે, પાચનતંત્ર સુધરે છે અને અનેક પ્રકારના અસાધ્ય રોગોથી બચી શકાય છે. આ ઉપરાંત, યોગ માત્ર શરીરને જ નહીં પરંતુ મનને પણ શાંત અને એકાગ્ર રાખે છે. ખાસ કરીને વિદ્યાર્થીઓ માટે યોગ અને પ્રાણાયામ યાદશક્તિ વધારવા અને માનસિક તણાવ દૂર કરવા માટે અત્યંત ઉપયોગી સાબિત થાય છે. તેમણે સૌને પોતાની દિનચર્યામાં ઓછામાં ઓછો અડધો કે એક કલાક યોગ માટે ફાળવીને તંદુરસ્ત જીવનશૈલી અપનાવવા આહવાન કર્યું હતું.
સાદગીભર્યા રાત્રિ વિસામાથી ગ્રામજનોમાં પ્રેરણાનો સંચાર
ઉલ્લેખનીય છે કે રાજ્યપાલ આચાર્ય દેવવ્રતજી જ્યારે પણ ગ્રામ કલ્યાણ અભિયાન અંતર્ગત કોઈ ગામની મુલાકાત લે છે, ત્યારે તેઓ ગામમાં જ રાત્રિ રોકાણ કરવાનો આગ્રહ રાખે છે. નરસંડા ગામની પ્રાથમિક શાળાના સામાન્ય ઓરડામાં તેમનું રાત્રિ રોકાણ એ વાતનો પુરાવો છે કે તેઓ ગ્રામીણ જીવનશૈલી અને શિક્ષણ સંસ્થાઓ પ્રત્યે કેટલો લગાવ ધરાવે છે. તેમની આ સાદગી જોઈને શાળાના બાળકોને પણ ખૂબ નજીકથી રાજ્યપાલને મળવાનો અને તેમની સાથે યોગ કરવાનો અવિસ્મરણીય અવસર મળ્યો હતો.
વહીવટી અધિકારીઓ અને ગ્રામજનોની બહોળી ઉપસ્થિતિ
નરસંડા પ્રાથમિક શાળા ખાતે આયોજિત આ સવારના યોગ કાર્યક્રમમાં જિલ્લા વહીવટી તંત્રના ઉચ્ચ અધિકારીઓ પણ રાજ્યપાલ સાથે યોગાભ્યાસમાં જોડાયા હતા. આ પ્રસંગે ખેડા જિલ્લા કલેકટર એન.વી. ઉપાધ્યાય, ઇન્ચાર્જ જિલ્લા વિકાસ અધિકારી ડી.ડી. જોગીયા, નડિયાદ પ્રાંત અધિકારી ચિરાગભાઈ નિમાવત, માર્ગ અને મકાન વિભાગના કાર્યપાલક ઈજનેર કે.એસ. બાગુલ, જિલ્લા યુવા અને સાંસ્કૃતિક પ્રવૃત્તિ વિભાગના અધિકારી અક્ષય મકવાણા તેમજ નડિયાદ ગ્રામ્ય મામલતદાર ઉપેન્દ્રસિંહ ગોહિલ ખાસ ઉપસ્થિત રહ્યા હતા. આ ઉપરાંત શાળાના શિક્ષકો, મોટી સંખ્યામાં વિદ્યાર્થીઓ, ગામના આગેવાનો અને યોગપ્રેમી નાગરિકોએ ઉત્સાહભેર ભાગ લઈને ‘સ્વસ્થ ગુજરાત’ના સંકલ્પને સાર્થક કર્યો હતો.
