મુખ્યમંત્રી ભૂપેન્દ્ર પટેલના નેતૃત્વમાં કૌશલ્ય વિકાસને વેગ, ઔદ્યોગિક તાલીમ સંસ્થાઓ મારફતે યુવાનો બન્યા આત્મનિર્ભર
ઉદ્યોગોને કુશળ માનવબળ મળી રહે અને રાજ્યના યુવાનો આધુનિક ટેકનોલોજી સાથે કદમ મિલાવી શકે તે માટે ગુજરાત સરકારની ૨૮૮ સરકારી ઔદ્યોગિક તાલીમ સંસ્થાઓ (ITI) પાયાની ભૂમિકા ભજવી રહી છે. છેલ્લા ત્રણ વર્ષમાં ૨ લાખથી વધુ તાલીમાર્થીઓએ વિવિધ ટ્રેડમાં તાલીમ મેળવી છે, જે પૈકી ૧ લાખથી વધુ યુવાનો (જેમાં ૧૫ હજારથી વધુ યુવતીઓ સામેલ છે) આજે નોકરી કે સ્વરોજગારી મેળવી આત્મનિર્ભર બન્યા છે.
નવી ટેકનોલોજી અને વૈશ્વિક ધોરણો
આજના યુગની જરૂરિયાત મુજબ રાજ્ય સરકારે અભ્યાસક્રમોમાં ધરખમ ફેરફારો કર્યા છે:
-
ભવિષ્યના ટ્રેડ: ઓટોમોબાઈલ, IOT (ઇન્ટરનેટ ઓફ થિંગ્સ), રિન્યુએબલ એનર્જી, સોલાર અને આઈ.ટી. જેવા ટ્રેડમાં બેઠકોનો વધારો કરાયો છે.
-
ટ્રેનિંગ ઓફ ટ્રેનર્સ (ToT): ૨૯૫ સુપરવાઇઝર ઇન્સ્ટ્રક્ટરોને L&T, ટાટા ઇન્ડિયન ઇન્સ્ટિટ્યૂટ ઓફ સ્કિલ્સ અને iACE જેવી પ્રતિષ્ઠિત સંસ્થાઓમાં ઉચ્ચ સ્તરીય તાલીમ અપાઈ છે.
-
ઇન્ડસ્ટ્રી કનેક્ટ: ₹૧૦ કરોડના ઇન્વેસ્ટમેન્ટ સાથે ઉદ્યોગો સાથે કરાયેલા MoU અંતર્ગત ITIમાં અદ્યતન મશીનરી સાથેની લેબ વિકસાવવામાં આવી છે.
મહિલા સશક્તિકરણ: STEM ક્ષેત્રે નવી પહેલ
રાજ્યની રોજગાર અને તાલીમ કચેરીએ ‘UN વુમન’ સાથે મહત્વના MoU કર્યા છે:
૧. STEM મોડ્યુલ: વિજ્ઞાન, ટેકનોલોજી, એન્જિનિયરિંગ અને ગણિત (STEM) ક્ષેત્રે યુવતીઓને આગળ લાવવા ૭૭ કલાકનો વિશેષ અભ્યાસક્રમ તૈયાર કરાયો છે.
૨. પાયલોટ પ્રોજેક્ટ: અમદાવાદ, સુરત, ભરૂચ, નવસારી અને વલસાડ જિલ્લાની મહિલા તાલીમાર્થીઓને આ અદ્યતન તાલીમ આપવામાં આવશે.
ગૌરવશાળી સિદ્ધિ: બીલીમોરા ITI અવ્વલ
ગુજરાતની બીલીમોરા ITI ને ભારત સરકાર દ્વારા વેસ્ટર્ન ઝોનની “Top Performing ITI” તરીકે પુરસ્કૃત કરવામાં આવી છે. મજબૂત પ્લેસમેન્ટ અને ઉદ્યોગો સાથેના શ્રેષ્ઠ જોડાણને કારણે આ સફળતા મળી છે.
કારીગર તાલીમ યોજના (CTS) દ્વારા રાજ્ય સરકાર ઉદ્યોગોની જરૂરિયાત અને યુવાનોની ક્ષમતા વચ્ચેનો સેતુ બની રહી છે, જેનાથી ગુજરાત ‘રોજગાર દાતા’ રાજ્ય તરીકે પ્રસ્થાપિત થયું છે.
