લોકર રાખવું હવે પડશે મોંઘું: HDFC બેંકે જાહેર કરી નવી લિસ્ટ, મેટ્રો શહેરોમાં ભાડું ડબલથી પણ વધુ
HDFC બેંકના ગ્રાહકો માટે એક મોટા અને ખર્ચાળ સમાચાર સામે આવ્યા છે. દેશની સૌથી મોટી ખાનગી બેંક HDFCએ તેના સેફ ડિપોઝિટ લોકરના ભાડામાં મોટો વધારો કરવાની જાહેરાત કરી છે. નવા નિયમો મુજબ, લોકરના ભાડામાં 184% સુધીનો તોતિંગ વધારો કરવામાં આવ્યો છે. આ નવા દરો 1 એપ્રિલ, 2026 થી લાગુ થશે. બેંકે માત્ર ભાડું જ નથી વધાર્યું, પરંતુ લોકરની સુરક્ષા અને શ્રેણીઓમાં પણ મહત્વના ફેરફાર કર્યા છે, જેમાં ‘Metro Plus’ નામની નવી કેટેગરીનો સમાવેશ થાય છે. ચાલો જાણીએ કે તમારા શહેર અને લોકરના કદ મુજબ તમારે હવે કેટલા પૈસા ચૂકવવા પડશે.
નવી ‘Metro Plus’ કેટેગરી અને લોકર ભાડાનું નવું માળખું
HDFC બેંકે લોકર ભાડાની વ્યવસ્થાને વધુ વ્યવસ્થિત બનાવવા માટે લોકેશનના આધારે નવી શ્રેણીઓ પાડી છે. અત્યાર સુધી મેટ્રો, અર્બન, સેમી-અર્બન અને રૂરલ એમ ચાર કેટેગરી હતી, પરંતુ હવે તેમાં ‘Metro Plus’ કેટેગરી ઉમેરવામાં આવી છે. આ કેટેગરીમાં ખાસ કરીને મોટા શહેરોના પ્રીમિયમ વિસ્તારોની બ્રાન્ચોનો સમાવેશ થશે. બેંકના જણાવ્યા અનુસાર, હવે લોકરનું ભાડું માત્ર તેના કદ પર જ નહીં, પરંતુ તમારી બ્રાન્ચ કયા વિસ્તારમાં આવેલી છે તેના પર પણ નિર્ભર રહેશે.
એક જ શહેરમાં આવેલી બે અલગ-અલગ બ્રાન્ચોના લોકર ભાડામાં પણ તફાવત હોઈ શકે છે. આ ભાડું દર વર્ષે એડવાન્સમાં વસૂલવામાં આવશે અને તેના પર 18% GST અલગથી ચૂકવવો પડશે. બેંકનો હેતુ આ વધારા દ્વારા લોકર સિસ્ટમને વધુ આધુનિક અને સુરક્ષિત બનાવવાનો છે. ગ્રાહકોએ હવે લોકર એક્સેસ કરવા માટે આધાર આધારિત બાયોમેટ્રિક ઓથેન્ટિકેશન પ્રક્રિયામાંથી પણ પસાર થવું પડશે, જે સુરક્ષાના સ્તરને વધારશે.
લોકર ભાડાની સરખામણી: જૂના vs નવા રેટ
જો આપણે ભાડામાં થયેલા વધારા પર નજર કરીએ તો, તે ખરેખર મધ્યમ વર્ગના ખિસ્સા પર ભાર મૂકનારો છે. સૌથી નાનું લોકર (Extra Small), જેનું ભાડું મેટ્રો શહેરોમાં અત્યારે ₹1,350 છે, તે વધીને ₹3,300 અને મેટ્રો પ્લસમાં ₹4,000 થઈ જશે. નીચેના કોષ્ટક દ્વારા તમે સમજી શકો છો કે 1 એપ્રિલ 2026 થી તમારે કેટલું ભાડું આપવું પડશે:
નવા દરો (1 એપ્રિલ 2026 થી અમલી – GST સિવાય):
| સાઈઝ (Locker Size) | Metro Plus | Metro | Urban | Semi Urban | Rural |
| Extra Small | ₹4,000 | ₹3,300 | ₹2,200 | ₹2,200 | ₹1,000 |
| Small | ₹7,500 | ₹5,000 | ₹4,000 | ₹3,000 | ₹2,000 |
| Medium | ₹12,500 | ₹10,000 | ₹7,500 | ₹5,000 | ₹4,000 |
| Large | ₹20,000 | ₹15,000 | ₹10,000 | ₹8,000 | ₹6,000 |
| Extra Large | ₹40,000 | ₹20,000 | ₹15,000 | ₹10,000 | ₹8,000 |
તુલનાત્મક રીતે જોઈએ તો, એક્સ્ટ્રા લાર્જ લોકરનું ભાડું જે અત્યારે મેટ્રોમાં ₹20,000 છે, તે મેટ્રો પ્લસ કેટેગરીમાં સીધું ₹40,000 થઈ જશે. એટલે કે 100% થી પણ વધુનો વધારો. ગ્રામીણ વિસ્તારોમાં પણ ભાડામાં નોંધપાત્ર વધારો જોવા મળ્યો છે.
ગ્રાહકો પર અસર અને સુરક્ષાના નવા નિયમો
લોકર ભાડામાં થયેલા આ વધારાની સૌથી વધુ અસર મેટ્રો અને શહેરી વિસ્તારોમાં રહેતા ગ્રાહકો પર પડશે. ઘણા ગ્રાહકો હવે લોકર રાખવું કે નહીં તે અંગે પુનઃવિચાર કરી શકે છે. જોકે, બેંક આ વધારા સામે વધુ સારી સુવિધાઓ આપવાનો દાવો કરી રહી છે. 1 એપ્રિલ 2026 થી, લોકર ખોલવા માટે માત્ર ચાવી પૂરતી નહીં હોય, ગ્રાહકોએ બાયોમેટ્રિક વેરિફિકેશન કરાવવું પડશે. આનાથી લોકરમાં રાખેલા દાગીના અને મહત્વના દસ્તાવેજોની સુરક્ષામાં વધારો થશે.
જો તમે HDFC બેંકમાં લોકર ધરાવો છો, તો તમારે 31 માર્ચ 2026 પહેલા તમારી બ્રાન્ચનો સંપર્ક કરવો જોઈએ અથવા બેંક દ્વારા મોકલવામાં આવેલા ઈમેલ/મેસેજ ચેક કરવા જોઈએ. નવા રેટ મુજબ તમારા સેવિંગ્સ એકાઉન્ટમાં પૂરતું બેલેન્સ રાખવું જરૂરી રહેશે જેથી ભાડું ઓટોમેટિક ડેબિટ થઈ શકે. બેંકિંગ નિષ્ણાતોનું માનવું છે કે HDFC બાદ અન્ય ખાનગી બેંકો પણ તેમના લોકર ભાડામાં વધારો કરી શકે છે.
