અમદાવાદ-વડોદરા એરપોર્ટ પર ભારે અવ્યવસ્થા, ઈન્ડિગોની 150થી વધુ ઉડાનો બંધ થતા યાત્રીઓમાં ગુસ્સો
ઈન્ડિગો એરલાયન્સમાં અચાનક ઉભી થયેલી સ્ટાફ-શોર્ટેજ અને આંતરિક વ્યવસ્થાપન સંબંધિત અવરોધોનું સીધું પરિણામ મુસાફરો પર પડ્યું છે. દિલ્હીને લઈ અમદાવાદ અને મુંબઈ જેવા વ્યસ્ત એરપોર્ટોમાં ઉડાનો બિનજરૂરી રીતે મોડી પડી રહી છે અથવા રદ્દ થઈ રહી છે. આ પરિસ્થિતિએ ખાસ કરીને તાત્કાલિક મુસાફરી કરનાર યાત્રીઓમાં ભારે અસંતોષ સર્જ્યો છે. કેટલાંક મુસાફરોનો આક્ષેપ છે કે એરલાયન્સ તરફથી સમયસર માહિતી નહીં અપાતા વધારાની હેરાનગી ભોગવવી પડી રહી છે.
અમદાવાદ એરપોર્ટ પર ઉડાનો મોટા પાયે પ્રભાવિત
ગુજરાતમાં ઈન્ડિગોની તકલીફોનો સૌથી મોટો પ્રભાવ અમદાવાદ એરપોર્ટમાં જોવા મળ્યો છે. અધિકૃત માહિતી પ્રમાણે રાત્રે 12થી સવારે 6 વાગ્યા સુધી સાત આવનારી ઉડાનો રદ્દ થઈ હતી, જ્યારે 12 ફ્લાઈટો અમદાવાદથી ઉપડી નહીં શકી. કુલ મળીને 19 ઉડાનો અસરગ્રસ્ત રહેતા એરપોર્ટ પર મુસાફરોની લાંબી લાઈનો જોવા મળી હતી. અનેક યાત્રિકોએ જણાવ્યું કે તેમને નવો શેડ્યૂલ કે વિકલ્પની જાણકારી સમયસર આપવામાં આવી નહોતી.
વડોદરા એરપોર્ટમાંથી પણ અનેક ફલાઇટો રદ્દ
અમદાવાદની જેમ વડોદરા એરપોર્ટ પર પણ ઈન્ડિગોની સતત પડતી મુશ્કેલીઓના કારણે ફરજિયાત ફ્લાઈટ રદ્દ કરવી પડી છે. વડોદરાથી હૈદરાબાદ, મુંબઈ અને ગોવા દિશામાં જતી તેમજ પાછી ફરતી અનેક ઉડાનો છેલ્લી ઘડીએ રદ્દ થઈ ગઈ હતી. જેના કારણે મુસાફરોને હોટેલ, બુકિંગ અને અન્ય આયોજન બદલવા પડી રહ્યા છે. આ પરિસ્થિતિથી પરેશાન ઘણા યાત્રીકો એરલાઈન સામે કડક કાર્યવાહી કરવાની માંગ કરી રહ્યા છે.
ઈન્ડિગોના સીઈઓએ જાહેર માફી માગી
ઈન્ડિગોના સીઈઓ પીટર એલ્બર્સે સોશિયલ મીડિયા દ્વારા મુસાફરોને માફી માંગતા જણાવ્યું કે કંપની હાલ ગંભીર ઓપરેશનલ ચેલેન્જનો સામનો કરી રહી છે. તેમણે સ્પષ્ટ કર્યું કે 15 ડિસેમ્બર સુધી જેને ટિકિટ બુક છે તે મુસાફરોને પણ મુશ્કેલીનો સામનો થઈ શકે છે. ગુજરાતમાં તો ગઈકાલે માત્ર એક જ દિવસે અમદાવાદ, રાજકોટ, સુરત અને વડોદરા એરપોર્ટ પરથી કુલ 155 ફ્લાઈટો રદ્દ કરવી પડી હતી. મુસાફરોનો ગુસ્સો વધતા કંપની પર દબાણ પણ વધી રહ્યું છે.
પશ્ચિમ રેલવે આવ્યું મદદે, સ્પેશિયલ ટ્રેન દોડાવવાનો નિર્ણય
મુસાફરોને તાત્કાલિક રાહત આપવા પશ્ચિમ રેલવે આગળ આવ્યું છે અને સાબરમતીથી દિલ્હી વચ્ચે ખાસ ટ્રેન ચલાવવાનું નક્કી કર્યું છે. ટ્રેન નંબર 09497 સાબરમતીથી 7 અને 9 ડિસેમ્બરે રાત્રે 22:55 કલાકે ઉપડશે અને બીજા દિવસે દિલ્હી પહોંચશે. તેની રીટર્ન ટ્રેન 09498 દિલ્હી જંક્શનથી 8 અને 10 ડિસેમ્બરે રાત્રે 21:00 વાગ્યે રવાના થઈ સાબરમતી પહોંચશે. આ ટ્રેનમાં એસી 3-ટાયર કોચ સાથે મુસાફરોને વિકલ્પરૂપે સરળ સુવિધા મળી રહેશે અને સમયસરનું કનેક્શન પણ પ્રાપ્ત થશે.
