IPL 2026 પોઈન્ટ ટેબલ: RCB અને મુંબઈ ઈન્ડિયન્સની શાનદાર શરૂઆત, જાણો કઈ ટીમ છે નંબર-1
આઈપીએલ 2026ની સિઝનનો પ્રારંભ થતાની સાથે જ ક્રિકેટના મેદાનમાં ચોગ્ગા-છગ્ગાની રમઝટ શરૂ થઈ ગઈ છે. ટૂર્નામેન્ટની શરૂઆતની મેચો પૂરી થયા બાદ હવે પોઈન્ટ ટેબલમાં પણ ઉથલપાથલ જોવા મળી રહી છે. ખાસ કરીને આઈપીએલની બે સૌથી લોકપ્રિય ટીમો, રોયલ ચેલેન્જર્સ બેંગ્લોર (RCB) અને મુંબઈ ઈન્ડિયન્સ (MI) એ પોતપોતાની પ્રથમ મેચ જીતીને વિજયી અભિષેક કર્યો છે. જોકે, બંને ટીમો પાસે સમાન પોઈન્ટ હોવા છતાં નેટ રન રેટના આધારે એક ટીમે બાજી મારી લીધી છે.
RCB નો વિસ્ફોટક વિજય: ચેમ્પિયનની જેમ કરી શરૂઆત
આ સીઝનની પ્રથમ મેચ ડિફેન્ડિંગ ચેમ્પિયન RCB અને સનરાઈઝર્સ હૈદરાબાદ (SRH) વચ્ચે રમાઈ હતી. આ હાઈ-સ્કોરિંગ મેચમાં હૈદરાબાદે પ્રથમ બેટિંગ કરતા 20 ઓવરમાં 9 વિકેટે 201 રનનો વિશાળ સ્કોર ખડક્યો હતો. 202 રનના લક્ષ્યાંકનો પીછો કરવા ઉતરેલી RCBની ટીમે સાબિત કરી દીધું કે તેઓ કેમ ચેમ્પિયન છે. બેંગ્લોરના બેટ્સમેનોએ આક્રમક રમત બતાવીને માત્ર 15.4 ઓવરમાં જ 4 વિકેટ ગુમાવી 203 રન બનાવી લીધા હતા. આટલી ઝડપથી લક્ષ્યાંક હાંસલ કરવાને કારણે RCB ના નેટ રન રેટમાં જબરદસ્ત ઉછાળો જોવા મળ્યો છે.
મુંબઈ ઈન્ડિયન્સ: વર્ષો જૂનો ‘પ્રથમ મેચ’નો શ્રાપ તૂટ્યો
બીજી તરફ, પાંચ વખતની ચેમ્પિયન મુંબઈ ઈન્ડિયન્સે કોલકાતા નાઈટ રાઈડર્સ (KKR) સામે ટકરાઈ હતી. KKR એ પ્રથમ બેટિંગ કરતા 4 વિકેટના નુકસાને 220 રનનો પહાડ જેવો સ્કોર બનાવ્યો હતો. મુંબઈ માટે આ લક્ષ્ય મુશ્કેલ હતું, પરંતુ રોહિત શર્મા અને કંપનીએ શાનદાર પ્રદર્શન કર્યું. મુંબઈએ 19.1 ઓવરમાં 4 વિકેટ ગુમાવીને 224 રન બનાવી મેચ જીતી લીધી હતી. મુંબઈના ફેન્સ માટે સૌથી મોટા સમાચાર એ છે કે ટીમે ઘણા વર્ષો પછી પોતાની સીઝનની પ્રથમ મેચ જીતવામાં સફળતા મેળવી છે, જેનો સિલસિલો છેલ્લા કેટલાય સમયથી હાર સાથે શરૂ થતો હતો.
પોઈન્ટ ટેબલની સ્થિતિ: કોણ ક્યાં છે?
ભલે બંને ટીમોએ 2-2 અંક મેળવ્યા હોય, પરંતુ ટેબલમાં ટોપ પર રહેવા માટે નેટ રન રેટ (NRR) સૌથી મહત્વનો ભાગ ભજવે છે.
રોયલ ચેલેન્જર્સ બેંગ્લોર (RCB): લક્ષ્યાંક ખૂબ જ ઝડપથી (15.4 ઓવરમાં) પૂરું કરવાને કારણે RCB નો નેટ રન રેટ +2.907 છે, જે તેમને પોઈન્ટ ટેબલમાં પ્રથમ ક્રમે રાખે છે.
મુંબઈ ઈન્ડિયન્સ (MI): મુંબઈએ છેલ્લી ઓવર સુધી રમીને મેચ જીતી હોવાથી તેમનો નેટ રન રેટ +0.687 છે, જેને કારણે તેઓ હાલમાં બીજા ક્રમે છે.
