IPL 2026: વિરાટ કોહલીનો 973 રનનો ઐતિહાસિક રેકોર્ડ કોણ તોડશે? RCBના આ ખેલાડીએ કરી મોટી ભવિષ્યવાણી
IPL 2026: રોયલ ચેલેન્જર્સ બેંગલુરુના સ્ટાર બેટ્સમેન વિરાટ કોહલીને લઈને તેની જ ટીમના સાથી ખેલાડીએ એક ચોંકાવનારો દાવો કર્યો છે. આ સિઝનમાં કોહલી પોતાના જ જૂના રેકોર્ડને મ્હાત આપી શકે છે.
આઈપીએલના ઈતિહાસમાં જ્યારે પણ સર્વશ્રેષ્ઠ બેટિંગ પ્રદર્શનની વાત આવે છે, ત્યારે વર્ષ 2016નું વિરાટ કોહલીનું ફોર્મ હંમેશા યાદ કરવામાં આવે છે. તે સિઝનમાં વિરાટે 973 રન બનાવીને એક એવો માઈલસ્ટોન સેટ કર્યો હતો, જેને આજ સુધી કોઈ સ્પર્શી શક્યું નથી. જોકે, આઈપીએલ 2026ની શરૂઆત પહેલા RCBના જ વિકેટકીપર બેટ્સમેન જીતેશ શર્માએ એક મોટી ભવિષ્યવાણી કરતા જણાવ્યું છે કે આ વખતે આ રેકોર્ડ તૂટી શકે છે.
જીતેશ શર્માએ વિરાટના ફોર્મ પર શું કહ્યું?
જીતેશ શર્માના મતે વિરાટ કોહલી આ સિઝનમાં એટલા શાનદાર ટચમાં છે કે તે પોતાના 973 રનનો રેકોર્ડ પોતે જ તોડી શકે છે. રણવીર અલ્લાહબાદિયાના પોડકાસ્ટમાં વાત કરતા જીતેશે જણાવ્યું હતું કે, “નેટ્સમાં વિરાટ ભાઈ જે રીતે બેટિંગ કરી રહ્યા છે, તે જોવું અદભૂત છે. તેમના બેટમાંથી નીકળતો ‘ઠક-ઠક’નો અવાજ જ કહી દે છે કે તે કેટલા આત્મવિશ્વાસમાં છે. મને પૂરો ભરોસો છે કે આ સિઝનમાં તેઓ ઓરેન્જ કેપ જીતવાના સૌથી મોટા દાવેદાર છે અને 973 રનનો આંકડો પણ પાર કરી શકે છે.”
નોંધનીય છે કે ગયા વર્ષે RCBને ચેમ્પિયન બનાવવામાં વિરાટ અને જીતેશ બંનેએ મહત્વની ભૂમિકા ભજવી હતી, જેના કારણે ટીમમાં અત્યારે ગજબનો ઉત્સાહ જોવા મળી રહ્યો છે.
વિરાટ કોહલીનું ફોર્મ: આંકડા આપે છે સાક્ષી
વિરાટ કોહલી અત્યારે પોતાના કરિયરના શ્રેષ્ઠ તબક્કામાંથી પસાર થઈ રહ્યો છે. ઓસ્ટ્રેલિયા પ્રવાસ પર શરૂઆતી મુશ્કેલીઓ બાદ તેણે જોરદાર વાપસી કરી છે. છેલ્લી 9 મેચોમાં વિરાટે 4 સદી અને 4 અર્ધસદી ફટકારીને સાબિત કરી દીધું છે કે તેને રોકવો મુશ્કેલ છે. આઈપીએલ 2025માં પણ તેણે 15 ઇનિંગ્સમાં 54.75ની સરેરાશ અને 144.71ના સ્ટ્રાઈક રેટથી 657 રન બનાવ્યા હતા. આ આંકડાઓ દર્શાવે છે કે વિરાટ ફરી એકવાર મોટી ઇનિંગ્સ રમવા માટે સજ્જ છે.
RCB vs SRH: પ્રથમ મેચમાં જ જામશે જંગ
IPL 2026ની પ્રથમ મેચ 28 માર્ચના રોજ બેંગલુરુના એમ. ચિન્નાસ્વામી સ્ટેડિયમમાં રમાશે. ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB)નો સામનો સનરાઇઝર્સ હૈદરાબાદ (SRH) સામે થશે. પોતાના હોમ ગ્રાઉન્ડ પર વિરાટ કોહલી પાસેથી ચાહકોને ફરી એકવાર તે જૂની આક્રમક બેટિંગની અપેક્ષા છે. શું વિરાટ 2016ના તે જાદુઈ આંકડાને ફરીથી સર કરી શકશે? તે જોવું રસપ્રદ રહેશે.
