શાંતિ અને કાયદો-વ્યવસ્થા જાળવવાની બાંહેધરી છતાં ક્રાઈમ બ્રાન્ચે ફટકાર્યા સમન્સ: જાણો સમગ્ર ઘટનાક્રમ
કોકરોચ જનતા પાર્ટી (CJP) ના પ્રવક્તા અને અગ્રણી નેતાઓ સૌરવ દાસ અને આશુતોષ રંકાની કાનૂની મુશ્કેલીઓ જેલમાંથી બહાર આવ્યા બાદ પણ પૂરી થવાનું નામ નથી લઈ રહી. સ્પેશિયલ એક્ઝિક્યુટિવ મેજિસ્ટ્રેટ (SEM) કોર્ટ દ્વારા જામીન મંજૂર કર્યા બાદ બુધવારે સવારે જે જેવા તેઓ તિહાર જેલના દરવાજામાંથી બહાર નીકળ્યા, કે તરત જ દિલ્હી પોલીસની ક્રાઈમ બ્રાન્ચે તેમને એક નવી નોટિસ ફટકારી દીધી હતી.
ક્રાઈમ બ્રાન્ચ દ્વારા જારી કરાયેલા આ સમન્સમાં બંને નેતાઓને ૨૨ ઓક્ટોબરના રોજ બપોરે ૧૨:૦૦ વાગ્યે તપાસ અધિકારીઓ સમક્ષ હાજર થઈને તપાસમાં જોડાવાનો સ્પષ્ટ આદેશ આપવામાં આવ્યો છે.
તિહાર જેલના ગેટ પર જ નોટિસ ફટકારવામાં આવી
બુધવારે સવારે આશરે ૮:૩૦ વાગ્યે સૌરવ દાસ અને આશુતોષ રંકા તિહાર જેલમાંથી બહાર આવ્યા ત્યારે દિલ્હી પોલીસની ક્રાઈમ બ્રાન્ચની ટીમ અગાઉથી જ ત્યાં હાજર હતી. પોલીસે બંને નેતાઓને નોટિસ થમાવીને પૂછપરછ માટે સમન્સ પાઠવ્યા હતા.
આ કેસની ગંભીરતાને ધ્યાનમાં રાખીને તેની તપાસ દિલ્હી પોલીસના ક્રાઈમ બ્રાન્ચ યુનિટ WR1 ને ટ્રાન્સફર કરવામાં આવી છે. આ તપાસ અંતર્ગત સૌરવ દાસ અને આશુતોષ રંકા ઉપરાંત સીજેપીના અન્ય એક સહયોગી અજિંક્ય શિંદેનો પણ સંપર્ક કરવામાં આવી રહ્યો છે. પોલીસ તેમને પણ તપાસમાં સામેલ થવા માટે નોટિસ મોકલવાની તૈયારી કરી રહી છે.
BNS ની વિવિધ કલમો હેઠળ પૂછપરછ અને આરોપો
પોલીસ સૂત્રોના જણાવ્યા અનુસાર, ક્રાઈમ બ્રાન્ચની ટીમ BNS (ભારતીય ન્યાય સંહિતા) ની કલમ ૨૨૩, સરકારી આદેશોનો અનાદર કરવા તેમજ જંતર-મંતર જેવા સંવેદનશીલ વિસ્તારમાં કોઈપણ પરવાનગી વગર અથવા બીજાની મિલકતમાં પ્રવેશ કરી વિરોધ પ્રદર્શન કરવા અંગે પૂછપરછ કરશે.
આગામી સુનાવણી અને પૂછપરછ દરમિયાન પોલીસ આ નેતાઓ પાછળના મુખ્ય આયોજકો અને ઘટનાક્રમ સંબંધિત મહત્ત્વના પુરાવાઓ મેળવવાનો પ્રયાસ કરશે. ગુરુવારે બપોરે ૧૨ વાગ્યે ક્રાઈમ બ્રાન્ચ ઓફિસે પહોંચ્યા બાદ બંને નેતાઓની કલાકો સુધી પૂછપરછ થાય તેવી પૂરેપૂરી સંભાવના છે.
₹૫૦,૦૦૦ નો બોન્ડ અને કડક સોગંદનામું
આ અગાઉ, બંને CJP નેતાઓને સ્પેશિયલ એક્ઝિક્યુટિવ મેજિસ્ટ્રેટ તરીકે કાર્યરત આસિસ્ટન્ટ કમિશનર ઓફ પોલીસ (એસીપી) રિતુ રાજે ₹૫૦,૦૦૦ ના સમાન રકમના વ્યક્તિગત બોન્ડ અને જામીન મંજૂર કર્યા બાદ તિહાર જેલમાંથી મુક્ત કરવાનો હુકમ કર્યો હતો.
જોકે, જેલમાંથી છૂટતા પહેલાં કોર્ટે તેમની પાસેથી એક કડક શરતો ધરાવતું સોગંદનામું (Affidavit) લખાવી લીધું હતું. આ સોગંદનામામાં સીજેપી નેતાઓએ સ્પષ્ટપણે સ્વીકાર્યું હતું કે, “અમે રાજધાનીમાં શાંતિ, કાયદો અને વ્યવસ્થા અને જાહેર સુલેહ-શાંતિ જાળવવા માટે સંપૂર્ણ પ્રતિબદ્ધ છીએ. અમે એ પણ સ્પષ્ટ કરીએ છીએ કે જ્યાં સુધી કાયદા હેઠળ જંતર-મંતરને વિરોધ પ્રદર્શન માટે સત્તાવાર સ્થળ તરીકે ફરીથી અધિસૂચિત કરવામાં ન આવે, ત્યાં સુધી અમે ત્યાં કોઈપણ પ્રકારના વિરોધ પ્રદર્શનનું આમંત્રણ આપીશું નહીં. અમારા દરેક આંદોલન બંધારણની મર્યાદામાં જ રહેશે.”
આ સોગંદનામું આપ્યા છતાં ક્રાઈમ બ્રાન્ચ દ્વારા નોટિસ ઈશ્યૂ કરી તપાસ તેજ કરી દેવામાં આવતાં CJP કેમ્પમાં ફરી ચિંતાનો માહોલ છવાયો છે.
