ઈરાન યુદ્ધમાં દુબઈ-અબુધાબી પર શા માટે થયા સૌથી વધુ હુમલા? હવે સામે આવ્યું અસલી કારણ
ઈરાન અને ઈઝરાયેલ વચ્ચે ચાલી રહેલા યુદ્ધમાં અત્યાર સુધી જે વાતો ગુપ્ત હતી, તેનો હવે પર્દાફાશ થયો છે. અહેવાલો મુજબ, યુદ્ધ દરમિયાન ઈઝરાયેલ અને UAE વચ્ચે સૈન્ય, સુરક્ષા અને ગુપ્તચર (Intelligence) સહયોગ તેની સર્વોચ્ચ સપાટીએ પહોંચી ગયો હતો. UAE ને ઈરાની મિસાઈલોથી બચાવવા માટે ઈઝરાયેલે તેની સૌથી શક્તિશાળી ‘આયર્ન ડોમ’ (Iron Dome) એર ડિફેન્સ સિસ્ટમ ત્યાં તૈનાત કરી હતી. એટલું જ નહીં, આ સિસ્ટમને ઓપરેટ કરવા માટે ઈઝરાયેલી સૈનિકો પણ દુબઈ અને અબુધાબીમાં હાજર હતા.
ઈરાની હુમલાઓનો વરસાદ અને UAE ની સુરક્ષા
યુદ્ધ શરૂ થયા પછી, UAE આ વિસ્તારના સૌથી વધુ અસરગ્રસ્ત દેશોમાંનો એક બની ગયો છે. અમીરાતી અધિકારીઓના જણાવ્યા અનુસાર, ૨૮ ફેબ્રુઆરીએ અમેરિકા અને ઈઝરાયેલ સામે યુદ્ધ શરૂ થયા પછી ઈરાને UAE પર ભીષણ હુમલા કર્યા હતા. ઈરાને અત્યાર સુધીમાં અંદાજે 550 બેલેસ્ટિક અને ક્રૂઝ મિસાઈલો તેમજ 2200 થી વધુ ડ્રોન દ્વારા હુમલા કર્યા છે.
આટલા મોટા પાયે થઈ રહેલા હુમલાઓને રોકવા માટે ઈઝરાયેલના વડાપ્રધાન બેન્જામિન નેતન્યાહુએ UAE ના રાષ્ટ્રપતિ મોહમ્મદ બિન જાયદ સાથે વાત કર્યા પછી તાત્કાલિક ધોરણે આયર્ન ડોમ તૈનાત કરવાનો નિર્ણય લીધો હતો.
અમીરાતી જમીન પર ઈઝરાયેલી સૈનિકોની હાજરી
ઈરાન અને UAE વચ્ચે વધેલા તણાવે ઈઝરાયેલી સૈનિકો માટે અમીરાતી ધરતી પર ઓપરેટ કરવાનો રસ્તો ખોલી દીધો હતો. સામાન્ય સંજોગોમાં આ બાબત રાજકીય રીતે અત્યંત સંવેદનશીલ ગણાય છે, પરંતુ યુદ્ધની ગંભીરતા જોતા સમીકરણો બદલાઈ ગયા.
રિપોર્ટમાં એવો પણ ખુલાસો થયો છે કે ઈઝરાયેલી એરફોર્સે દક્ષિણ ઈરાનમાં મિસાઈલ પોઝિશનને નિશાન બનાવીને અનેક હુમલા કર્યા હતા, જેથી તે મિસાઈલો UAE કે અન્ય ખાડી દેશો સુધી પહોંચે તે પહેલા જ તેને હવામાં નષ્ટ કરી શકાય. UAE ના પ્રેસિડેન્શિયલ એડવાઈઝર અનવર ગરગાશે પણ સંકેત આપ્યો છે કે ઈરાનની આક્રમકતાને કારણે આ ક્ષેત્રમાં ઈઝરાયેલનો પ્રભાવ વધુ વધશે.
શા માટે UAE જ ઈરાનના નિશાના પર રહ્યું?
દુબઈ અને અબુધાબી પર હુમલા થવા પાછળના મુખ્ય ત્રણ કારણો છે:
વ્યૂહાત્મક ભાગીદારી: વર્ષ ૨૦૨૦ માં બંને દેશો વચ્ચેના સંબંધો સામાન્ય (Normalize) થયા પછી, UAE હવે ઈઝરાયેલનો સૌથી મોટો સુરક્ષા અને સંરક્ષણ ભાગીદાર બની ગયો છે.
સૈન્ય ઠેકાણા: UAE એ શારજાહ, દુબઈ અને અબુધાબીમાં પોતાની ધરતી પરથી ઈરાન વિરુદ્ધ ઓપરેશન કરવા માટે ઈઝરાયેલ અને અમેરિકાને મંજૂરી આપી હોવાનું મનાય છે.
ઈઝરાયેલની મદદ: ઈરાન માને છે કે UAE ના સહકાર વગર ઈઝરાયેલ ખાડી દેશોમાં આટલું મજબૂત બની શક્યું ન હોત, તેથી તે UAE ને પાઠ ભણાવવા માંગે છે.
