ઈશાન કિશને અભિષેક શર્માની મજાક ઉડાવી: ‘તારું તો એક જ મહિનું ફોર્મ ગયું હતું, હું તો બે વર્ષ બહાર હતો’
અમદાવાદના નરેન્દ્ર મોદી સ્ટેડિયમમાં રમાયેલી T20 વર્લ્ડ કપ 2026ની ફાઈનલમાં ભારતની ભવ્ય જીત બાદ ડ્રેસિંગ રૂમથી લઈને મેદાન સુધી જશ્નનો માહોલ હતો. આ ઐતિહાસિક વિજયના બે હીરો – ઈશાન કિશન અને અભિષેક શર્મા – વચ્ચે મીડિયા સમક્ષ થયેલી એક મજેદાર વાતચીતે સૌના દિલ જીતી લીધા છે. આ બંને ખેલાડીઓએ ફાઈનલમાં જે રીતે બેટિંગ કરી, તેણે ન્યૂઝીલેન્ડને મેચમાંથી બહાર કરી દીધું હતું.
ફાઈનલમાં બંનેનો તોફાની અંદાજ
ફાઈનલ મેચમાં ન્યૂઝીલેન્ડ સામે ભારતે જ્યારે ૨૫૫ રનનો વિશાળ સ્કોર ખડક્યો, ત્યારે તેમાં અભિષેક શર્માના ૨૧ બોલમાં ૫૨ રન અને ઈશાન કિશનના ૨૫ બોલમાં ૫૪ રનનો મોટો ફાળો હતો. અભિષેક શર્માએ માત્ર ૧૮ બોલમાં ફિફ્ટી ફટકારીને પાવરપ્લેમાં જ ભારતનો સ્કોર ૯૨ રન સુધી પહોંચાડી દીધો હતો. જોકે, આ ટુર્નામેન્ટના અંતિમ પડાવ સુધી પહોંચવા માટે બંનેએ અલગ-અલગ પ્રકારના સંઘર્ષનો સામનો કર્યો હતો.
મજેદાર વાતચીત: જ્યારે ઈશાન કિશને અભિષેકને રોક્યો
મેચ પછી જ્યારે મીડિયાએ બંનેને તેમના ખરાબ ફોર્મ અને વાપસી વિશે સવાલ પૂછ્યો, ત્યારે અભિષેકે જવાબ આપવાનું શરૂ કર્યું, “મને લાગે છે કે હું આ સવાલનો વધુ સારી રીતે જવાબ આપી શકીશ…” ત્યારે જ બાજુમાં ઉભેલા ઈશાન કિશને તેને અધવચ્ચે અટકાવતા મજાકમાં કહ્યું, “હું પણ આપી શકું છું! તારું તો માત્ર એક જ મહિનું ફોર્મ ગયું હતું, હું તો બે વર્ષ સુધી ટીમની બહાર રહ્યો છું.”
ઈશાનની આ વાત સાંભળીને અભિષેક શર્મા પણ હસી પડ્યો અને તેણે તરત જ જવાબ આપ્યો, “ભાઈ, એ એક મહિનો મને દોઢ વર્ષ જેવો લાગતો હતો.” આ વાતચીત બતાવે છે કે ભલે સંઘર્ષનો સમયગાળો અલગ હોય, પણ ફોર્મ ગુમાવવાની પીડા દરેક ખેલાડી માટે સરખી જ હોય છે.
🚨 ABHISHEK & ISHAN FUNNY GEMS ON COMEBACK 🚨
Ishan Kishan – your 1 month form is gone but I’ve been out 3 years from team 🤣
Abhishek Sharma – That 1 month felt like your 1.5 year to me too 🤯
— Kiara (@crickiara) March 9, 2026
સંઘર્ષમાંથી સફળતા સુધીની સફર
અભિષેક શર્મા: આખા વર્લ્ડ કપ દરમિયાન અભિષેકનું બેટ શાંત રહ્યું હતું. અનેક વખત શૂન્ય રને આઉટ થવાને કારણે તેને ટીમમાંથી બહાર કરવાની માંગ પણ ઉઠી હતી, પરંતુ મેનેજમેન્ટે તેના પર ભરોસો રાખ્યો અને ફાઈનલમાં તેણે પોતાની ક્ષમતા સાબિત કરી દીધી.
ઈશાન કિશન: ઈશાન માટે આ વાપસી ભાવુક હતી. તે લગભગ બે વર્ષથી ભારતીય ટીમની બહાર હતો. ઘરેલુ ક્રિકેટમાં શાનદાર પ્રદર્શન કરીને વર્લ્ડ કપની ટીમમાં સ્થાન મેળવ્યા બાદ, તેણે આખી ટુર્નામેન્ટમાં ૩૧૭ રન બનાવીને ટીકાકારોના મોઢા બંધ કરી દીધા છે. ખાસ કરીને પાકિસ્તાન સામેની તેની ઈનિંગ યાદગાર રહી હતી.
