ઈઝરાયલ-ઈરાન વચ્ચે સીઝફાયરનું એલાન! મિડલ ઈસ્ટમાં શાંતિની આશા વચ્ચે ઈઝરાયલે હિઝબુલ્લાહને આપી સીધી ચેતવણી

અમેરિકા બાદ હવે ઇઝરાયલે પણ ઈરાન સામે સીઝફાયર જાહેર કર્યું, પરંતુ હિઝબુલ્લાહ વિરુદ્ધ જંગ ચાલુ રહેશે

વિશ્વભરમાં ચર્ચાનો વિષય બનેલા ઈરાન-ઇઝરાયલ સંઘર્ષમાં એક નવો વળાંક આવ્યો છે. અમેરિકી રાષ્ટ્રપતિ ડોનાલ્ડ ટ્રમ્પની જાહેરાત બાદ હવે ઇઝરાયલે પણ સત્તાવાર રીતે ઈરાન સામે સીઝફાયરની જાહેરાત કરી દીધી છે. ઇઝરાયલી સેનાએ સ્પષ્ટ કર્યું છે કે તેઓ હવે ઈરાન પર સીધો હુમલો નહીં કરે, પરંતુ જો ઈરાન તરફથી કોઈ ઉશ્કેરણી થશે તો તેનો જડબાતોડ જવાબ આપવામાં આવશે.

ઇઝરાયલી સંરક્ષણ દળ (IDF) નું સત્તાવાર નિવેદન

ઇઝરાયલી સુરક્ષા દળોએ સોશિયલ મીડિયા પ્લેટફોર્મ ‘X’ પર પોસ્ટ કરીને આ નિર્ણયની જાણકારી આપી હતી. IDF એ જણાવ્યું કે, “રાજકીય સ્તરેથી મળેલી સૂચનાઓ અનુસાર, અમે ઈરાન વિરુદ્ધ ચાલી રહેલી સૈન્ય કાર્યવાહીમાં ગોળીબાર બંધ કરવાનો નિર્ણય લીધો છે. જોકે, કોઈપણ પ્રકારના ઉલ્લંઘન સામે રક્ષણાત્મક જવાબ આપવા માટે અમારી સેના સંપૂર્ણ રીતે સજ્જ છે.”

સીઝફાયર પહેલાં, ઇઝરાયલી વાયુસેનાએ રાતોરાત ઈરાનમાં અનેક મિસાઈલ લોન્ચિંગ સાઇટ્સ અને લોન્ચરો પર જોરદાર હુમલા કર્યા હતા, જેથી ઈરાનની હુમલો કરવાની ક્ષમતાને નબળી પાડી શકાય.

“જો હું ન હોત તો તું જેલમાં હોત…” – ડોનાલ્ડ ટ્રમ્પે ઇઝરાયેલી પીએમ નેતન્યાહૂને કેમ આપવી પડી આવી કડક ચેતવણી?

મધ્ય-પૂર્વમાં ફરી યુદ્ધના ભણકારા: બૈરૂત પર હુમલો થયો તો ઈરાન નહીં બેસે ચૂપ

હિઝબુલ્લાહ સામે કાર્યવાહી ચાલુ રહેશે

ઇઝરાયલે ભલે ઈરાન સાથે યુદ્ધવિરામ કર્યો હોય, પરંતુ લેબેનોનમાં સક્રિય આતંકી સંગઠન હિઝબુલ્લાહ પ્રત્યે તેનું વલણ નરમ પડ્યું નથી. IDF એ સ્પષ્ટ કર્યું છે કે લેબેનોનમાં હિઝબુલ્લાહ વિરુદ્ધના ટાર્ગેટેડ ગ્રાઉન્ડ ઓપરેશન્સ અને હુમલાઓ અવિરત ચાલુ રહેશે. ઇઝરાયલનું માનવું છે કે તેના નાગરિકોની સુરક્ષા માટે હિઝબુલ્લાહનો ખાત્મો જરૂરી છે.

ટ્રમ્પનો દાવો: આ અમેરિકાની મોટી જીત

આ અગાઉ, અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથે બે અઠવાડિયાના સીઝફાયરની જાહેરાત કરી હતી. ટ્રમ્પે દાવો કર્યો હતો કે ઈરાન જ્યારે ‘સ્ટ્રેટ ઓફ હોર્મુઝ’નો દરિયાઈ માર્ગ ફરીથી ખોલવા માટે સહમત થયું, ત્યારે જ આ યુદ્ધવિરામ શક્ય બન્યો છે. ટ્રમ્પે તેને અમેરિકાની વિદેશ નીતિની એક મોટી જીત ગણાવી છે અને આ સમયગાળા દરમિયાન ઈરાન પર કોઈ પણ પ્રકારનો હુમલો ન કરવાની ખાતરી આપી છે.

⭕️ In accordance with directives from the political echelon, the IDF has ceased fire in the operation against Iran, and is highly prepared to respond defensively against any violation.

Overnight, the IDF conducted a wide-scale wave of strikes targeting missile launch sites and…

— Israel Defense Forces (@IDF) April 8, 2026

શું હવે શાંતિ સ્થપાશે?

ઇઝરાયલ અને ઈરાન વચ્ચેનો આ સીઝફાયર ભલે હાલ પૂરતો હોય, પણ તેને શાંતિ તરફનું એક મહત્વનું પગલું માનવામાં આવી રહ્યું છે. જોકે, લેબેનોન અને અન્ય મોરચે ઇઝરાયલની સક્રિયતા જોતા આગામી દિવસોમાં સ્થિતિ કેવી વળાંક લે છે તેના પર આખા વિશ્વની નજર છે.