કચ્છના રણથી વૈશ્વિક બજાર સુધી ઊંટડીના દૂધની સફર, સરહદ ડેરીએ રચ્યો ઇતિહાસ

સહકારથી સમૃદ્ધિના માર્ગે સરહદ ડેરી, ઊંટપાલકો માટે આર્થિક સંજીવની

કચ્છના રણની ઓળખ સમાન ઊંટડીના દૂધને હવે પ્રોસેસિંગ દ્વારા આંતરરાષ્ટ્રીય બજારમાં સ્થાન મળ્યું છે. સરહદ ડેરી દ્વારા ૧૬ જાન્યુઆરી ૨૦૧૯થી ભારતનો પ્રથમ ઊંટડીના દૂધનો પ્રોસેસિંગ પ્લાન્ટ કાર્યરત કરવામાં આવ્યો છે. આ દૂધમાં રહેલા મિનરલ્સ અને રોગપ્રતિકારક શક્તિ વધારવાના ગુણોને કારણે તેની માંગ વધી રહી છે. રાપર, નખત્રાણા જેવા ચાર કેન્દ્રો દ્વારા દૈનિક ૪,૭૫૪ લીટર ઊંટડીનું દૂધ એકત્ર કરી ૩૫૦થી વધુ ઊંટપાલક પરિવારોને આર્થિક ટેકો આપવામાં આવે છે.

સહકાર ક્ષેત્રે ઐતિહાસિક સિદ્ધિઓ

વડાપ્રધાન શ્રી નરેન્દ્ર મોદીના ‘સહકારથી સમૃદ્ધિ’ના વિઝનને સાકાર કરતા સરહદ ડેરીએ અનેક માઈલસ્ટોન સ્થાપિત કર્યા છે:

• ઉત્પાદન ક્ષમતા: ૯૦૦થી વધુ મંડળીઓ દ્વારા રોજનું ૫.૫ લાખ લીટર દૂધ એકત્ર કરવામાં આવે છે.

• આઈસ્ક્રીમ પ્લાન્ટ: વડાપ્રધાનશ્રી દ્વારા ઉદઘાટન કરાયેલ પ્લાન્ટમાં ૮૦ થી વધુ વેરાયટી બને છે, જેમાં ઊંટડીના દૂધનો ‘રાજભોગ આઈસ્ક્રીમ’ દેશભરમાં માત્ર અહીં જ બને છે.

• આર્થિક પ્રગતિ: વર્ષ ૨૦૨૪-૨૫માં ૧૨૦૦ કરોડથી વધુનું ટર્નઓવર હાંસલ કર્યું છે, અને પશુપાલકોને રોજનું અંદાજે ૩ કરોડની ચુકવણી કરવામાં આવે છે.

ટેકનોલોજી અને એવોર્ડ્સની વણઝાર

સરહદ ડેરીએ માત્ર દૂધ જ નહીં પણ ટેકનોલોજીમાં પણ પ્રગતિ કરી છે. ૩૦૦ ટન ક્ષમતાનો કેટલ ફીડ પ્લાન્ટ અને હરિયાણા-તેલંગાણા જેવા રાજ્યોમાં શુદ્ધ દૂધની સપ્લાય તેની મજબૂતી દર્શાવે છે.

• બેંકિંગ સુવિધા: ૩૧,૦૬૭ પશુપાલકોના બેંક ખાતા ખોલાવી રૂપે કાર્ડ અને ૪૩૮ મંડળીઓને માઇક્રો ATM ની સુવિધા પૂરી પાડવામાં આવી છે.

• વૈશ્વિક ગૌરવ: દુબઈના ‘ગલ્ફ ફૂડ એક્સપો’ અને ઇન્ટરનેશનલ ડેરી ફેડરેશનમાં ડેરીના ઉત્પાદનોએ આકર્ષણ જમાવ્યું છે. ડેરીને FOKIA અને ગ્રીન વર્કપ્લેસ એવોર્ડ ૨૦૨૫ જેવા અનેક સન્માન મળ્યા છે.