નડિયાદ ખાતે યોજાયેલી દિશા બેઠકમાં ભૂગર્ભ જળ રિપોર્ટનું વિમોચન અને પાણી-પોષણ યોજનાઓ પર વિશેષ ચર્ચા
ખેડા જિલ્લા પંચાયત, નડિયાદ ખાતે સાંસદ શ્રી દેવુસિંહ ચૌહાણના અધ્યક્ષસ્થાને જિલ્લા વિકાસ સંકલન અને દેખરેખ સમિતિ (DISHA) ની બેઠક યોજાઈ હતી. આ બેઠકમાં જુલાઈ થી ડિસેમ્બર ૨૦૨૫ સુધીના ગાળામાં થયેલી કામગીરીની ઝીણવટભરી સમીક્ષા કરવામાં આવી હતી. સાંસદશ્રીએ પાણી પુરવઠા, આરોગ્ય અને માર્ગ મકાન વિભાગના અધિકારીઓ સાથે સીધો સંવાદ સાધી પ્રગતિ હેઠળના કામોની વિગતો મેળવી હતી.
ભૂગર્ભ જળ રિપોર્ટનું વિમોચન
બેઠક દરમિયાન સાંસદશ્રી અને કલેક્ટર શ્રી અમિતપ્રકાશ યાદવના હસ્તે કેન્દ્રીય જલશક્તિ મંત્રાલય દ્વારા તૈયાર કરાયેલ ‘નેકયુમ રિપોર્ટ ઓફ ખેડા ડિસ્ટ્રિક્ટ’ (NAQUIM Report) પુસ્તકનું વિમોચન કરવામાં આવ્યું હતું. સેન્ટ્રલ ગ્રાઉન્ડ વોટર બોર્ડના વૈજ્ઞાનિકો દ્વારા આ રિપોર્ટમાં ખેડા જિલ્લાના ભૂગર્ભ જળની સ્થિતિ અને તેના વ્યવસ્થાપન અંગે મહત્વના તકનીકી પાસાઓ રજૂ કરવામાં આવ્યા છે.
આંગણવાડીમાં પોષણ અભિયાન: ‘ટીમ ખેડા’ની સરાહના
જિલ્લામાં ચાલી રહેલી “ગામનો નિર્ધાર સહકારથી સાકાર અભિયાન” અંતર્ગત આંગણવાડીના બાળકો માટે થઈ રહેલી કામગીરીની ખાસ નોંધ લેવામાં આવી હતી:
-
દૂધ વિતરણ: જિલ્લાની ૧૧૬૦ આંગણવાડીઓમાં ૭૬૦૦ બાળકોને દરરોજ કુલ ૭૫૦ લીટર દૂધ આપવામાં આવે છે.
-
પોષણમિત્ર: સરકારી અધિકારીઓ અને કર્મચારીઓ પોતે ‘પોષણમિત્ર’ બનીને બાળકોને પોષણકીટ આપી રહ્યા છે, જે સમગ્ર રાજ્યમાં માત્ર ખેડા જિલ્લાની અનોખી પહેલ છે. સાંસદશ્રીએ આ માટે ‘ટીમ ખેડા’ ને વિશેષ અભિનંદન પાઠવ્યા હતા.
આરોગ્ય અને માળખાગત સુવિધાઓ
બેઠકમાં અન્ય મહત્વના મુદ્દાઓ પર પણ ચર્ચા કરવામાં આવી:
-
આરોગ્ય: પીએમજેએવાય (PMJAY) આયુષ્માન કાર્ડ, નિક્ષય પોષણમિત્ર (ટીબી દર્દીઓ માટે) અને ગ્રામ્ય સ્તરે “નમોશ્રી” યોજનાની પ્રગતિની સમીક્ષા કરવામાં આવી.
-
પાણી પુરવઠા: “વાસ્મો” અને “નલ સે જલ” યોજના હેઠળ છૂટાછવાયા ઘરોમાં મીની યોજના દ્વારા પાણી પહોંચાડવા સૂચના અપાઈ.
-
નવા કેન્દ્રો: માતર, ડાકોર અને કઠલાલમાં ક્ષમતાવર્ધન કેન્દ્રો તેમજ સેવાલિયા-મહેમદાવાદમાં નવા પશુ દવાખાના શરૂ કરવા અંગે આયોજન કરાયું.
આ બેઠકમાં ધારાસભ્ય અર્જુનસિંહ ચૌહાણ, ડીડીઓ જયંત કિશોર અને અન્ય વરિષ્ઠ અધિકારીઓ હાજર રહ્યા હતા.
